Gvardiol Holand o‘rniga gollar urmoqda, Shomurodov va jamoasi yirik hisobda yutqazdi. Kun o‘yinlari
|17:21 / 12.05.202419 75021 min
Arda «Real» safida navbatdagi golini urdi. Shanba oqshomida Yevropa futbolida ro‘y bergan asosiy voqealar, o‘yinlardagi gollar va turnir jadvalidagi vaziyat.
«Manchester Siti» o‘zi qoqilishidan umid qilayotganlarni ranjitmoqda, Gvardiol esa hujumchiga aylanmoqda. Londondagi o‘yinda xorvatiyalik himoyachi chiroyli gol bilan hisobni ochdi. Qanotdan markazga ko‘chgan futbolchi De Bryuyne bilan devor uslubida o‘ynab jarima maydoniga kirib bordi va bir harakat bilan himoyachini yo‘ldan olib, to‘pni bo‘sh burchakka joylashtirdi. Xosep Gvardiola o‘z futbolchilarining qirralarini ochish mahoratini ushbu futbolchi misolida ham namoyish etmoqda.
«Shaharliklar» to‘pga egalik qilish bo‘yicha yaqqol ustunlikka ega bo‘lishsa-da, yupqa muz ustida yurgandek edi. «Fulhem»ning birgina zarbasi o‘ta xavfli chiqdi, ammo Rodrigo Munizning zarbasini Ederson qaytarib qoldi, bu vaziyat mehmonlar uchun ogohlik qo‘ng‘irog‘i edi. Ko‘p o‘tmay Foden ustun yoniga yo‘llagan zarbasi hisobni qulay ko‘rinishga keltirdi, keyin Gvardiol yana bir gol bilan o‘yindagi intrigani butunlay o‘ldirdi, zaxiradan tushgan Alvares qo‘shib berilgan daqiqalar so‘ngida o‘zi ishlagan 11 metrlik jarima zarbasini aniq ijro etib, hisobni yanada yiriklashtirdi. Xorvatiyalik himoyachiga het-trik qayd etish imkoniyati berilgandi, ammo u shtatdagi penaltichilardan biri bo‘lgan argentinalik hujumchi foydasiga bundan voz kechdi.
So‘nggi vaqtlarda ko‘p tanqidga uchrayotgan Holand esa o‘zi ega bo‘lgan o‘ta qulay vaziyatda aniq zarba bera olmadi.
«Siti» qatorasiga yetti uchrashuvda g‘alaba qozondi, ularning har birida kamida ikki gol farqi bilan ustunlikka erishilgan, jamoada bunaqasi 2015 yildan buyon kuzatilmagandi. Asosiysi — amaldagi chempionlar yana birinchi o‘ringa ko‘tarildi va «Arsenal» «MYu» bilan o‘yinda qanday javob qilishini kutadi. Agar «kanonirlar» yakshanba kuni safar o‘yinida g‘alaba qozona olmasa, «Manchester Siti» seshanba kuniyoq chempionga aylanishi mumkin — «Tottenhem»ga qarshi qoldirilgan o‘yinda. Aks holda chempionlik taqdiri keyingi dam olish kunlari bo‘lib o‘tadigan so‘nggi turda hal bo‘ladi.
Chempionlar ligasi yo‘llanmasi va ligada qolish uchun juda kam imkoniyat saqlab turgan ikki jamoa to‘qnashuvi — tomoshabop va dramatik tus oldi. O‘yin Vikario va Murichning ajoyib seyvlari seriyasi bilan boshlandi. Keyin esa gollar urildi — avvaliga autsayder hisobni ochdi. «Shporlar» yana yuqori mudofaa liniyasi o‘rnatishgandi, bu esa Berge Brun Larsenni darvozabon bilan yakkama-yakka vaziyatga chiqarib yuborishiga yordam berdi. Ammo mezbonlar himoyachisi Pedro Porro raqib darvozasi tomon ikkinchi yurishida yaqin burchakni aniq nishonga olib, hisobni tenglashtirdi.
Ikkinchi bo‘lim yanada qizg‘in kechdi, lekin ko‘p vaziyatlarda «Tottenhem»dan omad yuz o‘girdi. Jonson Son Hyon Minning uzatmasidan keyin olis ustun oldida turib to‘pga zarba bera olmadi, Murich Sarrning kuchli zarbasidan keyin qahramonlik ko‘rsatdi, mezbonlarning qiyinchiliklariga esa van de Ven barham berdi. Markaziy himoyachi Gvardiol kabi forvard vazifasini bajardi va uniki kabi gol urdi. Bu gol Angelos Posteko‘g‘li jamoasini to‘rtinchi o‘rin uchun poygada qoldirdi va «Byornli»ni chempionshipga tushirib yubordi.
