AQSh prezidenti Donald Tramp ma’muriyati Ukrainaga nisbatan munosabatini o‘zgartira boshladi, deb yozadi Britaniyadagi Financial Times gazetasi 14 may kungi materialida.
7 may kuni Vashingtonda bo‘lib o‘tgan tashqi siyosat forumida AQSh vitse-prezidenti Jyey Di Vensdan Ukraina haqida so‘rashganida, diplomatlar u odatdagidek Kiyevni tanqid qilishini kutishgan, ammo «mutlaqo boshqa gaplarni eshitishgan». Vens Rossiyaning Ukrainadagi urushni to‘xtatish uchun qo‘ygan talablari haqida gapirib, shunday degandi: «Bizning fikrimizcha, ular juda ko‘p narsani so‘rashmoqda». Ertasi kuni Vens Fox News telekanaliga bergan intervyusida bu fikrni takrorladi va «Rossiya hali bosib olmagan hududini unga berishlariga umid qila olmasligi»ni qo‘shimcha qildi.
Gazetaning yozishicha, Amerika rasmiylari Rossiya prezidenti Vladimir Putinga nisbatan tobora ko‘proq toqatsizlik ko‘rsatmoqda, chunki «tinchlik yo‘lidagi eng katta to‘siq [Ukraina prezidenti Volodimir] Zelenskiy emas, balki Rossiya yetakchisi bo‘lishi mumkinligi haqida shubha kuchaymoqda». AQSh Putinni Rossiya-Ukraina urushida o‘t ochishni to‘xtatishning asosiy to‘sig‘i deb hisoblay boshladi, chunki Rossiya prezidenti murosaga bormayapti, deb yozadi FT.
«Amerikaliklarda shunday oddiy g‘oya bor edi – keling, Rossiyani maftun qilaylik, Zelenskiyga bosim o‘tkazaylik va biz kelishuvga erishamiz. Ma’lum bo‘lishicha, Rossiyani maftun qilishning o‘zi yetarli emas ekan», – dedi nemis diplomati, Germaniyaning AQShdagi sobiq elchisi Volfgang Ishinger. U Vens Rossiya haqidagi fikrini o‘zgartirganidan, AQSh va Yevropa pozitsiyalari yaqinlashganidan xursandligini ta’kidlaydi. Shu bilan birga, Ishinger Amerika vitse-prezidenti «keyingi mantiqiy qadamni qo‘ymagani» va Rossiyaga nisbatan «murvatlarni burash» vaqti kelganini aytmaganiga ham e’tibor qaratadi.
Kuzatuvchilar fikricha, Rossiyaning murosasizligi Donald Trampni g‘azablantirmoqda. «Uning so‘zlarida afsus sezilib turibdi. Ehtimol, u haddan tashqari ko‘p narsa bergani va evaziga hech narsa olmaganini tushunadi», – deydi AQShning Rossiyadagi sobiq elchisi Maykl Makfol.
2006-2009 yillarda AQShning Ukrainadagi elchisi bo‘lib ishlagan yana bir amerikalik diplomat Uilyam Teylorning fikricha, Putin «AQShning do‘sti emasligi»ni Tramp anglab yetgan. «Unga ishonib bo‘lmaydi... u jiddiy muzokaralar olib bormayapti, degan tushuncha paydo bo‘lgan», – dedi Teylor.
«Putin hamkorlik qilishga tayyor emasligini Tramp aniq ko‘rib turibdi. Ammo buning oqibati Putinga sezilarli bosim bo‘lishiga ishonchim komil emas», – deydi AQShning 46-prezidenti Jo Baydenning Milliy xavfsizlik kengashidagi Rossiya bo‘yicha bosh maslahatchisi lavozimida ishlagan Karnegi fondi xodimi Erik Grin.
