O‘zbekiston tomoni “Maksam”ning ayblovlarini rad etib, uni majburiyatlarini bajarmaganlikda aybladi  

“O‘zkimyosanoat” AJ va Davlat aktivlarini boshqarish agentligi qo‘shma bayonot chiqarib, Ispaniyaning “Maxamcorp” kompaniyasi “Maksam-Chirchiq” zavodiga doir nizo yuzasidan xalqaro arbitrajga murojaat qilganidan “hayratda” ekani, kompaniyaga nisbatan “xafsalasi pir bo‘lgani”ni ma’lum qildi.

Bayonotda aytilishicha, “Maxamcorp International” S.L. ispan kompaniyasi 2007 yilda “O‘zkimyosanoat” AJ bilan birgalikda 2 ta qo‘shma korxona – “Maksam-Chirchiq” AJ va “Ammofos-Maksam” AJlarni tashkil etgan.

“Qabul qilingan majburiyatlarga qaramay, “Maksam” kompaniyasi investitsiyalarni jalb qilish bo‘yicha o‘z majburiyatlarini bajarmagan va hozirda ularni bajarishdan bosh tortmoqda. O‘z navbatida, “O‘zkimyosanoat” AJ va agentlik “Maksam” kompaniyasining shartnoma munosabatlarini buzganlik haqidagi asossiz ayblovlarini qat’iyan rad etadi.

Ikki qo‘shma korxona qariyb 15 yildan buyon muvaffaqiyatli faoliyat yuritib kelmoqda. “Maksam” tomonidan qo‘zg‘atilgan da’volar shartnoma majburiyatlarini buzganliklarini yashirish va noto‘g‘ri boshqaruv, samarasizlik, sarmoya kiritmaslik va O‘zbekiston qonunchiligiga rioya qilmaslik uchun javobgarlikdan qochishdan boshqa narsa emas.

“Maksam” kompaniyasi tomonidan investitsiya majburiyatlarini bajarmaslik qo‘shma korxonalar faoliyatiga va modernizatsiya va kengaytirish qobiliyatiga sezilarli darajada to‘sqinlik qiladi. “O‘zkimyosanoat” AJ va agentlik ham tomonlarning savollari va pozitsiyalari sir saqlanishi lozim bo‘lgan bir paytda, “Maksam” kompaniyasi o‘z da’volarini oshkor qilganidan hayratda”, – deyiladi O‘zbekiston tomonining munosabatida.

“O‘zkimyosanoat» AJ va Davaktiv:

• Har doim birgalikdagi faoliyat to‘g‘risidagi tegishli kelishuvlarga va O‘zbekiston Respublikasining amaldagi qonunchiligiga muvofiq ish yuritgan hamda hech qanday shartnoma yoki boshqa majburiyatlarni buzmagani;
• “Maksam” kompaniyasi bilan kelishmovchilikni do‘stona va vijdonan hal qilish tarafdori bo‘lgani va hozir ham shundayligi;
• har doim barcha faoliyatimizda inson va mehnat huquqlarini hurmat qilish va himoya qilishga intilib kelganini bildirgan.

Ta’kidlanishicha, “O‘zkimyosanoat” AJ va Davaktivning ham “Maksam” kompaniyasiga qarshi da’volari bor:

“Qayd etish lozimki, “Maksam” kompaniyasi o‘zining butun faoliyati davomida qo‘shma korxonalar faoliyatini yaxshilashga qaratilgan ishlarni amalga oshirishni emas, faqatgina dividentlar olishni ko‘zlagan. Vaholanki, “Maksam” kompaniyasining majburiyatlari qo‘shma korxonalarni modernizatsiya qilish va zamonaviy texnologiyalar bilan ta’minlash, ishlab chiqarish uskunalarini takomillashtirish va texnik yordam ko‘rsatishni qamrab olgan. Biroq, “Maksam” kompaniyasi o‘z majburiyatlarini bajarmadi. Buni 2022 yil oktabr oyida “Maksam-Chirchiq” AJ zavodida yuz bergan eskirgan uskunaning avariyasi ham tasdiqlaydi”.

Shu bilan birga, so‘nggi yillarda qo‘shma korxonalar faoliyatidan olinadigan foyda sezilarli darajada oshgan, mavjud quvvatlar modernizatsiya qilinib, faoliyatda yaxshilanishlar kuzatilmoqda. Bunga esa “investor va uning vakillari ishtirokisiz”, “faqat O‘zbekiston tomonining sa’y-harakatlari evaziga” erishilgan.

Qayd etilishicha, O‘zbekiston tomoni “Maksam” kompaniyasining da’volari bo‘yicha huquqiy pozitsiya tayyorlamoqda.

Eslatib o‘tamiz, Ispaniya kompaniyasi “Maksam-Chirchiq” zavodining 49 foiz aksiyalariga egalik qiladi. Kompaniya O‘zbekiston hukumatidan shartnomani buzib kelganlik uchun tovon to‘lashni talab qilib, Londondagi arbitrajga murojaat qilgan.