Surxondaryoda 23 ta ko‘p qavatli turar joy binosida seysmik jihatdan kamchiliklar aniqlandi

Surxondaryo viloyati Qurilish va uy-joy kommunal xo‘jaligi bosh boshqarmasida kengaytirilgan tartibdagi yig‘ilish bo‘lib o‘tdi. Qurilish va uy-joy kommunal xo‘jaligi vazirligi hamda viloyat hokimligi mas’ullari boshchiligida o‘tkazilgan yig‘ilishda prezident farmoni asosida ko‘p qavatli turar joy binolarining seysmik holatini o‘rganish masalalari muhokama etildi.

Yig‘ilishda bosh boshqarma mutasaddilari va boshqa hamkor tashkilot vakillaridan iborat ishchi guruhning hisobotlari tinglandi. 

Ta’kidlanishicha, hozirga qadar viloyat bo‘yicha 125 ta ko‘p qavatli turar joy binosi vizual ko‘rikdan o‘tkazilgan. Ularning 23 tasida seysmik jihatdan xavf tug‘diradigan kamchiliklar aniqlangan. Shu sababli ushbu binolarni instrumental texnik ko‘rikdan o‘tkazish belgilandi. 

Muhokamalar so‘ngida mas’ullarga tegishli ko‘rsatmalar berildi. O‘rganish ishlari hududlar bo‘ylab davom etmoqda.