Yettinchi o‘rin orqali yevrokubok yo‘llanmasiga ega bo‘lishi mumkin bo‘lgan «Chelsi» o‘yinni juda kuchli boshladi. Ammo Mudrikning tezkor goliga Bolining himoyachilar xatosidan foydalanib urgan goli bilan javob qaytarildi. Nima bo‘lganda ham «Nottinghem» ligada qolish uchun kurashayotgan jamoalardan biri edi. Shu tufayli mezbonlarni birinchi bo‘limda Palmerning o‘zi yaratgan to‘rtta golli vaziyat va uning golli uzatmasi cho‘chita olmasdi.
Ikkinchi bo‘limning kattagina qismida mehmonlar to‘pga egalik qilgan bo‘lsa-da, «Nottinghem» aniqroq harakatlar amalga oshirdi va golga yaqinroq bo‘ldi. Avvaliga Yyetsning jarima maydoni chizig‘idan yo‘llagan zarbasi ustundan qaytdi. Keyinroq ustun mezbonlarning yana bir zarbasini to‘sdi, Hadsonu-Odoiga esa to‘sin gol urishga to‘sqinlik qildi. Ammo aynan «Chelsi» tarbiyalanuvchisi aylanma zarbasi bilan jamoasini hisobda oldinga olib chiqdi.
Ammo bu mavsumda ko‘klar jamoasidan har narsa kutish mumkin va ular umidsiz vaziyatda qolganida ham mag‘lubiyatdan qutulib keta olishini ko‘rsatishgan. Bu o‘yinda Maurisio Pochettino futbolchilar almashtirishda topqirlik qildi va ikki daqiqa ichida avvaliga Sterling muvozanatni tikladi, jarohat tufayli besh oydan buyon o‘ynamagan Jyeyms esa Jyeksonning boshini mo‘ljallab, ideal uzatma berdi. Parallel uchrashuvda «Luton» «Vest Hem» bilan o‘yinda g‘alabani qo‘ldan chiqardi va «Nottinghem»ning yo‘qotishidan foydalana olmadi, ushbu jamoalar o‘rtasidagi farq uch ochkoligicha qolmoqda. So‘nggi turda «Luton» «Fulhem»ni qabul qiladi, «Nottinghem» «Byornli» mehmoni bo‘ladi.
«Chelsi» esa yevrokuboklar yo‘llanmasi uchun imkoniyat saqlab qolmoqda. Va jamoa bunga haqli. Boxing day’dan keyin ko‘klardan (35 ochko) faqat APLning kuchli uchligi vakillari — «Manchester Siti», «Arsenal» va «Liverpul» ko‘proq ochko jamg‘argan. «Chelsi» oltinchi o‘ringa ko‘tarilib olishi ham mumkin. Hozirda ochkolar teng holatida faqat qo‘shimcha ko‘rsatkichlar evaziga «Nyukasl»dan ortda qolmoqda va ko‘p narsa chorshanba kuni o‘tkaziladigan qoldirilgan o‘yinlarda hal bo‘ladi. «Qarg‘alar» shu kuni «MYu» mehmoni bo‘ladi, «Chelsi» esa Braytonda o‘ynaydi.
Bu o‘yinda ikki jamoada ham deyarli hech qanday motivatsiya yo‘q edi. «Real» allaqachon chempion bo‘lib ulgurgan, «Granada» esa «Malyorka»ning g‘alabasidan keyin quyi ligaga tushib ketishi aniq bo‘lgandi. Shu tufayli Karlo Anchelotti «Bavariya»ga qarshi o‘yinda boshlang‘ich tarkibda tushgan futbolchilardan o‘n nafarini almashtirib, shu kuni tug‘ilgan kunini nishonlagan Kurtuani darvozaga qo‘ydi. Va o‘yin boshida belgiyalik futbolchi uchun yetarlicha ish topildi. Epizodlardan birida u jarima maydonini tark etib, himoyachilarni sug‘urtalashiga to‘g‘ri keldi, to‘pga bosh bilan o‘ynagan Tibo inersiya bo‘yicha harakatlanib, raqib futbolchisiga borib urildi.
Mezbonlar «Real» uchun chempionlar yo‘lagi hosil qilishdi
Bu to‘qnashuvda Yujvyak jarohatlandi. Birinchi bo‘lim oxiriga borib «Real» o‘z odatiga ko‘ra o‘yinni kuchaytirdi va bir necha daqiqa ichida mezbonlarni nokautga uchratdi. Ikki holatda ham Fran Garsiya diqqat markazida bo‘ldi. Qadrdon klubiga qaytganidan keyingi ilk golini u Braim Diasning uzatmasi va Modrich to‘pni o‘tkazib yuborishi orqali urdi, keyin esa ushbu himoyachining o‘zi Arda Gulerga assistentlik qildi. Rotatsiya futbolchisi uchun yomon natija emas. E’tiborli jihati, qaymoqranglilar jamoasi himoyachilari la ligada olti yildan buyon, Serxio Ramosdan keyin bir o‘yinda «gol plyus pas» natijasiga erishmagandi.
