Turkiyada namoyishlar taqiqlanganiga qaramay, Istanbul meri Akrom Imomo‘g‘lining korrupsiya va terrorchi guruhlarga yordam berishda ayblanib hibsga olinishi ortidan norozilik namoyishlari avj olmoqda. Imomo‘g‘li bilan birga tergov doirasida yuzdan ortiq kishi, jumladan siyosatchilar, jurnalistlar va tadbirkorlar hibsga olingan.
Namoyishlar 19 martdan beri Turkiyaning eng yirik shahri Istanbul va poytaxt Anqaradan tashqari, Izmir, Adana, Antalya, Chanoqqal’a, Eskishehir, Ko‘nya va Edirne shaharlarida ham bo‘lib o‘tmoqda.
Istanbul meri o‘zining X sahifasida Sarachhane hududidan olingan, behisob odam aks etgan videoni joylashtirdi.
Imomo‘g‘li qo‘lga olinishi u 2028 yilda bo‘lib o‘tadigan saylovlarda muxolifatdagi Jumhuriyat xalq partiyasidan prezidentlikka nomzod sifatida ko‘rsatilishidan bir necha kun oldin ro‘y berdi.
Mazkur partiya yetakchisi O‘zg‘ur O‘zelga ko‘ra, Istanbulda 300 mingga yaqin odam namoyishga chiqqan.
«Bu JXP mitingi emas, bu yerga shahar meri Imomo‘g‘li bilan birdamlik bildirish va demokratiyani himoya qilish uchun kelgan barcha partiyalardan odamlar yig‘ilgan», – dedi u shahar hokimiyati binosi oldida to‘plangan namoyish ishtirokchilariga.
U Erdo‘g‘an «mahkamani qurol sifatida ishlatib, Imomo‘g‘lining qo‘llarini qayirishga harakat qilayotgani»ni, ammo bunga yo‘l qo‘yilmasligi va Erdo‘g‘an bu norozilik namoyishlaridan qo‘rqayotganini ta’kidladi.
O‘zelning zo‘ravonlik qilmaslik va politsiya bilan to‘qnashuvga bormaslik haqidagi chaqiriqlariga qaramay, uning nutqi davomida namoyishchilar politsiya bilan to‘qnashdi, politsiya esa ko‘zdan yosh oqizuvchi gaz va plastik o‘qlardan foydalandi.
To‘qnashuvlar Anqara va Izmirda ham qayd etilgan, u yerda politsiya namoyishchilarga qarshi ko‘zdan yosh oqizuvchi gaz va suv purkagichlardan foydalangan.
Turkiya prezidenti Rajab Toyyib Erdo‘g‘an mamlakatda yetakchi muxolifatchilardan birining hibsga olinishi ortidan norozilik to‘lqini kuchayib borayotganini qoraladi. Erdo‘g‘an juma kungi chiqishida hukumat «vandalizm» yoki «ko‘cha terrori» qarshisida «taslim bo‘lmasligi» va jamoat tartibi buzilishiga toqat qilmasligini aytdi.
