“Orolga tashrif” xalqaro avtosayohat loyihasi ishtirokchilari Qoraqalpog‘istonga yo‘l oldi

Ishtirokchilar 30 ga yaqin yo‘l tanlamas avtomobillarida Nukus, Mo‘ynoq, Orol bo‘yi hududi, Buxoro, Xiva va Navoiy viloyatlariga tashrif buyurib, mintaqaning turistik maskanlari, ekologik muammolari hamda mahalliy aholining turmush tarzi bilan yaqindan tanishadilar.

Turizm qo‘mitasi tomonidan va SamAuto hamkorligida hamda Tegeta Motors ko‘magida tashkil etilgan “Orolga tashrif” xalqaro avtosayohat loyihasi ishtirokchilari Qoraqalpog‘istonga yo‘l oldi.

Xabar berilishicha, 8 kun davomida 70 dan ortiq ishtirokchilar 30 ga yaqin yo‘l tanlamas avtomobillarida Nukus, Mo‘ynoq, Orol bo‘yi hududi, Buxoro, Xiva va Navoiy viloyatlariga tashrif buyurib, mintaqaning turistik maskanlari, ekologik muammolari hamda mahalliy aholining turmush tarzi bilan yaqindan tanishadilar.

Sayohat davomida ishtirokchilar Orol dengizining qurigan tubi, Mo‘ynoqdagi tarixiy kemalar qabristoni va ekologik ofat oqibatlari haqida ma’lumot oladilar.

Shuningdek, ular hududdagi ekologik tiklanish loyihalari, yashil iqtisodiyotni rivojlantirish bo‘yicha amalga oshirilayotgan chora-tadbirlar bilan ham tanishish imkoniyatiga ega bo‘ladilar.

“Orolga tashrif” xalqaro avtosayohat loyihasi ishtirokchilari Mo‘ynoqda joylashgan Orol fojiasi muzeyi, Nukusdagi Igor Savitskiy nomidagi san’at muzeyi, Buxoro, Navoiy va Xiva shaharlarining turizm salohiyati bilan yaqindan tanishadilar.