Ammo baribir o‘yinning mutlaq qahramoni — Dias bo‘ldi. Ikkinchi gol urilgan hujumni ham u boshlab bergandi, ikkinchi bo‘limda esa navbatdagi shedevrni ijro etdi. Bir harakat bilan ikki himoyachini yo‘ldan oldi, ikkinchi harakatda yaqin burchakni aniq nishonga oldi. Ko‘p o‘tmay jarima maydoni ichida o‘girilib olib yana bir zarba berib navbatdagi golini urdi. «Real» yirik hisobda g‘alaba qozonishdan tashqari, bir chempionatdagi «quruq» o‘yinlar soni bo‘yicha rekordni takrorladi. Darvoza daxlsizligi saqlab qolingan o‘yinlar soni 19 taga yetdi, bunda barcha uch darvozabon — Lunin (10), Kepa (7) va Kurtua (2) o‘z hissalarini qo‘shishgan. Yana ikki tur qolgani inobatga olinsa, klub rekordi yangilanishini kutish mumkin. Bu o‘yinlar «Alaves» va «Vilyarreal»ga qarshi kechadi.
«Napoli» yevrokuboklar yo‘llanmasi uchun umidlarini o‘z qo‘llari bilan ko‘mdi. Amaldagi chempionlar 7 apreldan buyon g‘alaba qozonmayapti, o‘tgan davrda jamoa ikki bor mag‘lub bo‘lib, uch o‘yinda durang qayd etgandi. Bunday tarqoq holatdagi jamoa «Bolonya» qarshisida ojiz qolishi muqarrar edi, Tiago Motta shogirdlari buni isbotlab, 12-daqiqaga qadar ikki gol urishdi. Finishga ikki tur qolganida 67 ochko to‘plagan jamoa uchinchi o‘ringa ko‘tarildi. Bundan ko‘proq ochko 1963/64 yillardagi chempionlik mavsumida to‘plangandi. Bu safar tutul bo‘lmaydi, ammo kuchli to‘rtlikdagi o‘rin «Bolonya»ni Chempionlar ligasiga yanada yaqinlashtirdi, «Napoli» esa bu mag‘lubiyatdan keyin yakshanba kuni o‘ynaydigan «Fiorentina»ni oldinga o‘tkazib yuborib, to‘qqizinchi o‘ringa tushishi mumkin.
«Milan» ham anchadan buyon muxlislarini xushnud etmagandi. Aniqroq aytilsa — 6 apreldan buyon, o‘shanda jamoa mavsum oxirini munosib o‘tkazib qo‘yishi kutilayotgandi. Rossonerilar o‘shanda yetti g‘alabadan iborat seriya qayd etishgandi, ammo shundan keyin futbolchilar bo‘shashib ketdi. Yevropa Ligasi tark etildi, ichki chempionatda to‘rt bor durang o‘ynab, ikki mag‘lubiyat qabul qilib oldi. Muxlislar faqat Chempionlar ligasining keyingi mavsumi yo‘llanmasi hal qilingani bilan ovunishi mumkin. Ammo fanatlar norozi. O‘tgan turda «Jyenoa»ga qarshi kechgan o‘yinda (3:3) ashaddiy muxlislar tribuna jim o‘tirdi, faqat Rafael Leau almashtirayotganida hushtakbozlik qilindi, o‘yin yakuniga 10 daqiqa qolganida esa sektor bo‘shab qolgandi.
Muxlislar aniq rivojlanish dasturi hamda transferlar bozorida faollikni talaba qilishmoqda, ammo bu masalalarda o‘zgarish kuzatilmayapti va shanba kungi o‘yinda ham norozilik aksiyasi davom ettirildi. Shu tufayli Binnosir mavsumdagi ilk golini sukutga cho‘mgan tribunalar o‘rtasida urdi. Ammo ikkinchi bo‘lim qizg‘inroq kechdi. Bu asosan mehmonlarning faolligi va ayniqsa Shomurodov tufayli. Natijada Leaudan mas’uliyatni qo‘lga olish talab etildi va aynan u avvaliga to‘pni to‘singa tekkizdi, keyin Pulishichni darvozabon bilan yakkama-yakka vaziyatga chiqarib yubordi.
