Italiyada mavsumning markaziy o‘yini, «Real» va «Atletiko» uchun qiyin sinov. Hafta o‘yinlari anonsi

NAPOLI – INTeR (1 mart, 22:00)

Uzoq yillik tanaffusdan so‘ng «Inter»ni mamlakat chempioniga aylantirgan Antonio Konte endi «Napoli» boshida turib sobiq jamoasiga qarshi chempionlik bahsini o‘tkazadi. Romelu Lukaku ham sobiq jamoasiga qarshi. Umuman olganda, bu o‘yinda mana shunday qo‘shimcha intrigalar olib kelish ham shart emas, zero bizni tom ma’noda chempionlik bahsi kutib turibdi. «Inter» 57 ochko bilan jadvalni boshqarib kelayotgan bo‘lsa, «Napoli»da bir ochko kam, ya’ni g‘alaba qozonib yakka peshqadamga aylanishi mumkin. Durang ham har ikki jamoani qoniqtirmaydi, chunki u holda ayni paytda 54 ochkoga ega bo‘lgan «Atalanta» ham maksimal darajada yaqinlashib kelishi mumkin. «Atalanta» ikki hafta o‘tib «Inter»ni qabul qilishini ham unutmaslik lozim.

Bulardan tashqari, chempionlik kurashda milanliklar uchun yana bir noqulaylik borki, ayni damda pozitsiyani boy berish zinhor kerak emas. Sababi, «Inter» Chempionlar Ligasida kurashni davom ettirmoqda, bu o‘yindan uch kun o‘tib ham «Feyyenord» bilan muhim uchrashuv kutib turibdi. «Napoli» va «Atalanta» esa yevrokuboklarda emas, bor imkoniyatini A Seriya chempionligiga qaratish imkoniyatiga ega. Buning ustiga Italiya kubogida ham yarimfinalda aynan «Inter» bo‘lib, raqobatchilari bu turnirdan ham chiqib ketishgan. Ya’ni shu shartlarda ham «Inter» sovrin uchun kurashda so‘nggi turlargacha bora olsa, juda katta matonat ko‘rsatgan bo‘ladi.

Jarohatlarga to‘xtaladigan bo‘lsak, mehmonlar darvozasini Yan Zommer qo‘riqlay olmaydi, jarohat olgan. Ammo so‘nggi ikki o‘yinda Xosep Martines o‘zini juda yaxshi ko‘rsatayotganini ham ta’kidlash kerak. «Jyenoa» va «Latsio»ga qarshi o‘yinlarda milanliklar darvozasini qo‘riqlagan ispaniyalik darvozabon hali birorta ham gol o‘tkazib yubormadi, «Latsio» bilan o‘yinda esa eng yaxshi deb topildi. Shuningdek, Darmian, Zelevski va Augusto mehmonlar safida o‘ynay olmasa, «Napoli» murabbiyi Andre Zambo-Angissaning yordamidan foydalana olmaydi. David Neresda ham jarohat bor.

O‘zaro o‘yinlarga to‘xtaladigan bo‘lsak, tenglikni ko‘ramiz – oxirgi 36 o‘yinda har ikki tomonda 12 tadan g‘alaba va shuncha o‘yin durang bilan yakunlangan. Eng oxirgi ikki o‘yin ham bir xil 1:1 hisobida bilan yakunlanganini ham ta’kidlash lozim. A Seriyadagi statistik ko‘rsatkichlarga e’tibor bersak, har ikki jamoa asosan himoyadagi o‘yini bo‘yicha ham yetakchilik qilayotganini ko‘ramiz – eng kam o‘tkazib yuborish bo‘yicha ham, quruq o‘yinlar borasida ham bu jamoalar kuchli uchlikda bormoqda. Ammo bu fakt ushbu o‘yinning zerikarli va himoyaviy o‘tishidan dalolat qilmasligini ham aytgan bo‘lardik. Masalan, «Inter»ning himoyaviy ko‘rsatkichlari yuqori bo‘lgan boshqa bir jamoa «Yuventus»ga qarshi o‘yinida gollar kam urilgan bo‘lsa-da, juda hujumkor va qiziqarli o‘yin guvohi bo‘lgandik.

