Ёнган машина, “жим юриш” учун $10 000 ва ижара низосидан ясалган жиноят
|22:50 / 03.11.202545 94032 мин
Фарғона шаҳар ИИБ бошлиғи Алишер Ашуров, ИИБ тезкор ходими Ойбек Ашуров ва вилоят ИИБ терговчиси Нурмуҳаммад Ашуров - булар фарғоналик икки аёлнинг ўзаро ижара низосидан ясалган жиноят иши ортида турган учлик сифатида намоён бўлади. Kun.uz ўрганган навбатдаги кейсда опа-сингил “ИИБ ходимларининг қасди” сабаб терговга тортилгани, қийноққа солингани ва қамоққа олингани ҳақида сўз боради. Опа-сингилнинг қамоққа олинишига сабаб бўлган “тезкор тадбир” Фарғона шаҳар ИИБ биноси ичида, ходимлар иштирокида ва уларнинг кўрсатмалари билан ўтказилган.
Kun.uz’га Фарғона шаҳрида яшовчи аёлдан ички ишлар ходимларининг ғайриқонуний хатти-ҳаракатлари ҳақида мурожаат келиб тушди. Унда Фарғона шаҳар ички ишлар бошқармаси бошлиғи Алишер Ашуров адоват туфайли опа-сингилга жиноий иш қўзғагани, вилоят ички ишлар бошқармасида қийноқ қўллангани билдирилган. Аёлнинг айтаётганлари ва даъволари анча жиддий. Шу сабабли Kun.uz барча томонларни тинглаган ҳолда мавзуни ўрганишга қарор қилди.
Ижарачи, косметолог ва унинг синглиси
Жиноят иши марказидаги низода уч аёл исми такрорланади: булар Моҳинур Холиқназарова, Маҳлиё Умарова ҳамда Назокат Шукурова.
34 ёшли Моҳинур Холиқназарова косметология билан шуғулланади. 1993 йилда туғилган Маҳлиё Умарова унинг синглиси. 42 ёшли Назокат Шукурова эса ўзи яшайдиган Фарғона шаҳри, Фаробий кўчасидаги 9/15а-уйнинг бир қисмини ижарага бериш орқали даромад кўриб келади.
Низонинг бошланиш нуқтаси Моҳинур Холиқназарова Назокат Шукуровага тегишли бинонинг 3 та хонасини ижара олиши билан боғлиқ. 2025 йил апрел ойида Моҳинур Холиқназарова Фарғона шаҳрида косметолог хизматини йўлга қўйиш мақсадида ижарага жой излай бошлайди. Olx сайтида Фарғона шаҳри, Фаробий кўчасидаги 9/15а-уйда хоналар ижарага берилиши ҳақидаги эълонга дуч келади.
Моҳинур манзилга бориб, хоналарни кўради ва Назокат Шукурова билан 2-қаватда 2 та, 1-қаватда битта хонага ойига минг доллар ижара пули бериш бўйича оғзаки келишади.
У 2-қаватдаги хоналарни хусусий боғча қилишни, 1-қаватдаги хонада эса косметология хизматини йўлга қўйишни режалаштиради. Бироқ, Моҳинурнинг айтишича, ижарага олинган хоналар таъмирталаб бўлган. Шу сабабли, у мулк эгасига ушбу хоналарни таъмирлаб олишини, бунинг эвазига у билан 5 йиллик ижара шартномаси тузиши кераклигини айтган. Шу тариқа, икки аёл ўзаро келишув асосида 5 йиллик ижара шартномаси тузган. Назокат Шукурова гарчи хоналарни ойига минг доллар эвазига ижарага берган бўлса ҳам “текин фойдаланиш”га бергани бўйича ижара шартномаси расмийлаштирган.
Мавзуга оид
Низонинг бошланиши
Моҳинур Холиқназарова жойни ижарага олгач, Назокат Шукуровага олдиндан минг доллар берган ҳамда хоналарни таъмирлай бошлаган. У 2-қаватдаги 2 та хонада кичик синглисига тегишли хусусий боғчанинг филиали сифатида боғча ташкил этади.
1-қаватдаги хонада эса косметология хизматини йўлга қўяди. Аммо иш у ўйлаганчалик ривож топмайди.
“Жойни таъмирлатдим ва 5 май кунидан иш фаолиятимни бошладим. У аёл 1 май куни менга Telegram орқали шартнома ташлади. Кўрдим, шартнома текин фойдаланишга 5 йил муддатга қилинганди. Мен у аёлдан нотариус орқали шартнома қилишни сўрагандим. Ҳайрон бўлиб, нега бунақа десам солиқ тўламаслик учун шунақа қилдим, ҳамма билан шунақа шартнома қиламан олдиндан, деди. Иложи йўқ, хўп дедим.
