Fuqarolik aviatsiyasi: tarmoqni liberallashtirish va xavfsizlikni oshirish choralari belgilandi

Transport vazirligiga raqobatni oshirish, parvozlar geografiyasini diversifikatsiya qilish, ICAO standartlarini milliy huquqqa joriy etish va sohaning uzoq muddatli strategiyasini ishlab chiqish vazifalari yuklandi. “O‘zaeronavigatsiya”ga navigatsiya uskunalarini modernizatsiya qilish, PBN tizimini joriy etish vazifasi berildi. 

“O‘zaviatsiya” agentligiga qo‘shimcha 51 ta shtat ajratilib, boshqaruv xodimlari limiti 109 ta etib belgilandi, zarur holda 25 foizgacha xorijiy mutaxassislarni jalb qilishga ruxsat berildi. 

Toshkent xalqaro aeroportidagi tibbiy-ko‘rik komissiyasi tugatilib, 2026 yil 1 apreldan “O‘zaviatsiya” tarkibida aviaxodimlarni tibbiy ko‘rikdan o‘tkazuvchi bo‘lim tashkil etiladi. 

Rezident aviakompaniyalarning yo‘lovchi va yuk havo kemalari importi bojxona boji va QQSdan ozod etiladi. 2026–2028 yillarda davlat budjeti hisobidan har yili 250 mlrd so‘m aerodromlar va havo harakatini boshqarish tizimini modernizatsiya qilishga yo‘naltiriladi. 

Transport vazirligi huzurida yuridik shaxs maqomisiz jamg‘arma tuziladi, daromad manbai — xalqaro reyslar bo‘yicha aeroport yig‘imlari. Jamg‘arma mablag‘lari “O‘zaviatsiya” faoliyatini moliyalash, uchuvchi va bortkuzatuvchilar tayyorlash, aviaxodimlarni rag‘batlantirish, aviahodisalar tekshiruvi va laboratoriya bazasini yaratishga sarflanadi. 2026 yil 1 yanvardan “O‘zaviatsiya”ni budjetdan moliyalash bekor qilinadi. 

Aeroport yer uchastkalarida qurilish ishlari ICAO xavfsizlik talablari asosida “O‘zaviatsiya” bilan kelishilgan tartibda amalga oshiriladi, aeroport infratuzilmasini rivojlantirish uchun yerlar Davlat aktivlarini boshqarish agentligiga doimiy foydalanishga beriladi. 

3 oyda “O‘zaviatsiya”da yo‘lovchilar murojaatlarini qabul qiluvchi CRM va call-markaz ishga tushiriladi, Skytrax’ga o‘xshash xalqaro baholash tizimi joriy etish bo‘yicha takliflar kiritiladi, ehtiyot qismlar uchun pul (pool) shartnomalari tizimi yo‘lga qo‘yiladi. 

Hukumatga bir oyda — aviatsiya davlat siyosati bo‘yicha ma’muriy reglament, havo harakatini boshqarishni takomillashtirish choralari, ikki oyda — uchuvchi va bortkuzatuvchi tayyorlash o‘quv muassasasi hamda Aviatsiyani qo‘llab-quvvatlash jamg‘armasi to‘g‘risidagi hujjatlar loyihalarini kiritish topshirildi. 2026 yil 1 oktyabrga qadar yangi tahrirdagi Havo kodeksi loyihasi tayyorlanadi. 

Farmon ijrosi uchun bosh vazir o‘rinbosari A.Ramatov va transport vaziri I.Mahkamov shaxsan javobgar qilib belgilandi, umumiy nazorat bosh vazir A.Aripovga yuklatildi.