O‘zbekistonning afg‘on muammosini hal qilish bo‘yicha yondashuvlari Londonda taqdim etildi

O‘zbekiston elchisi Said Rustamov Britaniyaning nufuzli ODI tahliliy markazida Afg‘oniston ayollari va qizlari bo‘yicha Britaniya parlament guruhi tomonidan tashkil etilgan tadbirda ishtirok etdi, deb xabar bermoqda «Dunyo».

Elchi o‘z nutqida yig‘ilganlarni O‘zbekistonning Afg‘oniston yo‘nalishidagi muhim tashabbuslari va yondashuvlari bilan tanishtirdi. Afg‘onistonda mustahkam tinchlik o‘rnatish va ijtimoiy-iqtisodiy tiklash borasida amalga oshirilayotgan sa’y-harakatlar, jumladan, ta’lim sohasida amalga oshirilayotgan loyihalar haqida ma’lumot berildi.

O‘zbekistonning Afg‘oniston muvaqqat hokimiyat organlari tomonidan ilgari o‘z zimmalariga olgan xalqaro majburiyatlarni, shu jumladan, ayollar va qizlar huquqlarini ta’minlash sohasida amalga oshirishning samarali mexanizmlarini ishlab chiqish istagiga alohida e’tibor qaratilmoqda.

O‘zbekiston Kobul bilan konstruktiv muloqotni rivojlantirish va ushbu mamlakat aholisiga yaxshi qo‘shnichilik yordamini ko‘rsatish borasida xalqaro hamjamiyat bilan o‘z harakatlarini yaqindan muvofiqlashtirishi qayd etildi.