Кейин косметологияни, болалар боғчасини юргизишни бошладим. Болалар келишни бошлади. Лекин кўп бола келмади. Кейинчалик билсам у аёлнинг атрофдагилар билан низолари бор экан. Шунинг учун ҳеч ким у жойга боласини олиб келишни хоҳламади. Билмаган 5-6 киши болаларини олиб келишди.
Август ойининг бошларида Назокат опага жой юрмаётганини, иккиламчи ижарага бермоқчилигимни айтдим. Чунки олдиндан, олаётган пайтимда асосий соҳам боғча эмаслиги учун кейинчалик иккиламчи ижарага бераман деб келишиб олгандим. У аёл сиз билан келишганмиз, бераверинг, шунча таъмирладингиз, ижара пулини вақтида тўлаяпсиз деди”, дейди Моҳинур Холиқназарова.
Шундан сўнг у 2025 йил 3 август куни хаста онасини шифокорга кўрсатиш учун Тошкент шаҳрига келади. 4 август куни Назокат Шукурова унга қўнғироқ қилиб, 2-қаватдаги хоналарни бошқа одамга ижарага берганини, хоналардаги нарсаларини олиб чиқиб кетишни айтади. Бу гапни эшитган Моҳинур Холиқназарова Фарғонага қайтиб, Назокат Шукурова билан гаплашади. Моҳинур жойни ўз ҳисобидан таъмирлаганини, сарфлаган пулини қайтарса нарсаларини олиб чиқиб кетишини айтади, Назокат Шукурова эса бунга кўнмайди ва чиқиб кетишни талаб қилади. Икки аёл ўртасидаги жанжал шундан келиб чиқади.
“Хўп, менинг “расходим”ни беринг, чиқиб кетай, сиз билан келишувимиз бунақа бўлмаганди, деб айтдим. Менинг ўзим ижарага беришим керак эди бу жойни десам, ўзининг гапини гапириб тураверди. Кейин майли, бўлар иш бўлди, харажатимни беринг, нарсаларимни олиб чиқиб кетаман деганимда у мен айтган суммага кўнмади”, дея таъкидлайди Моҳинур Холиқназарова.
Машина ичидаги тортишув
Моҳинур ва Назокат 3-4 кун “унча берасан, бунча бераман” шаклида тортишиб келган. Ўзаро жанжаллардан сўнг жой эгаси пулни қайтаришини айтган. 2025 йил 8 август куни Моҳинур Холиқназарова синглиси Маҳлиё Умарова билан ўзининг бошқарувидаги Chery машинасида Назокат Шукурованинг яшаш уйи ёнига борган.
Моҳинур Холиқназарова иш тафсилотининг бу қисмини шундай ҳикоя қилади:
“Таъмирининг ўзига 53 млн сўм “прораб”га берганман. Ундан ташқари яна “расход”лар бўлган ва 25 августгача 3 200 доллар ижара ҳақини тўлаб қўйгандим. Шунча “расход” қилган бўлсам ҳам онамнинг операциясига зарурлиги учун 2 минг доллар беринг, бўлди, бошқа керакмас, дедим. Йўқ, 2 минг доллар бермайман, менинг ўрнимда бошқаси бўлганда сизни шундай кўчага олиб чиқиб қўярди, 1000 доллар бераман, деди. Мен рози бўлмадим.
Кейин у аёл нарсаларимни олиб чиқиб кетмаганимдан сўнг 8 август куни менга қўнғироқ қилиб, бўпти, келинг, айтган пулингизни бераман, деди. У пайтда синглим Маҳлиё Умарова Хитойдан келганди. Синглим билан олди-бердимиз бўлган. Мендан пул олишга келиб қолди. Синглимга бир жойдан пул олиб бераман, биттасининг қарзи бор, юринг, мен билан бориб келинг, дедим. У хўп, дея мен билан борди.
Бориб, аёлга қўнғироқ қилдим ва келганимни айтдим. Унинг яшаш хонадони мен ижарага олган ўша бинонинг 3-қаватида эди. Тушди пастга. Ҳозир ёнимда 500 доллар бор, қолган суммани Қувадан танишимдан олиб бераман сизга, деди. Хўп дедим, у машинамга ўтирди ва кетдик.
Йўлда кимгадир қўнғироқ қилди. Мен рулда бўлганим учун эътибор бермадим. Кейин танишим телефонни кўтармаяпти, пулингизни сизга кейинчалик бераман, деди. Синглимга пул беришим керак, ўзимга ҳам зарур, пулимни берасиз деб туриб олдим. Қўлида тилла браслети бор экан, шуни олинг, 20 грамм чиқади, деди. Менга тилла керакмаслигини, пул зарурлигини айтдим. Унда тилхат ёзиб бераман деб туриб олди. Мен тилхат орқали сиздан пулимни ололмайман, ишонмайман десам ололадиган қилиб ёзиб бераман, деди. Тилхатни ёзди, кўрсам 4 800 долларга ёзган. “Расходим” 4 800 доллар эмас, кўплигини ўзингиз биласиз, сиз менга 5 йилга шартнома қилиб, ишлашимга йўл қўймадингиз, бу ердан жудаям кўп фойда қилишим керак эди, майли, яна 1,5 минг долларга ёзиб беринг дедим. Ва у алоҳида бошқа қоғозга 1,5 минг доллар учун тушунтириш хати ёзиб берди. Кейин менга 400 доллар берди ва 1 млн 300 минг сўмни картамга ўтказиб берди. Сўнгра уйига олиб бориб қўйдим”.
