Istanbulda 4 qavatli turar joy binosi qulab tushdi

Istanbulning g‘arbiy qismida 4 qavatli turar joy binosi qulab tushdi. Hodisa oqibatida bir kishi halok bo‘lib, 8 kishi jarohatlangan.

Kuchukchekmejye tumanida joylashgan bino yakshanba kuni mahalliy vaqt bilan ertalab soat 8:45 da qulagan. Hodisa sabablari aniq emas, portlash yoki seysmik faollik belgilari kuzatilmagan.

Voqea joyiga kelgan shahar meri Dovud Gul vayronalar ostidan 7 kishi chiqarib olinganini aytdi. Keyinroq meriya yana bir kishi qutqarilgani, 1 kishining jasadi topilganini ma’lum qildi.

Bino bundan 36 yil avval qurilgan bo‘lib, uning yuqori ikki qavatida odamlar yashagan, pastki ikki qavatida esa tadbirkorlar faoliyat yuritgan.

Atrof-muhit, urbanizatsiya va iqlim o‘zgarishi vaziri Mehmet O‘zhasekining so‘zlariga ko‘ra, bino qurib bitkazilgach, uning ustiga bir qavat qo‘shimcha noqonuniy qurilish qilingan. Birlamchi tekshiruvlarda bino arxitektura-muhandislik standartlarini buzgan holda qurilgani, qurilishda dengiz qumi ishlatilgani aniqlangan.

Voqea Istanbuldagi uy-joylarning zilzilaga bardoshliligi bo‘yicha xavotirlarni kuchaytirdi. O‘tgan yili fevralda Turkiya va Suriya hududlarida ro‘y bergan 7,8 magnitudali zilzila va ko‘plab aftershoklar oqibatida Turkiyada 53 mingdan ortiq, Suriyada 6-8 ming atrofida qurbonlarga olib kelgandi.

Bu halokatli zilziladan keyin Istanbulda “istalgan daqiqada” qulab tushishi mumkin bo‘lgan uylarni buzish boshlangan edi. Shahar meriyasiga ko‘ra, gap 10 ming kishi istiqomat qilayotgan 318 ta bino haqida ketyapti. Yana 1,5 mingta turar joy yuqori xavf guruhiga kiritilgan.

16 milliondan ortiq aholi yashaydigan Istanbul shahri Shimoliy Anadolu tektonik plita yorig‘i yaqinida joylashgan. 1999 yildagi zilzilada Istanbulda 18 mingdan ortiq odam halok bo‘lgan.