Qrim sudi mahalliy tadbirkor Artem Paliychukning ro‘yxatdan o‘tkazilgan savdo belgisidan noqonuniy foydalangani uchun tovon puli undirish to‘g‘risidagi da’vosini ko‘rib chiqdi. Da’vo Rossiyaning Rostov shahridagi bir kompaniya va O‘zbekistonning Jizzax shahridagi akkumulyator zavodiga nisbatan berilgan.
Sud qaroriga ko‘ra, da’vo to‘liq qanoatlantirilgan. Akkumulyator zavodi qrimlik tadbirkor foydasiga kompensatsiya to‘lashi kerak.
Gap nima haqda ketmoqda?
Jizzax akkumulyator zavodi bir necha yillardan beri Rossiyaga “KUCH” brendi ostidagi akkumulyatorlarni eksport qilib keladi.
Qrimlik tadbirkor Artem Paliychuk sudga murojaat qilib, “Jizzax akkumulyator zavodi” AJ va Rostovda faoliyat yurituvchi “ARS Motors” MChJ unga tegishli “KUCH” savdo belgisidan noqonuniy tarzda foydalanib kelayotganini iddao qiladi va uning foydasiga Rostov kompaniyasidan 6,2 mln rubl, Jizzaxdagi zavoddan esa 257,3 million rubl (qariyb 3,18 mln dollar) tovon puli undirilishini talab qiladi.
Qayd etilishicha, Jizzax akkumulyator zavodi o‘z mahsulotlarini “KUCH” savdo belgisi ostida og‘ir yuk avtomobillari ishlab chiqaruvchi Tataristondagi “KAMAZ” AJga yetkazib bergan. Bu tovar ayirboshlash 2019 yildan 2022 yilgacha amalga oshirilgan operatsiyalar to‘g‘risidagi bojxona ma’lumotlarida ham keltirilgan.
Tadbirkorning ta’kidlashicha, u ro‘yxatdan o‘tkazgan tovar belgisi ostida mahsulot yetkazib berish uning intellektual mulk obektiga bo‘lgan huquqlarini buzgan.
Sud hujjatlariga ko‘ra, sudlanuvchi tomon da’vo Rossiyaning hakamlik sudida ko‘rib chiqilish shart emasligini ko‘rsatib, ishni yakunlash zarurligini, shuningdek, Jizzax akkumulyator zavodi O‘zbekistonda ro‘yxatdan o‘tgani va Rossiya yurisdiksiyasiga bo‘ysunmasligiga ishora qilgan. Biroq ushbu jihatlar sudda inobatga olinmagan.
Sud buni xorijiy kompaniyaning boshqaruv organi rahbari Rossiyada ro‘yxatdan o‘tgani va nizo kelib chiqqan domen nomiga ega sayt rus auditoriyasiga qaratilgani bilan izohlagan.
Uzoq muddat davom etgan o‘rganishlardan keyin, 2023 yilning 3 aprelida Qrim arbitraj sudida ushbu ish ko‘rib chiqildi va da’vogarning da’vo arizasini qanoatlantirish haqida qaror qabul qilindi.
Ma’lumot uchun, Artem Paliychuk avtomobil qismlari savdosi bilan bilan shug‘ullanadi. 2014 yilda Simferopolda ro‘yxatdan o‘tgan “Magnat-Oil” kompaniyasining egasi. Tadbirkor “Rospatent”da 22 ta savdo belgisiga ega va yana 9ta yangi savdo belgisiga egalik qilish huquqini olish uchun ariza topshirgan.