Шу тариқа, Назокат Шукурова машина ичида Моҳинур Холиқназаровага иккита тилхат ёзиб берган. Шундан сўнг опа-сингил ортга қайтиб, уни уйи ёнига тушириб кетишган. Бироқ Шукурова айтилган вақтда пулни қайтармагач, 2025 йил 11 август куни Моҳинур Холиқназарова ҳолат юзасидан Фарғона шаҳар ички ишлар бошқармасига ариза билан мурожаат этган.
“Ўзимизнинг маҳалламиздаги “участкавой”га қўнғироқ қилиб, шунақа ҳолат бўлаётганини, пулимни бериш нияти йўқлигини айтдим. Ходим у билан гаплашди шекилли, менга қайта қўнғироқ қилиб, “102”га мурожаат қилинг, деди. Хўп дедим ва 11 август куни синглим билан бирга Фарғона шаҳар ИИБ бошлиғининг биринчи ўринбосари бўлган Камолиддин исмли ходимнинг олдига бордик. У синглим билан олдиндан таниш экан.
Ходимга бўлган воқеанинг ҳаммасини айтиб бердик. Устидан ариза ёзиб беринг, деди. Битта ходимини чақирди. Кейин 2-қаватга олиб чиқиб, мендан ариза олди”, дейди Моҳинур Холиқназарова.
ИИБ биносидаги тезкор тадбир
2025 йил 20 август куни Моҳинур Холиқназаровага Фарғона шаҳар ички ишлар бошқармаси ходими Улуғбек Аминов қўнғироқ қилади ва ИИБга келишини, Назокат Шукурова зарарни қоплаб беришини айтади. Моҳинур кун давомида бир неча бор ходимга қўнғироқ қилади ва қачон бориши кераклиги сўраб туради. У соат 20:30 лар атрофида ИИБ биносига боради. Улуғбек Аминов икки аёлни ўз хизмат хонасига олиб киради.
“Фарғона шаҳар ИИБга борганимда тахминан 1 соатдан кейин Назокат опа келди. Кейин Улуғбек исмли ходим бизни ичкарига, хонасига олиб кириб кетди. Хонага кирганимизда у аёл синглиси қани, синглиси эртага мендан яна пул талаб қилса-чи, деган гапларни айтди. Мен ҳайрон бўлдим ва синглимнинг алоқаси йўқлигини, мен билан олди-бердиси борлигини айтдим. У эса синглиси келсин, деб туриб олди. 20 август куни синглим қизининг тери касаллиги бўлгани учун муолажа олгани қизи билан Туркияга кетаётганди, Тошкентда аэропортда бўлган.
Кейин ходим қанча олиб келдингиз деганди, 6 минг доллар деди. Менга 6 300 доллар бериши керак бўлган. Мен 6 минг долларлиги учун пулни олмайман, санамайман, тўлиқ беришингиз керак эди, дедим. Мана, 6 300 доллар олиб келдим, ҳазиллашгандим, дея қўлимга пулни тутқазди. Пулни санасам 6 минг доллар чиқди. Пулни стол устига қўйиб, менга керак эмас бу, тўлиқ олиб келиши керак эди, деганимда ўша Улуғбек исмли ходим тушунтириш хати ёзиб бераверинг, эртага сизга ўз қўлим билан олиб бераман, дея мажбурлаб туриб олди. Хўп деб пулни олганим ҳақида ёзиб бердим. Шу пайт эшик олдида 6-7 нафар ходим сизга нисбатан тадбир ўтказилди, дея келиб, қўлларимдан бармоқ изларимни олиб, кишан таққан ҳолда мени вилоят ИИБга олиб кетишди”, дея ҳикоя қилади Моҳинур Холиқназарова.
Шу тариқа, ИИБ биносида Моҳинур Холиқназаровага нисбатан тезкор тадбир ўтказилган ва у қўлга олинган. Сўнгра Фарғона шаҳар ички ишлар бошқармаси бошлиғи Алишер Ашуровнинг укаси бўлган тезкор ходим Ойбек Ашуров назорати остида вилоят ички ишлар бошқармасига олиб кетилган. Фарғона вилояти ички ишлар бошқармасида Моҳинурдан тазйиқлар асосида синглиси Маҳлиё Умаровага нисбатан кўрсатма олишади.
