Parij-2024. Rashitov ishtirokini boshlaydi, Do‘smatov oltin uchun ringga chiqadi

8 avgust kuni, Parij olimpiadasining 13-kunida O‘zbekistondan sakkiz nafar sportchi baydarka va kanoeda eshkak eshish, sport kurashlari, boks, zamonaviy beshkurash, taekvondo va badiiy gimnastika bo‘yicha musobaqalarda ishtirok etadi.

Badiiy gimnastika

Soat 13:00 da Osiyoning ko‘p karra chempion va Osiyo o‘yinlarining ikki karra chempioni, 20 yoshli Taxmina Ikromova ko‘pkurash bo‘yicha dasturda chiqish qiladi.

Taekvondo

Soat 13:35 da Tokioda O‘zbekiston tarixidagi eng yosh olimpiya chempioni bo‘lgan, jahon chempionatida bronza medalni qo‘lga kiritgan 22 yoshli Ulug‘bek Rashitov -68 kg vazn toifasida 1/8 finalda ishtirok etadi. Uning ilk raqibi kim bo‘lishi hozircha aniq emas.

Kanoye

Soat 13:50 da 2017 yilgi Osiyo chempioni, 2019 yilgi jahon chempionati va 2023 yilgi Osiyo o‘yinlarida bronza medali sohibi bo‘lgan, 27 yoshli Nilufar Zokirova 200 metr masofadagi bahslarda ishtirok etadi. Saralashda unga Kanada, Nigeriya, Ispaniya, Senegal, Rossiya va Moldovadan kelgan sportchilar raqiblik qiladi.

Parijdagi Olimpiada uning faoliyatidagi ikkinchisi bo‘lmoqda.

Erkin kurash

Soat 14:35 da 2017 yildan buyon xalqaro musobaqalarda O‘zbekiston nomidan ishtirok etib kelayotgan 27 yoshli dog‘istonlik atlet Jabrail Shapiyev (-86 kg) 23 yoshli gurjistonlik Vladimir Gamkrelidzega qarshi gilamga chiqadi, bu raqib jahon vitse-chempioni va Yevropa chempionati bronza medali sohibidir.

Shapiyev esa Osiyo vitse-chempioni va Osiyo o‘yinlari bronza medali sohibi hisoblanadi, u Tokiodagi o‘yinlarda beshinchi o‘rinni egallagan.

Soat 14:56 da 1/8 finalda 25 yoshli G‘ulomjon Abdullayev (-57 kg) ozarboyjonlik Yevropa chempioni (2023), yoshlar o‘rtasida jahon chempioni (2021) Aliabbos Rizazodaga qarshi gilamga chiqadi.

Zamonaviy beshkurash

Soat 17:30 da 34 yoshli Alise Faxrutdinova beshkurash bo‘yicha saralash bosqichida (konkur, qilichbozlik, o‘q otish, yugurish, suzish) ishtirokini boshlaydi.

Alise Faxrutdinova 1990 yilda Moskvada tug‘ilgan. 2019 yildan buyon xalqaro musobaqalarda O‘zbekiston sharafini himoya qilib keladi. U joriy yilda Osiyo chempionatida mikst dasturida bronza medalni qo‘lga kiritgan. Tokio Olimpiadasi ishtirokchisi sanaladi.

Boks

9 avgustga o‘tar kechasi (soat 00:30) O‘zbekistonning olimpiadadagi bayroqdori, 24 yoshli Abdumalik Halokov (-57 kg) yarimfinalda avstraliyalik 22 yoshli Charli Seniorga qarshi ringga ko‘tariladi. Halokov jahon, Osiyo va Osiyo o‘yinlari chempioni sanaladi, uning raqibi Tinch okeani o‘yinlarida chempion bo‘lgan.

Soat 1:34 da esa 2016 yilgi Olimpiada chempioni, jahon chempioni, uch karra Osiyo  chempioni Hasanboy Do‘smatov (-51 kg) finalda fransiyalik 26 yoshli Bilol Bennama bilan jangini boshlaydi. Fransiyalik bokschi jahon chempionatlarida ikki karra bronza sohibi, Yevropa o‘yinlari chempioni, Yevropa chempioni sanaladi. Do‘smatov o‘tgan yili Toshkentdagi jahon chempionatida ushbu raqibni nokautga uchratgandi.