Istanbul viloyati gubernatorining keyingi to‘rt kun ichida ko‘chalarda aksiya o‘tkazishni taqiqlash to‘g‘risidagi buyrug‘i va shahar bo‘ylab ko‘p sonli politsiyachilar joylashtirilgani norozilik namoyishlari boshlanib ketishini to‘xtata olmadi.
Politsiya meriyani o‘rab olgan, yo‘llarning bir qismi va Taqsim markaziy maydoni to‘sib qo‘yilgan. Namoyishchilar shahar hokimiyati, Imomo‘g‘li saqlanayotgan politsiya bo‘limi, Istanbul universiteti va boshqa joylar yaqinida to‘plangan.
«Sodir bo‘lgan ish – to‘ntarishga urinish. Akrom Imomo‘g‘lining [prezidentlikka] nomzod bo‘lish erkinligi tortib olinmayapti, bu millatning uni saylash erkinligi tortib olinmoqda», – dedi Respublika xalq partiyasi yetakchisi O‘zgur O‘zel meriya binosi oldida yig‘ilganlar oldida so‘zlagan nutqida.
Merning rafiqasi Dilek Imomo‘g‘li uning hibsga olinishini «Turkiyaning bo‘lajak prezidentini yo‘q qilishga qaratilgan maqsadli siyosiy amaliyot» deb atadi. «Bu millatga to‘g‘ridan to‘g‘ri zarba va biz kurashamiz», – dedi u.
Dastlabki to‘qnashuvlar haqida xabarlar kelgan. Voqea joyidan olingan kadrlarga ko‘ra, politsiya Istanbul universiteti hududida Imomo‘g‘lining oliy ma’lumot to‘g‘risidagi diplomini bekor qilish qaroriga norozilik bildirgan talabalarni tarqatish uchun maxsus vositalardan foydalangan.
18 mart kuni Istanbul universiteti Turkiya prokuraturasi so‘roviga ko‘ra Imomo‘g‘lining 1995 yilda olgan diplomi bekor qilinishini ma’lum qildi. Bunga 1990 yilda Kipr shimolidagi xususiy universitetdan Istanbul universitetining biznes boshqaruvi fakultetiga o‘tishida yo‘l qo‘yilgan qonunbuzarliklar sabab qilib ko‘rsatilgan.
Bu ko‘pchilik tomonidan muxolifatchi merning navbatdagi prezidentlik poygasida ishtirok etishiga to‘sqinlik qilish uchun siyosiy sabab sifatida qabul qilindi. Chunki oliy ma’lumot to‘g‘risidagi diplom Turkiyadagi prezidentlik saylovlarida ishtirok etishning majburiy sharti hisoblanadi. Imomo‘g‘li universitet qarorini «yuridik jihatdan asossiz» va «akademik hayotga siyosiy aralashuvning xavotirli belgisi» deb atadi.