Бу жараённи Моҳинур Холиқназарова шундай ҳикоя қилади:
“Йўлда кетаётганда Ашуров Ойбек орқа ўриндиқда, менинг ёнимда ўтирди, рулда Сотволдиев Аббос бўлган. Менга синглингга қарши кўрсатма берасан, унга ҳали кунини кўрсатиб қўямиз, у қиламиз, бу қиламиз, деб роса тазйиқлар ўтказишди. Мен ҳайронман, нима бўлаётганини тушунмаяпман. Ҳатто уйга қўнғироқ қилишимга рухсат беришмади, чақалоғим ва 10 ёшли болам қолиб кетган. Нима десам ҳам кўнишмади.
Вилоят ИИБга олиб боришганидан кейин ўзингизга адвокат чақиринг ёки биз ёллаб берамиз, дейишди. Олдин синглим таништирган Ҳаким ака исмли бир адвокат бор эди, ўша эсимга тушиб қолди. Синглингга қарши кўрсатма берасан, дейишаётгани учун айнан синглимнинг танишини чақирдим. Соат кечаси 24:00 лар бўлиб кетган чамаси. Адвокат келганидан кейин алоҳида қолганимизда унга шунақа ҳолат бўлди, синглингга қарши кўрсатма бер деб мени мажбурлашяпти булар, дедим. Нима дейишса айтганларини қилаверинг, болаларингиз уйда ёлғиз қолибди, уйга кетишингиз керак-ку, деди. Уларнинг айтганини қилишдан бошқа иложим қолмади.
Соат саҳар 6:00 ларгача кўрсатмани ёзиб, менга имзо қўйдиришди ва кейин мени қамоқхонага олиб кетишди. Қўйиб юбормоқчи эдинглар-ку, болаларим олдига боришим керак, десам ҳам ҳеч нарсага қулоқ солишмади. Сотволдиев Аббос ва Ашуров Аббос мени қамоқхонага олиб кетди.
Эртаси куни кечга яқин Сотволдиев Аббос қамоқхонадан олиб чиқди. Вилоят ИИБ ёнида озиқ-овқат дўкони бор экан, ўша ерга олиб бориб, кўрсатмада синглинг ҳақида бир-иккита нарсалар қолиб кетибди, ўшаларга ҳозир имзо қўйиб берасан, деди. Айнан ўлдирмоқчи, ёқмоқчи бўлган жойлари қолиб кетганини айтди. Мен синглимга унақа туҳмат қилмаслигимни айтдим. Қамоқхонага қайтиб боргинг келяптими, болаларингни кўргинг келмаяптими, камида 5 йилга қамаласан, агар қилмасанг ҳозир яна қайтариб қамоқхонага олиб бориб қўяман, деди. Имконим қолмади.
Кирдим. Ашуров Нурмуҳаммаднинг [Алишер ва Ойбек Ашуровларнинг амакиваччаси - таҳририят] хонасига олиб киришди. У пайтда Ашуров Нурмуҳаммад меҳнат таътилида бўлган экан. Менга меҳнат таътилида бўлсам ҳам айнан сенинг синглинг учун ишга келиб ўтирибман, деди. Қоғозларни чиқарди ва адвокатга имзо қўйдиришди. Адвокат ўқимасдан имзо қўйиб берди. Менгаям имзо қўйинг дейишганда нима ёзилганини ўқиб кўраман, десам, етмадими, яна қамоққа киргинг келяптими, деди. Имзо қўйиб беришдан бошқа иложим қолмади.
Сўнгра менга вилоят ИИБ бошлиғи ўринбосари Сотволдиев Акмал кўрсатмангни ўзгартирмайсан ва Назокат Шукурованинг жойидан нарсаларингни бугуноқ олиб чиқиб кетасан, дея шарт қўйди”.
Шу ўринда, Моҳинур Холиқназарова бу ишлар Алишер Ашуровнинг адовати сабаб содир бўлди, деган гумонга нега борганига тўхталиб ўтсак. Гап шундаки, 2-3 йил олдин Маҳлиё Умарованинг машинаси ёниб кетиши билан боғлиқ ҳолат содир бўлган. Алишер Ашуров ушбу иш доирасида Маҳлиё Умаровага 10 минг доллар тўлаб беришга мажбур бўлган. Фарғона шаҳар ички ишлар бошқармаси бошлиғи ушбу суммани бўлиб-бўлиб, сўнгги қисмини 2025 йил июл ойларида тўлаб берган. Kun.uz’да ушбу ишнинг тўлиқ тафсилоти мавжуд эмас.
Маҳлиёнинг қўлга олиниши
Маҳлиё Умарова 2025 йил 20 август куни касал фарзандини даволатиш учун Туркияга жўнаб кетишни режалаштирганди. Бунинг учун у авиачипта ҳам сотиб олганди.
Аммо тезкор ходимлар Маҳлиёни 20 август куни аэропортда қўлга олишган.
