Donald Tramp Fransiya prezidenti Emmanuel Makronning Ukraina bo‘yicha tinchlik kelishuvi shartlari va istiqbollarini muhokama qilish uchun Vashingtonga amalga oshirgan tashrifining birinchi kuni yakunlariga ko‘ra matbuot anjumani o‘tkazayotganida, Rossiyada kechqurungi soat 22:00 edi. Ammo Vladimir Putin shu mahalda hukumat a’zolari bilan nodir yerosti metallari bo‘yicha yig‘ilish boshladi.
Undan keyin esa Putin VGTRK muxbiri Zarubinga 20 daqiqalik intervyu berib, unda Rossiya va Ukraina o‘rtasidagi harbiy mojaroning Amerika tomonidan hal qilinishi bo‘yicha «trek»ni izohladi. Shuningdek, u Tramp ma’muriyatiga bir vaqtning o‘zida ko‘plab «kapital talab qiladigan» takliflar berdi.
«Biz amerikalik hamkorlarga, nafaqat hukumat tuzilmalariga, balki kompaniyalarga ham, agar ular birgalikda ishlashga qiziqish bildirsa, taklif bildirishga tayyormiz. Bizda bunday turdagi resurslar (nodir yerosti boyliklari — «Novaya») Ukrainadagiga qaraganda bir necha baravar ko‘p. Ular bizda shimolda ham, Murmanskda ham, Kavkazda ham, Kabardin-Bolqorda ham, Uzoq Sharqda ham, Irkutsk oblastida ham, Yoqutistonda ham, Tivada ham bor. Bu yetarlicha kapital talab qiladigan investitsiyalardir».
U mamlakatlar hamkorlikda alyuminiy ishlab chiqarishi mumkinligini aytdi: «Biz bu sohada Amerika kompaniyalari bilan hamkorlik qilish haqida o‘ylashimiz mumkin. Masalan, sovetlar davrida Krasnoyarsk o‘lkasida yangi GES qurish va qo‘shimcha alyuminiy ishlab chiqarish quvvatlarini yaratish rejalari bor edi», — dedi u .
Rossiya prezidentining ta’kidlashicha, ushbu loyiha «investitsion» bo‘lishi mumkin. «Dastlabki hisob-kitoblarga ko‘ra, u bugungi narxlarda taxminan 15 milliard dollarga tushadi yoki turadi. Lekin biz bu haqda o‘ylab ko‘rishimiz mumkin», — deb tushuntirdi u.
Rossiya Federatsiyasidagi nodir metallar haqida gapirarkan, Putin bugungi kunda mamlakatda ularni o‘zlashtirish bo‘yicha yetarli ishlar qilinmayotganini tan oldi. «Nodir, noyob tuproq metallari iqtisodiyotning zamonaviy tarmoqlari uchun juda muhim tarkibiy qism, juda muhim manba hisoblanadi. Va biz hozircha bu yo‘nalishda kam ish qilyapmiz. Biz ko‘proq ish qilishimiz kerak», — dedi u.
Shuningdek, Putin amerikaliklarga Rossiya «maxsus harbiy amaliyot» boshlanganidan keyin qo‘shib olingan «yangi tarixiy hududlar»dagi konlarni ham birgalikda o‘zlashtirishni taklif qilgan.
(Tramp shu kungi matbuot anjumanida bu hududlarni Ukrainaga qaytarish oson bo‘lmasligini, lekin — «voqealar rivojiga qaralishi»ni aytgandi.)
