Prezident: hududlarda oshqozon va buyrak kasalliklari bo‘yicha og‘riqli nuqtalar saqlanib qolmoqda

Prezident sog‘liqni saqlashdagi holatni aniq misollar bilan tahlil qilar ekan, hududlar kesimidagi tafovutlar saqlanib qolayotgani, profilaktika va birlamchi bo‘g‘in ishlarida sustkashlik borligini ta’kidladi.

Rasmiy ma’lumotga ko‘ra, so‘nggi besh yilda oshqozon kasalliklari umumiy miqyosda 1,5 barobar kamaygan. Biroq Qashqadaryo va Navoiy viloyatlarida ko‘rsatkichlar deyarli o‘zgarmagan. Xususan, Yakkabog‘ tumanida shifokorlarga murojaatlarning 33 foizi, G‘uzorda 29 foizi, Koson va Mirishkorda esa 25 foizi oshqozon-ichak kasalliklari bilan bog‘liq.

Shuningdek, aholi, ayniqsa bolalarda antibiotiklardan pala-partish foydalanish holatlari davom etayotgani tanqid qilindi. “Tumanlarga tushib, shifoxona va poliklinikadagi vrachlar bilan ishlash, qaysi dori mumkin, qaysi biri mumkin emasligini aniq o‘rgatish sust”, deya mutasaddilarga keskin e’tiroz bildirildi.

Yana bir muammo — buyrak kasalliklarining hududlar bo‘yicha yuqori ulushi. Qoraqalpog‘iston, Xorazm, Farg‘ona va Andijonda bu ko‘rsatkich respublika o‘rtacha darajasidan 40–50 foizga baland ekani qayd etildi. Mazkur hududlarda ko‘rsatkichlar yillar davomida kamaymayotgani Urologiya markazi va Nefrologiya markazi rahbariyatidan pastga tushib, profilaktik ishlarni kuchaytirishni talab qiladi.

Mutasaddilarga birlamchi bo‘g‘inni mustahkamlash, dorilardan oqilona foydalanish bo‘yicha shifokorlar malakasini oshirish, hamda oshqozon-ichak va buyrak kasalliklari profilaktikasini joylarda tizimli tashkil etish yuzasidan topshiriqlar berildi.