Жиноят ишлари бўйича Фарғона шаҳар судининг 2025 йил 22 августдаги ажрими билан Маҳлиё Умаровага нисбатан қамоққа олиш тартибидаги эҳтиёт чораси қўлланган. Аммо суд ажримида Маҳлиё Умарова 20 август эмас, 21 август куни соат 16:55 да ушлангани қайд этилган.
Шикоят учун қийноқ
Моҳинур Холиқназарова 2025 йил 29 август куни ички ишлар ходимларининг ҳаракатларидан норози бўлиб, вилоят прокуратурасига шикоят қилиб боради. Аммо прокуратурада унга эътирозлари бўйича вилоят ички ишлар бошқармаси раҳбариятига ариза топширишни айтишади.
Вилоят ички ишлар бошқармасига борган Моҳинур эса у ерда бир нечта ходимлар томонидан қийноққа солинганини айтмоқда.
“Менга шунча тазйиқлар ўтказишаётгани учун вилоят прокуратурасига ариза билан бордим. У ерда Матмусаев деган ходим кутиб олди ва аризамни ўқиб кўрди. Бўлган воқеани айтсам, бу ариза билан вилоят ИИБга борасиз, деди. Кейин ички ишларга кимгадир қўнғироқ қилди ва боринг, сизни кутиб олишади деб айтди.
Иложим қолмай, вилоят ИИБга бордим. У ерда мени аризаларни қабул қиладиган Шоҳрух исмли ходим кутиб олди. Қизим ва ўғлимни ҳам олиб боргандим. 2 соатлар атрофида кутиб ўтирдик. Кейин Тойиров дегани билан Сотволдиев Акмал ака кириб келишди. Мана бошлиқларимиз, шуларга ариза қилинг, деди. Мен ўзи Сотволдиев Акмал ва бошқа ходимларнинг устидан ариза қилиб борганман. Ўзларини ўзларига ариза қиламанми, дедим. Тойиров ва Сотволдиев Акмал бўпти, катта бошлиқнинг олдига олиб кирамиз сизни, дея ичкарига олиб кириб кетишди мени. 10 ёшли қизим кўчада қолди, олиб киришга рухсат беришмади. Чақалоғингни ҳам қизингнинг қўлига бер, дейишганди, лекин у эплолмайди, дея ўзим билан олиб кириб кетдим.
Сотволдиев Акмалнинг хонасига киришга роса мажбурлашди. Аммо у хонада менга қанча тазйиқ ўтказишган, дея киришга рози бўлмадим. Сўнгра Тойировнинг хонасига олиб киришди. Ўтириб туринг, бошлиқ кирса олиб кираман, деди. Хўп, дея қўлимда болам билан эшикнинг ёнида ўтирдим. Орадан 1-2 минут ўтди. Тойиров телефонда гаплашди. Кейин Сотволдиев Акмал бошчилигида 6-7 нафар ходим келиб, боламни қўлимдан юлиб, сенми ҳали бизнинг устимиздан ариза берадиган, дея тортишни бошлашди. Мен жон ҳолатда боламни беринглар, дея бақирдим. Қўрққанимдан иштоним ҳўл бўлиб кетди. Жон ҳолатда боламни қучоқлаб Тойировнинг ортига яширинишга ҳаракат қилдим. Боламни қўлимдан юлиб олишди.
Сўнгра Сотволдиев Аббос ўнг қўлимни қайириб, ушлади. Ҳумоюн исмли “опер” бор экан, у сочимдан юлиб, Тойировнинг хонасидан “коридор”нинг охирига, Ашуров Нурмуҳаммаднинг хонасига судраб олиб боришди.
У ерда қўлимга кишан солишди, “коридор”да боламни 2 соатдан кўпроқ йиғлатиб, ушлаб туришди. Сотволдиев менга ҳар хил ҳақоратли гаплар айтяпти, синглим ҳақида гапиряпти, унинг касрига сен қоляпсан дея тазйиқ ўтказди. Ҳатто бир қултум сув сўрасам беришмади. Иштоним ҳўл, кондиционерни менга қаратиб, ўшанинг тагига ўтирғизиб қўйишди. Совуқ қотяпман десам ҳам, ҳозир ҳушимдан кетаман, чидолмаяпман десам ҳам кондиционерни ўчиришмади. Сотволдиев Акмал ҳозир болангни оёғингнинг тагига ётқизиб қўяман, қўлинг кишанда йиғлашини томоша қилиб ўтирасан, деди. Мана, қамоқхонага олиб кетамиз ҳозир, дея компютерда нималарнидир ёзишди. Илтимос, нима десанглар қиламан, боламни беринглар ва мени чиқаринглар, дея шунақа ялиняпман, қулоқ солишмади. Чақалоғим 2 соатдан ошиқроқ эшикнинг тагида чирқираб йиғлагани учун ҳушидан кетди. Кейин қўлимни ечиб, келтириб беришди. Боламни қўлимга олгач озгинадан кейин ўзига келди.
