Turkiyadagi namoyishlar: 1100 dan ortiq kishi qo‘lga olindi

Turkiya 19 martdan buyon 1133 nafar namoyishchi qo‘lga olindi. Bu haqda 24 mart, dushanba kuni Turkiya ichki ishlar vaziri Ali Yerlikaya ma’lum qildi. Turkiya OAV va huquqshunoslik assotsiatsiyasi (MLSA) ma’lumotlariga ko‘ra, qo‘lga olinganlar orasida o‘n nafar fotosuratchi va jurnalist ham bor.

Turkiyaning Disk-Basin-Is media uyushmasi ommaviy qo‘lga olishlarni «matbuot erkinligi va xalqning haqiqatni bilish huquqiga hujum» deb atadi.

24 mart kuni kechqurun Istanbul va Anqara shaharlarida minglab odamlar yana ko‘chalarga chiqib, hukumat iste’fosini talab qildi hamda norozilik namoyishi uyushtirdi, deb xabar beradi dpa agentligi.

Erdo‘g‘an namoyishlarni «zo‘ravonlik harakati» deb atadi 

Turkiya prezidenti Rajab Toyyib Erdo‘g‘an namoyishlarni qoralab, ularni «zo‘ravonlik harakati» deb atadi. U norozilik to‘lqinida Imomo‘g‘li a’zo bo‘lgan muxolifatdagi Respublika xalq partiyasini aybladi.

Turkiya IIV rahbariga ko‘ra, 19-23 mart kunlari bo‘lib o‘tgan umummilliy namoyishlar chog‘ida 123 nafar politsiyachi jarohatlangan.

Akrom Imomo‘g‘li Turkiya prezidentligiga nomzod sifatida ko‘rsatildi

Turkiyaning muxolifatdagi Respublika xalq partiyasi 23 mart kuni hokimiyatdan chetlatilgan va qamoqqa olingan Istanbul hokimi Akrom Imomo‘g‘lini prezidentlikka nomzod qilib ko‘rsatdi. Respublika xalq partiyasi praymerizlarida jami 15 million turk fuqarosi qatnashdi, bu esa mamlakatda ro‘yxatga olingan saylovchilarning deyarli to‘rtdan bir qismini tashkil etadi. Ulardan 13,2 millioni yagona nomzod bo‘lgan Imomo‘g‘lini qo‘llab-quvvatlagan.

Respublika xalq partiyasi raisi O‘zg‘ur O‘zel Turkiyaning amaldagi prezidenti Rajab Toyyib Erdo‘g‘anni muddatidan oldin prezidentlik saylovlarini o‘tkazish va Akrom Imomo‘g‘li bilan raqobatlashishga qaror qilishga chaqirdi.

Shu kuni o‘n minglab muxolifat tarafdorlari Istanbul meriyasi oldida to‘planib, Erdo‘g‘anning raqibi siyosiy sabablarga ko‘ra ta’qib qilinayotganiga norozilik bildirishdi. AP O‘zelning mitingdagi so‘zlaridan iqtibos keltirdi: "Imomo‘g‘li bir tomondan qamoqxonada, boshqa tomondan esa prezidentlikka yo‘l oldi". Prezidentlikka yangi nomzod bo‘lgan Imomo‘g‘lining rafiqasi Dilek Kaya ham namoyishchilarga murojaat qildi.

Namoyishchilar barrikadalar qurishga urinib, politsiya bilan to‘qnashdi, deb yozadi Milliyet. Natijada, uning ma’lumotlariga ko‘ra, 66 nafar namoyishchi qo‘lga olingan, besh nafar politsiyachi jarohatlangan.