Korrupsiyaga qarshi kurash sohasidagi NNT loyihalariga grant ajratiladi

Prezidentning «Korrupsiyaga qarshi kurashish sohasida fuqarolik jamiyati institutlarining ishtirokini yanada kengaytirish va ilmiy tadqiqotlarni qo‘llab-quvvatlash chora-tadbirlari to‘g‘risida»gi qarori qabul qilindi.

Ustuvor vazifalar:

• korrupsiyaga qarshi kurashish faoliyatida ilmiy tashkilotlar va fuqarolik jamiyati institutlarining rolini oshirish;
• korrupsiyaga qarshi kurashish choralarining samaradorligi va natijadorligini har bir soha va hudud kesimida tahlil qilish tizimini joriy etish;  
• korrupsiyaga qarshi kurashishga yetakchi mahalliy va xorijiy oliy ta’lim muassasalari hamda ilmiy-tadqiqot institutlarini keng jalb etish;
• korrupsiyaga qarshi kurashish masalalari bo‘yicha kompleks sotsiologik, ilmiy va amaliy tadqiqotlarni tizimli asosda, shu jumladan milliy va xalqaro grantlarni jalb etgan holda olib borish;
• ilmiy tadqiqotlar natijalarini amaliyotga joriy etish.

Hujjatda quyidagi choralar amalga oshirilishi belgilab qo‘yildi:

• NNTni BMTning Korrupsiyaga qarshi konvensiyasi qoidalarining bajarilishini monitoring qilishga jalb etish va ular tomonidan muqobil baholash tizimini joriy etish;
• korrupsiyaga qarshi kurashish sohasidagi NNT loyihalariga yiliga 10 mlrd so‘m miqdorida grantlar ajratish va ijtimoiy buyurtmalar berish;
• maishiy korrupsiyaga hissa qo‘shuvchi omillar bo‘yicha ijtimoiy so‘rovlar o‘tkazish.

NNTning milliy assotsiatsiyasi, "Yuksalish" harakati va "Ijtimoiy fikr" respublika markazining muassisligida "Korrupsiyaga qarshi kurashish muammolari bo‘yicha mintaqaviy tadqiqot markazi" NNT tashkil etiladi, u davlat va jamiyat hayotining barcha sohalarida halollik standartlarini joriy etish, davlat organlari va boshqa tashkilotlarga ilmiy-uslubiy ko‘mak ko‘rsatish bilan shug‘ullanadi.

Korrupsiyaga qarshi kurashish sohasida fuqarolik jamiyati institutlarining ishtirokini yanada kengaytirish va Korrupsiyaga qarshi kurashish muammolari bo‘yicha mintaqaviy tadqiqot markazining faoliyatini samarali tashkil etish bo‘yicha "yo‘l xaritasi" tasdiqlandi.