Mers 28-oktabrda Yaponiya boş vaziri Sanae Takaiçi bilan uçraşuvdan söng ikki mamlakat qiruvçi yaratiş sohasida hamkorlik qiliş imkoniyatlarini körib çiqayotganini maʼlum qildi.
Taşrif davomida Berlin va Tokio iqtisodiy xavfsizlik, ilğor texnologiyalar va mudofaa sohalarida hamkorlikni kengaytirişga kelişgan.
Takaiçi Germaniya bilan mudofaa sohasidagi hamkorlikni qöllab-quvvatlab, ikki davlatning xalqaro tinçlik va barqarorlikka hissa qöşişi muhimligini taʼkidlagan.
Yangi qiruvçi 2035-yilga möljallangan
GCAP - Global Combat Air Programme doirasida Buyuk Britaniya, Yaponiya va Italiya oltinçi avlod jangovar samolyotini işlab çiqmoqda. Reuters maʼlumotiga köra, uni 2035-yilga borib foydalanişga tayyorlaş rejalaştirilgan.
Oktabr boşida Buyuk Britaniya boş vaziri Endi Byornem Germaniyaga mazkur dasturda iştirok etişni taklif qilgan edi. Bu Germaniya, Fransiya va Ispaniyaning FCAS loyihasi muvaffaqiyatsizlikka uçragani haqidagi xabarlardan keyin yuz bergan.
Reuters yozişiça, FCAS böyiça asosiy kelişmovçiliklar Germaniya va Fransiya kompaniyalarining işlab çiqarişdagi uluşlariga taalluqli bölgan.
Ayni paytda Germaniya uçun boşqa variantlar ham muhokama qilinmoqda. Dpa agentligiga köra, ular orasida Airbus, Şvetsiya va Saab mudofaa konserni örtasidagi hamkorlik ham bor.
Işlab çiqarişdagi iştirok şartlari örganiladi
Mers GCAP dasturining sanoatga oid ayrim kelişuvlari ança ilgarilab ketganini qayd etgan. Şu sababli Germaniyaning loyihaga qanday şartlarda qöşilişi mumkinligini alohida örganiş zarur.
Kanslerning taʼkidlaşiça, Yevropa turli jangovar tizimlar sonini kamaytirib, işlab çiqariladigan qurollar miqdorini oşirişi kerak. Uning fikriça, katta hajmdagi işlab çiqariş kelajakda qiruvçilar narxiga hal qiluvçi taʼsir körsatadi. GCAP’da bir neçta yirik davlat iştirok etayotgani hamkorlik foydasiga dalil bölişi mumkin.
Yaponiya Germaniyadan yil oxirigaça javob olişni istamoqda. Biroq Mers Berlin bunday qisqa muddatda qarorga kela olişini hozirça tasdiqlay olmasligini aytgan.