Адвокатим сиз кираверинг, 5 минутда бораман деганди. У бемалол келгунча ҳамма нарса бўлиб бўлди. Кейин ёлғиз қолганимизда бўлган воқеани айтиб бердим. У мени тўғри тушунинг, қўлимдан ҳеч нарса келмайди, деди.
Терговчи Ашуров Нурмуҳаммад ўша пайтда Назокат Шукуровага қўнғироқ қилди ва ҳозир келинг, менинг назоратим остида нарсаларини олиб чиқиб кетади, деди. Назокат Шукурова бир соатдан ошиқроқ вақтда келди. Мен адвокатнинг машинасида борадиган бўлдим, Ашуров Нурмуҳаммад ўзининг машинасида. Мен машинага чиққандан кейин ҳушимдан кетдим. Буни кўриб, адвокат мени ота-онамнинг уйига олиб борган, ҳовлига”, дейди Моҳинур Холиқназарова.
Ички ишлар ходимлари опа-сингилга очилган “дело”ни шиширишга шу қадар ҳаракат қилишганки, ҳатто улар билан таниш бўлган фуқароларни чақириб, Маҳлиё Умаровага нисбатан туҳмат асосида кўрсатма беришни сўраган. Шулардан бири Ботир Эргашбоев. Ички ишлар ходимлари уни бошқармага алдаб чақириб, Умаровага нисбатан кўрсатма олишга уринишган. Буни унинг ўзи тасдиқлади.
“Маҳлиё Умарова шеригим, ҳамкорликда бирга иш қиламиз, саҳна безаклари билан шуғулланамиз. Уни 8 йилдан бери танийман. 19 август куни бирга Тошкентга бордик, гулларимиз кам эди, ўшаларни олдик. Кейин мен кетдим.
Бир ҳафтадан кейин ички ишлардан менга қўнғироқ қилишди. Фарғона шаҳрида ўғрилик бўлибди, дея ёлғондан чақиришди мени. Хўп, дея кечга вилоят ИИБга бордим. Ходим ўзини таништирмасдан телефонимни олиб қўйди. Сўнгра ичкарига олиб кириб, телефонимда шахсий нарсаларимни кўришни бошлади. Кейин опанинг профилига кириб, менга сиз етиб келдингиз, деди. Қаерга етиб келдим, дедим. Маҳлиё Умарова сизга ким бўлади, деб сўради. Опам бўлади, дея жавоб бердим. Маҳлиё Умарова опаси билан бир аёлни қаергадир олиб бориб, қўрқитишибди, деди. Нима дейишибди, десам, болаларинг болаларимнинг қўлида, агар мана шу нарсани тан олсанг қўйиб юборишади, йўқ десанг ўлдиришади, деб айтган, деди менга. Бўлиши мумкин эмас, анчадан бери танийман, ходим бўлатуриб (Маҳлиё Умарова олдин Миллий гвардияда ишлаган - таҳририят) бировни шанташ қилмайди-ку дедим.
Сенга қўнғироқ қилиб, болаларингиз менинг қўлимда, дея гапириб беришни сўраганини айтасан, деди. Бу мавзуда гаплашмаганмиз, менга буйруқ шаклидаям, илтимос кўринишида ҳам унақа демаган, дедим. Унда ўтирасан, яхшилаб ўйла, деди. Унақа демаган, десам ҳам бир соатдан ортиқ олиб ўтирди. Унда олиб кириб, қамаб қўяман, деди. Қамасангиз қамайверинг, лекин унақа гаплар бўлмаган, дедим. Эртага чақираман унда, яхшилаб ўйлаб кел, дея жўнатиб юборди. Шундан кейин менга қайтиб қўнғироқ қилишмади”, дейди Ботир Эргашбоев.
Ички ишлар ходимлари бошқа шахсларга ҳам чиқиб, опа-сингилга нисбатан кўрсатма беришни сўраган. Kun.uz’да бунга доир аудиолар ҳам мавжуд.
Опа-сингил товламачими?
Моҳинур Холиқназарова ва Маҳлиё Умаровага нисбатан Жиноят кодексининг 165-моддаси 2-қисми “в” банди, яъни товламачилик жиноятининг бир гуруҳ шахслар томонидан олдиндан тил бириктириб содир этилиши билан жиноят иши қўзғатилган. Хўш, опа-сингил товламачими? Албатта, буни тергов органи ва суд ҳал қилади. Аммо уларнинг ҳаракатида товламачилик жиноятига ёпишмаётган бир нечта жиҳатлар бор.
Гап шундаки, товламачилик бу жабрланувчига ёки унинг яқин кишиларига зўрлик ишлатиш, мулкига шикаст етказиш ёки уни нобуд қилиш ёхуд жабрланувчининг ахборот ресурсини йўқ қилиш, ўзгартириш, эгаллаб олиш ёки тўсиб қўйиш, ёки жабрланувчи учун сир сақланиши лозим бўлган маълумотларни ошкор қилиш, уни шарманда қиладиган уйдирмалар тарқатиш билан қўрқитиб ўзгадан мулкни ёки мулкий ҳуқуқни топширишни, мулкий манфаатлар беришни ёхуд мулкий йўсиндаги ҳаракатлар содир этишни талаб қилиш ёхуд жабрланувчини ўзининг мулкини ёки мулкка бўлган ҳуқуқини беришга мажбур қиладиган шароитга солиб қўйишдир.