BeTIS – ReAL MADRID (1 mart, 22:30)

Kuchli beshlikda chempionlik intrigasi aynan Italiya va Ispaniyada avjiga chiqayotganini ko‘rib turibmiz. Angliya, Fransiya va Germaniyada peshqadam yetarlicha farq bilan oldinlab, bu masalaga amalda nuqta qo‘yishgan bo‘lsa, bu ikki chempionatda sovrin uchun ikkidan ortiq jamoa kurashayotgani ham e’tiborga loyiq. Ispaniyada chempionlik uchun kurashayotgan uchala jamoa ham Chempionlar Ligasida ham kurashni davom ettirayotgani esa raqobatning yanada yuqoriroq saviyada kechayotganini ko‘rsatib turibdi. Ispaniyada avval ham kurash bo‘lgan, sovrindorlar almashib g‘olib bo‘lganini ham ko‘rib kelyapmiz, ammo ko‘pincha jamoalardan birida muammolar bo‘lar, ikkinchisi foydalanib qolardi. Ammo bu mavsum boshqacha kechmoqda. Bemalol aytish mumkinki, ham «Real» hamda «Barselona» ayni paytda ancha yuqori formada va nafaqa Ispaniya, balki Yevropaning eng kuchli jamoasi bo‘lish uchun asosiy favorit bo‘lib turishibdi.

«Betis»ga qarshi o‘yin «Real» uchun navbatdagi og‘ir sinov bo‘lishi shubhasiz. Jamoa turnir jadvalida qaysi o‘rinni egallab turganidan qat’i nazar, Andalusiyada hech kimga oson bo‘lmasligini yaxshi bilamiz. Aynan «Real» tashrif buyurgan oxirgi 6 o‘yinni olsak ham uch marta durang qayd etilgan bo‘lsa, uch marta «Real»ning minimal g‘alabasi bilan tugagan. Bu orada «Betis» ham Madridda bo‘sh kelmaganini ko‘rishimiz mumkin – oxirgi 7 o‘yinning 4 tasida mag‘lubiyatga uchramaslikni uddalashgan. Ikki marta uch ochko bilan qaytishgan. Betisdagi oxirgi o‘yin esa o‘tgan mavsumda 1:1 durang bilan yakunlangandi.

«Real»ga qarshi muvaffaqiyatli natijalardan tashqari, «Betis» o‘zi so‘nggi o‘yinlarda yaxshi formaga kirib olganini ham ta’kidlash kerak. La Ligadagi oxirgi 4 o‘yindan uchtasini g‘alaba bilan yakunladi, Konferensiyalar kubogida keyingi bosqichga chiqdi. Bu natijalar «Sosedad», «Atletik» kabi kuchli bask jamoalariga qarshi qo‘lga kiritilganini ham ta’kidlash lozim.

Bu yuksalishni qaysidir ma’noda tarkibga Antonining kelib qo‘shilishi bilan ham bog‘lashmoqda. Braziliyalik vinger Angliyadagi muvaffaqiyatsiz yillaridan so‘ng go‘yoki erkinlikka chiqqandek, «Ayaks»dagi davrlarini esga solib yuboryapti. Qisqa muddatda u allaqachon 3 gol va 2 assistni amalga oshirib ulgurdi. Ha, qizil kartochka ham oldi, aytgancha. Qizig‘i, aynan shu kartochka tufayli u «Real»ga qarshi o‘yinni o‘tkazib yuborishi kerak edi. Ammo ushbu kartochka yuzasidan shikoyat kiritilgach, Liga «Betis»ning talabini qondirib, diskvalifikatsiyani bekor qildi. Xuddi shunday holat «Real»da ham bor – Jud Bellinhem qizil kartochka tufayli Ispaniya chempionatidagi navbatdagi o‘yinlardan chetlatilgan. Ammo madridliklarning shikoyati o‘rinsiz deb topildi va u «Betis»ga qarshi o‘yinda maydonga tusha olmaydi.

«Real»da Bellinhemdan tashqari yana ikkita jiddiy yo‘qotish bor. Federiko Valverde va ayniqsa, so‘nggi paytlarda ancha yuqori darajadagi o‘yin ko‘rsatib, markazda katta xajmdagi mehnatni amalga oshirib kelgan Sebalos. U nafaqat ushbu o‘yin balki keyingi haftalarda ham jamoasiga yordam bera olmaydi. «Real»ni esa kelasi haftadayoq «Atletiko»ga qarshi Chempionlar Ligasi nimchorak finali kutib turibdi. «Betis»ning ham Konferensiya kubogida o‘yini bor, ammo raqib – Portugaliyaning «Gimarayesh» klubi. Ya’ni ispanlar bemalol bu bosqichdan o‘tishlari mumkin.

Darvoqe, «Betis»da ham ushbu o‘yin uchun yo‘qotishlar bor. Ayniqsa, Jovanni le Chelso, hamda «Sosedad» darvozasiga dubl qayd etgan Mark Rokaning yo‘qligi sezilsa kerak. Yana bir fakt, «Real» turnir jadvalida peshqadamlar safida borsa-da, aynan safar o‘yinlarida doim ham ishonchli ko‘rinmayotganini ta’kidlab o‘tish kerak. Anchelotti jamoasi safardagi 13 o‘yinning yarmidan ko‘pida g‘alaba qozonishning uddasidan chiqmagan. Bu ham «Betis» uchun qo‘shimcha imkoniyat borligini anglatadi.

