Ekologiya vaziri havo ifloslanishi bo‘yicha hisob berish uchun parlamentga chaqirildi

Oliy Majlis Qonunchilik palatasi 17 yanvar kuni bo‘lib o‘tgan yig‘ilishda Ekologiya, atrof-muhitni muhofaza qilish va iqlim o‘zgarishi vaziri Aziz Abduhakimovni O‘zbekistonda, jumladan, Toshkent shahrida atmosfera havosi ifloslanishining oldini olish bo‘yicha olib borilayotgan ishlar haqida hisob berishi uchun chaqirtirish to‘g‘risida qaror qabul qildi.

Qonunchilik palatasi spikeri o‘rinbosari, Ekologiya va atrof-muhitni muhofaza qilish masalalari qo‘mitasi raisi, Ekologiya partiyasi fraksiyasi rahbari Xayrullo G‘afforov so‘nggi paytlarda poytaxtdagi havoning ifloslanishi muhokama mavzusiga aylanganini ta’kidladi.

U «O‘zgidromet» ma’lumotlariga tayanib, Toshkent shahrida yanvar oyida havodagi mayda PM2,5 zarrachalarining miqdori o‘rtacha 45 mkg/m3 ni tashkil etgani, bu Jahon sog‘liqni saqlash tashkiloti tavsiyalaridan (5 mkg/m3) bir necha baravar yuqori ekanini ma’lum qildi. Shuningdek, u Toshkent shahri dunyoda havo ifloslanishi darajasi bo‘yicha yuqori o‘rinni egallab turganini eslatdi.

Uning so‘zlariga ko‘ra, 2019 yilda «Atmosfera havosini muhofaza qilish to‘g‘risida»gi qonun qabul qilinishiga qaramay, vaziyat og‘irlashmoqda. Shu bois hisob berishi uchun ekologiya, atrof-muhitni muhofaza qilish va iqlim o‘zgarishi vaziri Aziz Abduhakimovni parlamentga chaqirish haqida qaror qabul qilindi.

Xayrullo G‘afforovning ta’kidlashicha, Qonunchilik palatasi hisobotni tinglashdan tashqari, prezidentga hukumat a’zolarini iste’foga chiqarishning maqsadga muvofiqligi, shaxslarni javobgarlikka tortish va hukumat a’zolarini iste’foga chiqarish bo‘yicha ham taklif berishga haqli.

Uning qayd qilishicha, tinglovni «ko‘rgazma uchun» o‘tkazish rejalashtirilmagan. Shuningdek, fraksiyaning kengaytirilgan yig‘ilishida olimlarning fikr-mulohazalari tinglanib, muammoni joyida o‘rganadigan ishchi guruh ham tuzilgan.