Олий суд пленуми қарорига кўра, товламачиликда ўзганинг мулкини ёки мулкий ҳуқуқни топширишни, мулкий манфаатлар беришни ёхуд мулкий йўсиндаги ҳаракатлар содир этишни тақозо қилишини судлар эътиборга олишлари керак. Шу сабабли, қарздордан қарзни талаб қилиш Жиноят кодексининг 165-моддаси билан тавсифланиши мумкин эмас, лекин айрим ҳолларда ўзбошимчалик тариқасида баҳоланиши лозим.
Маҳлиё Умаровага қамоқ эҳтиёт чораси қўллаш ҳақида суд ажримида келтирилишича, Назокат Шукурова 11 август куни Фарғона вилояти ички ишлар бошқармаси бошлиғига ариза билан мурожаат қилиб, Моҳинур ва Маҳлиё “унинг мулкини товламачилик йўли билан қўлга киритиш мақсадида Chery машинасида Қува туманида жойлашган Каркидон сув омбори яқинидаги овлоқ жойга олиб боришиб, автомашина ичида зўрлик ишлатишиб, уйини фарзандларига қўшиб ёқиб юборишларини, ўзини шу ерда ўлдириб юборишларини айтиб қўрқитиб, мулкни топшириш ёхуд мулкий манфаатлар беришни талаб қилишиб, жабрланувчини ўз мулкини беришга мажбур қиладиган шароитга солиб қўйишган”ини билдирган. Моҳинурнинг ИИБ биносида тезкор тадбирда ушланишига, Маҳлиёнинг фарзандини даволатиш учун Туркияга олиб кетаётган бир пайтда аэропортда қўлга олинишига Назокат Шукурованинг мана шу аризасигина асос бўлган.
Моҳинур Холиқназарованинг сўзларига кўра у Назокат Шукуровадан ўз пулини сўраган. Ва Моҳинур Холиқназарова Шукурованинг жойини ижарага олгани ва таъмирлагани факт. Буни ҳатто Назокат Шукурованинг ўзи ҳам инкор қилмаяпти. Қолаверса, агар Моҳинур Назокат Шукуровадан ўз пулини эмас, товламачилик йўли билан унинг мулкини қўлга киритишни мақсад қилганида пулни олиш учун ҳеч қандай шубҳа қилмасдан айнан ИИБ биносига ўз оёғи билан борармиди, деган савол ҳам ўртага чиқади.
Қолаверса, Назокат Шукурова фуқаролик ишлари бўйича Фарғона туманлараро судига киритган даъво аризасида ҳам Моҳинур Холиқназаровага 3 та хонани ойига минг долларга ижарага берганини, у хоналарни таъмирлаганини, ўртада низо келиб чиққач Моҳинур унга таъмир учун 3-4 минг доллар ишлатганини айтиб, бошқа ижарачидан пулини олиб беришни сўраганини ва у бунга кўнмаганини билдирган. Бундан келиб чиқадики, икки аёл ўртасидаги низога сабаб бўлган пул олди-бердиси ҳақиқатан хоналарнинг таъмир қилинган ҳаражати билан боғлиқ.
Назокат Шукурова нима дейди?
Kun.uz иккинчи томонни ҳам эшитиш мақсадида Назокат Шукурова билан боғланди. Аммо у таҳририятнинг интервю бериш ҳақидаги таклифини ҳозирда “аҳволи оғирлиги”ни айтиб, рад этди.
Назокат Шукуровага кўра, Моҳинур ва Маҳлиё исмли аёллар унга туҳмат қилишган ва “ўлдириб юбориш билан қўрқитиб”, тилхат ёздириб олишган.
“Ёлғончи, туҳматчи бу қизлар. Бекордан бекорга қамаб қўймайди-ку. Менинг ижара жойимда туришган. Кейин бир-икки ой ишлагандан кейин баҳонага ўтди. Улар фақат шунақа экан, бориб кимларнингдир биносини ижарага олиб, 5-6 млн сўм сарфлаб қўяр экан-да, кейин бунча пул сарфладим деб шантаж қилишга тушаркан.
Асосан уларнинг «клиенти» эркаклар бўлган. Энди менга рўпара келгани учун тўғриси бунақа пулни бера олмадим уларга. Мен ўзим кредитга қурганман. Минг доллар олганман бошида «заклад» учун. Учта хонани минг долларга бергандим-да. Ойма-ой беришмади.