ATLeTIKO – ATLeTIK (2 martga o‘tar kechasi, 01:00)

Doim Ispaniyada uch jamoa chempionlik uchun kurashayotganini, «Atletiko» esa «Real» – «Barselona» fonida biroz soyada bo‘lib, yakunda uloqni ilib ketishi mumkinligi haqida gaplar ko‘p. Sababi, natijalar bo‘yicha madridliklar eng barqarorlardan biri, tarkib kengligi, zaxiradagilarning natijalarga ta’siri bo‘yicha ham raqiblaridan ustun, bu esa hal qiluvchi pallada ancha yordam beradi. Keyin taxminlarga ko‘ra Chempionlar Ligasida «Atletiko» katta ehtimol bilan «Real»ga boy berishi mumkin, bu esa Simeone jamoasiga bor kuchini Ispaniya chempionatiga tashlash imkonini beradi. Shunaqa gaplar.

Lekin eng qizig‘i, chempionlik poygasidagi mana shu uch jamoa fonida ham soyada ketayotgan yana bir klub bor – «Atletik». Tasavvur qiling, bilbaoliklar mavsumni bir tekisda va juda zo‘r o‘tkazayotgandek ko‘rinayotgan uch jamoadan atigi 6 ochkoga ortda boryapti xolos. Jamoa mavsum davomida atigi uch marta mag‘lubiyatga uchragan, oxirgi 17 o‘yinda esa umuman yutqazgani yo‘q. Bu natijalar bir necha frontda kurashib turib ham qo‘lga kiritilayotgani Valverdeni maqtash uchun katta asos. «Atletik» ham Ispaniya Superkubogida qatnashib keldi, ham Yevropa Ligasida dastlabki bosqichida eng yaxshi jamoalardan bo‘lib, «MYu», «Tottenhem», «Ayntraxt» kabi bir qator kuchli jamoalarni ortda qoldirib, umumiy jadvalda 2-o‘rinni egalladi. Kelasi haftada esa bilbaoliklarni «Roma»ga qarshi pley-off o‘yini kutib turibdi.

Yuqorida aytilganidek, «Atletik» atigi uch marta mag‘lubiyatda uchragan. Ikki marta Kataloniyada, «Barselona» va «Jirona» bilan o‘yinlarda. Shuningdek, o‘z maydonida aynan «Atletiko»ga qarshi o‘yinda basklar imkoniyatni boy berishgan. O‘yin aslida ancha teng kurashlar ostida kechgani, uchrashuv taqdirini hal qilgan yagona gol esa qo‘shib berilgan daqiqalarda urilganini ham eslasangiz kerak. Umuman olganda, «Atletik» o‘z maydonida o‘yinlarda madridliklarni ko‘p xafa qilib turadi. Aynan Madridda o‘tgan uchrashuvlarni oladigan bo‘lsak, ha, bu yerda bilbaoliklarning natijalari zo‘r emas – oxirgi g‘alaba 2011 yilda qo‘lga kiritilgan. Ammo bir yil oldin «Atletik» Qirollik kubogida raqibiga qarshi muvaffaqiyatli o‘yin ko‘rsatgan, o‘z maydonida 3:0, Madridda esa 1:0 hisobida ustun kelgandi.

Jarohatlarga kelsak, mezbonlar safida deyarli yo‘qotishlar mavjud emas. Simeone shogirdlarining mavsumda turli jarohatlarni chetlab o‘tayotganining sababi ham ko‘p keltirilgan – murabbiy darajasi bir-biriga yaqin bo‘lgan ko‘p futbolchilarga ega va u rotatsiyadan unumli foydalanmoqda. O‘yinchi almashtirishlar ham ancha erta amalga oshirilishi tufayli bosim va yuklamalar ham ko‘p futbolchilarga teng taqsimlanmoqda. Balki mana shu ham «Atletiko»ning haligacha raqobatbardosh bo‘lib o‘zi qatnashayotgan barcha turnirlarda g‘oliblik uchun kurashayotganining asosiy omili bo‘lishi mumkin. Aynan ushbu o‘yinda faqat Kokeda kichik jarohat bor va u sheriklariga yordam bera olmaydi. Mehmonlar safida esa Oyan Sansetning o‘yinda qatnasha olmaslik ehtimoli jiddiy yo‘qotish hisoblanadi. Zero 24 yoshli hujumchi oxirgi o‘yinlarda ancha formaga kirgan, so‘nggi 4 uchrashuvda 6 bor raqiblar darvozasini ishg‘ol qilgandi.