Shuning uchun mehmonlarning haqli goli hisobni tenglashtirmadi, shunchaki qisqartirdi. Ammo ularga muvaffaqiyatni rivojlantirishga yo‘l qo‘yilmadi. Reyndersning uzoq masofadan yo‘llagan zarbasi ideal ijro etildi va o‘yin masalasini amalda hal qildi. Shu kuni Onalar kuni munosabati bilan o‘z volidalarining qizlik familiyasida chiqqan «Milan» futbolchilari bir oylik tanaffusdan keyin muxlislarga g‘alaba tortiq etishdi. Lekin o‘yin asabbuzarliklarsiz kechmadi, Sportiyelloning seyvlari va Shomurodovning zarbasidan keyin to‘p to‘sindan qaytishi mezbonlarni goldan saqladi. Qolgan vaqt davomida Leauning o‘zi ham gol urdi, Pulishich dublni rasmiylashtirib, mavsumdagi 12-golini nishonladi, u jamoa yarimhimoyachilari orasida Kaka davridan buyon eng sermahsul futbolchi bo‘lmoqda.
«Mayns» – «Borussiya» D 3:0
Gollar: 1:0 – 12 Barreyro, 2:0 – 19 Li Je Son, 3:0 – 23 Li Je Son.
«Mayns» – Tsentner, Vidmer (da Koshta, 77), Hanche-Olsen, van der Berg, Kor, Kasi (Fernandesh, 76), Li Je Son (Rixter, 87), Amiri, Barreyro, Gruda (Vayper, 87), Burkardt.
«Borussiya» D – Mayyer, Zyule, Shlotterbek, Morey (Matsen, 46), Roys, O‘zjan (Brandt, 46), Nmecha (Polmann, 69), Volf, Malen (Sancho, 46), Bayno-Gittens (Veten, 76), Mukoko.
Ogohlantirishlar: Roys (41), Hanche-Olsen (45+1), Barreyro (56), Shlotterbek (80).
Germaniya Chempionlar ligasida qo‘shimcha beshinchi yo‘llanmani qo‘lga kiritishi yaqin vaqtgacha to‘rtinchi o‘rin uchun kurash olib borgan «Leypsig» va «Borussiya»ni mavsum yakunida ishtiyoqsiz qoldirdi. «Ho‘kizlar» jamoasi uyda baribir «Verder» bilan o‘yinda qatorasiga oltinchi o‘yinda gol urgan Sheshkoning sa’y-harakatlari bilan mag‘lubiyatdan qutulib qolishni uddalagan bo‘lsa, «asalarilar» barcha hissiyotlarni Parijda qoldirib kelgani ma’lum bo‘ldi. Qolaversa, Edin Terzich «PSJ» bilan o‘yinda g‘olib bo‘lgan futbolchilarning deyarli barchasini almashtirdi, faqat Shlotterbek ilk daqiqalardan maydonda edi. Bir tur oldin amalga oshirilgan shunday rotatsiya dortmundliklarga «Augsburg» ustidan yirik g‘alaba (5:1) keltirgandi. Endi esa «Borussiya» birinchi bo‘lim o‘rtalariga kelib «Mayns»dan uchta gol qabul qilib oldi. Bunda mezbonlardagi motivatsiya ham rol o‘ynadi, jamoa «Union»ni quvib o‘tdi va «o‘tish bahslari»dan qutulib qoldi. Bo Henriksenning ishini ham e’tirof etish kerak. U bosh murabbiylikka fevral oyi o‘rtalarida tayinlangandi, shundan buyon «Mayns» bundesligada uy uchrashuvlarida eng ko‘p ochko to‘plagan jamoa bo‘ldi — yetti o‘yinda 17 ochko.
Kun statistikasi
«Nyukasl» APLga asos solinganidan buyon 1-marta barcha 19 uy uchrashuvida gol urishga erishdi.
Portugaliyada chempionlikni naqd qilib ulgurgan «Sporting» klubning 2 ta rekordini yangiladi — bir turnirdagi g‘alabalar soni (28) va to‘plangan ochkolar soni (87) bo‘yicha.
«Sporting» hujumchisi Paulinio faoliyatida 3-marta bir mavsumda 20 dan ortiq gol urdi, u bu ishni turli klublarda amalga oshirgan — avvalroq «Braga» va «Jil Visente» safida.
«Sheffild Yunayted» tarixda 4-marta va 1978 yildan buyon ilk bor mavsumdagi birorta safar uchrashuvida darvozasi daxlsizligini saqlay olmadi.
«Manchester Siti» safida ispaniyalik yarimhimoyachi Rodri tushganida 48 o‘yindan buyon yutqazmayapti (39+9). Bu APL tarixidagi eng yaxshi ikkinchi ko‘rsatkich, bu boradagi rekordchi esa «Arsenal»ning sobiq himoyachisi Sol Kempbelldir, u 2002 yildan 2004 yilga qadar bo‘lgan davrda 56 o‘yinlik seriya o‘tkazgan.
Mavsum yakunlariga ko‘ra yuqoriga ko‘tarilgan «Holshtayn Kil» bundesliga tarixidagi 58-jamoaga aylandi.
