Rossiyada mamlakatdan chiqishi taqiqlangan fuqarolar pasportini topshirishga majbur bo‘ladi

Rossiyada mamlakat fuqarolariga mamlakatdan chiqib ketish taqiqlangan taqdirda pasportlarini topshirishga majburiyatini yuklovchi qonun kuchga kirdi. Rasmiylar tomonidan chet elga chiqishi taqiqlangan rossiyaliklar endi besh ish kuni ichida xorijga chiqish pasportlarini ularni bergan muassasalarga (Ichki ishlar vazirligi yoki Tashqi ishlar vazirligi) yoki o‘z xodimlarining Rossiyadan chiqib ketishini cheklagan tashkilotlarga «saqlash uchun topshirishlari» kerak. Tegishli qaror 22 noyabr kuni Rossiya hukumati tomonidan qabul qilingan.

Qarorda pasportlarni xorijda topshirish tartibi belgilangan

«Rossiya Federatsiyasidan chiqish va Rossiya Federatsiyasiga kirish tartibi to‘g‘risida» gi qonunning 18-moddasi kuchga kirishi munosabati bilan qabul qilingan qaror xorijga chiqish pasportlarini Rossiyaning xorijiy vakolatxonalariga topshirish tartibini belgilaydi. Elchixonalar va konsulliklardan hujjatlar diplomatik pochta orqali ularni bergan organlar tomonidan saqlash uchun Rossiyaga yuboriladi.

Rasmiy huquqiy axborot portalida e’lon qilingan ma’lumotda aytilishicha, ko‘rsatilgan muddatda saqlashga topshirilmagan pasportlar haqiqiy emas deb topiladi. Saqlash uchun taqdim etilgan pasportlarni berish cheklovlar olib tashlanganidan keyin amalga oshiriladi.

Ayrim toifadagi fuqarolarga, jumladan, majburiy harbiy yoki muqobil fuqarolik xizmatiga chaqirilganlarga chet elga chiqish pasportlarini topshirishni talab qiluvchi tuzatishlar iyun oyida qabul qilingan edi. O‘zgartirishlar Rossiya Davlat dumasiga 2021 yil avgust oyida kiritilgan. Qonun loyihasining birinchi o‘qishi ikki oydan keyin bo‘lib o‘tdi. Biroq deputatlar hujjatni ikkinchi va uchinchi o‘qishda faqat 2023 yilning may oyida qabul qilgan. 7 iyun kuni tuzatishlar Federatsiya kengashi tomonidan ma’qullangan, 13 iyun kuni esa Rossiya prezidenti Vladimir Putin tomonidan imzolangan. Endi - rasmiy e’lon qilinganidan 180 kun o‘tib - tuzatishlar kuchga kirdi.