NYuKASL – BRAYTON (2 mart, 18:45)

Angliyada bu hafta tur o‘yinlari o‘tkazilmaydi, Angliya kubogi nimchorak final uchrashuvlari bo‘lib o‘tadi. Afsuski, bir qator top-jamoalar turnirni ertaroq tark etishdi, kurashda klassik top-6 dan faqat so‘nggi ikki mavsum finalchilari «MYu» va «Manchester Siti» qoldi xolos. Ammo ta’kidlash kerakki, ayni paytda Angliyada juda ko‘p qiziqarli va aynan kubokbop jamoalar bor. Bu shunday jamoalarki, ancha yildan beri u yerda juda yaxshi, to‘g‘ri ishlar amalga oshirilayotganini ko‘rasiz, ularning kuchli raqiblarga qarshi juda kuchli performansini, o‘z uslubidan voz kechmay, qattiq qarshilik ko‘rsatishining guvohi bo‘lasiz. Ammo ko‘pincha bu jamoalar ba’zida yetakchi futbolchilarini sotishga majbur bo‘ladi, hammasi boshqatdan boshlanishiga olib keladi. Mana shu orada, ya’ni jamoalar eng yuqori nuqtaga chiqqanda, hech bo‘lmasa biror sovrin yutib, tarixga muhrlanishini istab turasiz.

«Brayton», «Borntmut», «Nottingem», «Aston Villa» va albatta, ancha moliyaviy baquvvat bo‘lsa-da, «Nyukasl» shular jumlasidandir va bularning hammasi joriy mavsumdagi Angliya kubogida o‘z ishtirokini davom ettirishmoqda. Demak bemalol top-klublarga oson bo‘lmasligini va biz qatorasiga uchinchi yil finalda Manchester derbisini ko‘rmasligimizni bilib turgandeymiz. Mana shu sanalgan jamoalarning har qaysisi finalga munosib va «Uembli»da ulardan biri yoki hatto ikkitasini ham ko‘rishimiz ehtimoli kichik emas.

Tabiiyki, bunday ikki jamoaning o‘zaro to‘qnashuvi o‘ta qiziqarli kechadi. Har ikki jamoa yuqori o‘rinlar, xususan Chempionlar Ligasi yo‘llanmasi uchun kurashayotgan bo‘lsa-da, mana shunday kuboklar muxlislar uchun nimalarni bera olishini his qila olishadi. «Nyukasl» ikki yil oldin Liga kubogi finalida to‘p surgandi, ikki hafta o‘tib navbatdagi mana shunday finalda «Liverpul»ga to‘qnash keladi. Eddi Xau loyihasi nihoyat sovrinlar yutish pallasiga kirishi lozim. «Brayton» ham «Uembli»da to‘p surganiga uzoq vaqt bo‘lmadi – ikki yil oldin jamoa mana shu turnir yarimfinalida «MYu»ga qarshi to‘p surgan va faqat penaltilar seriyasida imkoniyatni boy berib qo‘ygandi.

Yana bir jihat, bu raqiblarning o‘zaro o‘yinlarida oldindan natijani yoki favoritni taxmin qilish deyarli imkonsiz ekani. Nafaqat o‘yin g‘olibi, balkim qaysi jamoa ustunlik ko‘rsatadi, o‘yin kimning tashabbusi ostida kechishini ham bilib bo‘lmaydi. Raqiblarning aynan Nyukaslda bo‘lib o‘tgan oxirgi 9 o‘yinini olsak ham mehmonlar uch marta, mezbonlar ham uch marta g‘alaba qozonishgan. Bu natijalar ichida mezbonlarning 4:1 hisobidagi yirik g‘alabasi ham, aksincha, «Brayton»ning javobsiz uch gol urgani ham bor – demak bu o‘yindan ham har narsani kutish mumkin.

Jarohatlanganlarga kelsak, tabiiyki, Joalintonning yo‘qligi «Nyukasl»ga har o‘yinda bilinmoqda. Jamoa APL doirasidagi oxirgi 4 o‘yinning uchtasida mag‘lub bo‘ldi va tabiiyki, maydon markazida braziliyalik yarimhimoyachining yo‘qligi o‘z ta’sirini o‘tkazmay qolmadi. Mehmonlarda esa yo‘qotishlar juda ko‘p va jamoa mana shu rejimda to‘p surishga o‘rganib ham qolgan. Dank, Veltman, Igor, Stil kabi futbolchilar hali tiklanishgani yo‘q. Kadio‘g‘li va Milnerning esa bu jamoaga tegishli ekani ko‘pchilikning yodidan chiqib ketdi ham.

BOShQA O‘YINLAR

1 mart. ATALANTA – Venetsiya (19:00), Sankt Pauli – BORUSSIYa D (19:30), Ayntraxt – BAYYeR (22:30), MANCheSTeR SITI - Plimut (22:45), PSJ – Lill (2 martga o‘tar kechasi, 01:05)

2 mart. BARSeLONA – Sosedad (20:15), MYu – Fulhem (21:30), ROMA – Komo (22:00), MILAN – Latsio (3 martga o‘tar kechasi, 00:45).