«Turkiya ko‘chadan topib olingan emas»: Erdo‘g‘an yana mamlakatdagi mitinglarga qarshi chiqdi

Turkiya prezidenti Rajab Toyyib Erdo‘g‘an davlat ko‘cha terrorizmiga taslim bo‘lmaydi, chunki mamlakat «ko‘chadan topib olingan emas» dedi. Uning so‘zlariga ko‘ra, muxolifat turk xalqini politsiya xodimlari jarohatlangan namoyishlarda qatnashishga chaqirish orqali barqarorlikka tajovuz qilmoqda. Muxolifat yetakchisi O‘zg‘ur O‘zelning aytishicha, mitinglar davom etadi. Shuningdek, u xavfsizlik kuchlarini qurol va qalampir gazidan foydalanmaslikka chaqirdi.

Turkiya prezidenti Rajab Toyyib Erdo‘g‘an hukumat ko‘chalarda sodir bo‘layotgan terrorga ko‘z yummasligiga va’da berdi.

«Marginal guruhlarga ergashish, politsiyamizga hujum qilish, sudya va prokurorlarimizga tahdid qilish, demokratiya va milliy irodaga qarshi chiqish, noqonuniy va nodemokratik usullarga murojaat qilish orqali biz bu mamlakatda hech narsaga erisha olmaymiz. Turkiya ko‘chadan topib olingan davlat emas. Turkiya ko‘cha terrorizmiga taslim bo‘lmaydi», dedi Erdo‘g‘an.

Uning ta’kidlashicha, hukumat «Turkiyani terror qilish» urinishlariga va turk xalqining barqarorligiga qarshi hujumlarga toqat qilmaydi. Prezidentning aytishicha, mitinglarga chaqiruvlar boshi berk ko‘chadir. Erdo‘g‘anning so‘zlariga ko‘ra, bunday harakatlar noqonuniy hisoblanadi, ayniqsa namoyishlar chog‘ida politsiya xodimlari jarohat olsa. Uning ta’kidlashicha, tartibsizliklar korrupsiyaga qarshi operatsiya bahonasida yuzaga kelgan, shunda daromad olish va talonchilik sxemalari yashirin qoladi.

Muxolifatdagi Respublika xalq partiyasi raisi O‘zg‘ur O‘zel muxolifat namoyishlarni to‘xtatish niyatida emasligiga ishora qildi. Shuningdek, u xavfsizlik kuchlarini namoyishchilarga qarshi qalampir gazidan foydalanishni bas qilishga chaqirdi. Turk ommaviy axborot vositalari politsiya hatto rezina o‘qlardan ham foydalanayotganini da’vo qilmoqda, ammo rasmiylar ayblovlarni inkor etmoqda. Namoyishlar natijasida bir necha namoyishchi tibbiy yordam so‘rab murojaat qilgan, 16 nafar huquq-tartibot xodimi jarohatlangan.