Ukraina «Moskva» kreyseri cho‘ktirilishida AQShning rolini rad etdi 

2022 yil aprel oyida Qora dengizda «Moskva» kreyserini yo‘q qilish bo‘yicha operatsiya Ukraina qurolli kuchlari harbiy-dengiz kuchlari tomonidan rejalashtirilgan va amalga oshirilgan. Bu haqda Ukraina harbiy-dengiz kuchlari matbuot kotibi Dmitriy Pletenchuk 30 mart, yakshanba kuni milliy telemarafon efirida ma’lum qildi.U The New York Times gazetasining Ukraina go‘yoki AQShdan Rossiya Qora dengiz floti flagmani koordinatalarini olgani va bunday zarbani muvofiqlashtirishni kutgani haqidagi ma’lumotni rad etdi.

«Biz, albatta, tegishli ruxsatni olgan holda, buyruq zanjiriga muvofiq, yuqori rahbariyat bilan zarba berilishini muvofiqlashtirdik. Va bu, albatta, Ukraina rahbariyati bo‘ldi. Biz bu zarbani amalga oshirdik, - dedi Pletenchuk. - Shuning uchun, muvofiqlashtirish va «Moskva» kreyseri joylashuvi haqida aniq ma’lumot berilgani to‘g‘risidagi gap-so‘zlar haqiqatga mos kelmaydi, shuningdek, uni muvofiqlashtirish zarurligi haqidagi ma’lumotlar to‘g‘ri emas».

«Moskva» kreyseri Rossiyaning Ukrainaga qarshi keng ko‘lamli urushi boshlanganidan bir yarim oy o‘tib cho‘kib ketdi. Ukraina harbiylari u ikkita "Neptun" raketasi bilan urilganini ma’lum qilgan bo‘lsa, Rossiya Mudofaa vazirligi hodisaga kemani tortish vaqtida sodir bo‘lgan yong‘in natijasida bortdagi o‘q-dorilarning portlashi sabab bo‘lganini aytdi. 2022 yil noyabr oyida Qora dengiz floti Tergov qo‘mitasi kreyserning cho‘kishi munosabati bilan Rossiya Federatsiyasi Jinoyat kodeksining 346-moddasi ikkinchi qismi («harbiy mulkni qasddan yo‘q qilish yoki shikastlash») bo‘yicha jinoiy ish qo‘zg‘atdi. Ish 2023 yil oxirida to‘xtatilgan.

Bortda qancha odam bo‘lgani va ulardan qanchasi halok bo‘lgani hozircha noma’lum. Rossiya matbuoti xabariga ko‘ra, kreyserda 40 ga yaqin odam halok bo‘lgan, yana 100 nafari yaralangan. Mustaqil "Agenstvo" Rossiya nashriga ko‘ra, "Moskva" bortida harbiy xizmatni o‘tayotgan 300 ga yaqin askar bo‘lgan. Shu bilan birga, bir oy oldin Rossiya prezidenti Vladimir Putin chaqiriluvchilar va zaxiradagi askarlar Ukrainadagi «harbiy operatsiyada» qatnashmasligiga va’da bergan edi.