“120 tezlikda tormoz ishlamay qoldi” – Namanganda ikki o‘quvchi ijaraga olingan Spark’da YTHga uchradi

Yangi Namangan tumanida o‘quvchilar ishtirokida YTH sodir bo‘ldi. Bu haqda viloyat YHXB axborot xizmati xabar berdi.

Ma’lum qilinishicha, YTH 15 aprel kuni sodir bo‘lgan. Yangi Namangan tumanidagi 70-umumta’lim maktabining 2 nafar 8-sinf o‘quvchisi Telegram’dagi guruhdan Spark mashinasini 8 soatga ijaraga olishgan. Buning evaziga mashina egasiga 1 mln so‘m berishgan.

O‘quvchilar mashinani katta tezlikdan boshqarib ketayotib yo‘l chetidagi beton to‘siqqa borib urilgan. YTH oqibatida ular turli tan jarohatlari olib shifoxonaga yotqizilgan.

“Eng achinarlisi, ushbu bolalar tahsil oladigan maktabda viloyat YHXB tomonidan muhokama yig‘ilishi o‘tkazilgan edi. Aynan shu bolalar voyaga yetmagan holda avtomashina boshqargani uchun ularning ota-onalari, ustozlari, mas’ullar ogohlikka chaqirilgandi. Bolaning tegishli xulosa chiqarmagani uni halokatga yetakladi”, deyiladi xabarda.

Qayd etilishicha, bolalarga mashinani ijaraga bergan shaxsning o‘zi hali haydovchilik guvohnomasiga ega bo‘lmagan. U mashinani 12 aprel kuni Toshkent shahrida yashovchi fuqarodan sotib olgani aniqlangan. Spark egasi qilgan ishidan pushaymonligini aytib, qaytib bu xatoni takrorlamasligini bildirgan.

“120 tezlikda tormozim ishlamay qoldi. 1 mln so‘mni dadamning ishxonasidan oldim. Dadamning bundan xabari bo‘lmadi”, degan YTH paytida mashina boshqaruvida bo‘lgan o‘quvchi.

Bolaning otasi Namanganda ko‘plab ota-onalar farzandlari ijaraga olingan mashinada YTHga uchrashi ortidan aziyat chekayotganini aytib, mashinasini voyaga yetmaganlarga ijaraga berayotgan “tadbirkor”larni pul uchun vijdonini sotmaslikka chaqirgan.

Kun.uz oldinroq Namanganda mashinani noqonuniy ijaraga berish “biznes”ga aylanayotgani va buning oqibatida bolalar halok bo‘layotgani haqida xabar bergandi.