Орада қарасам, ўша “ремонт» қилиб, бошқа қилиб, опа, қўйиб беринг, бошқа-бошқа дейди. Бор десам бўларкан, раҳмдиллик қилиб, бир ярим ой олмадим ўртада. Кейин июн ойида менга 10 млн сўм пластик картамга ўтказиб берди. Кейин яна баҳона қилишга тушди, ишим юрмаяпти, мен умуман ишламайман, у-бу. Нима қилай, десам ижарага қўяйлик, мен ўзим ўша пулни олиб, сизга бераман, деди. Ҳа, қўй, дедим. Қўя олмади. 2-3 одам келди, уларга 2-3 минг берасан, мен шунча пул сарфлаганман деган экан, кетиб қолишди.
Кейин яна менга ялинишга тушди ўзингиз қўйинг деб. Сўнг эълон бердим, бирпасда одам келади-да, яхши жой. Бир қиз келиб, оламан, деди. Кейин бу битта хонани бермайман, дейишга тушиб олди. Ўзимда олиб қоламан, деди. Нимага мен сизга текинга беришим керак, дедим. Бўлмасам пулимни берасиз, чиқиб кетаман, деди. Неча пул берай десам, 2 минг доллар деди. Хуллас шантаж қилишга тушди. Бунча берасан, дейишга тушганди, бермайман, бор дедим.
Кейин бир кун чақирди. Унгача Telegram’дан ёзди бунча берасиз деб. Охири 2 800 га чиқди. Яна бир балолар дейишга тушди. Эътибор бермабман тўғриси, мен энди улар унчалигини билмаганман.
Бир кун соат 12:00 ларда опа, мен келдим, тушинг, нарсаларимни олиб кетаман, бўпти ўша минг долларга розиман, деди. Менинг қўлимда ҳозир 500 доллар пул бор, олсангиз ўшани бераман, бўлмасам бемалол, қаерга борсангиз бораверинг, дедим.
Тушсам, чиқинг машинага, ҳозир ўша 500 долларни бераверасиз, деди. Кейин шундай машинасига чиқсам, мени олиб кетиб юборишди. Қаерга олиб кетяпсизлар, десам, ҳозир борамиз, гаплашиб оламиз сиз билан, яхши гапга кўнмас экансиз, дея мени қўрқитишга тушди. Ўлдириб ташлаймиз, у-бу қиламиз, деб эркакларга телефон қилишди. Ёш болам уйда қолганди. Биттасига телефон қилиб, «боласи уйда қолибди, бориб кириб, ўлдириб, ёқиб ташла уй билан», деди. Кейин яна бир эркак кишига телефон қилиб, тайёрланиб туринглар, «клиент» олиб боряпмиз, деб айтди. Кейин мен қўрқишни бошладим, чунки ўзи юрагим яхши эмасди.
Овлоқ, битта дала жойга олиб боришди. Қаерга эканини эслолмайман, чунки ўзимда эмасдим. Унгача менга роса тазйиқ қилишди эрингга телефон қиламиз деб.
Бўпти, мен нима қилай, дедим. Тилхат ёзиб берасан, шунча пулни бизга тўлайсан 3 кун ичида, дейишди. Ҳа, бўпти, деб ёзиб бердим, рози бўлдим. Кейин қўлимдаги 500 долларимгача олиб қўйишди. Шу билан кейин мени ташлаб кетишди.
Тўғриси, шунақа чарчадим бу ифлослардан. Шунақа ёзишяпти. Ички ишлар ходимлари устидан ҳам ёзяпти. Жиянларим ишлашади, безор бўлдик, опа, бошлиқларимиз безор бўлди, деяпти”, дейди Назокат Шукурова.
“Дело” Тошкентга ўтказилган
Моҳинур Холиқназарова ҳолат юзасидан сайёр қабулда ички ишлар вазирига мурожаат этган. Унинг мурожаатидан сўнг жиноят иши тергови Фарғона вилоятидан Тошкент шаҳрининг Миробод тумани ИИБга ўтказилган. Ҳозирги кунда жиноят иши доирасида тергов ҳаракатлари олиб борилмоқда.
Kun.uz вакиллари ушбу ҳолат юзасидан ички ишлар вазирлигида бўлиб, тегишли масъуллар билан учрашди. У ерда Моҳинур Холиқназарова айтаётган далилларнинг ҳеч бири инкор қилинмади. Аксинча, Фарғонада ички ишлар ходимлари у ва синглисига нисбатан эҳтиёт чораси қўллашда ошириб юборишгани, терговда хатоликлар борлиги, шу сабабли жиноий иш тергови Тошкент шаҳрига ўтказилгани билдирилди.
Маълум қилинишича, ички ишлар вазири томонидан мазкур жиноят ишининг ҳар томонлама, тўла ва холисона тергов қилинишини таъминлаш мақсадида уни Тошкент шаҳар ички ишлар бош бошқармаси ҳудудий тергов бўлимига ўтказиш ҳақида кўрсатма берилган. Ҳозирда жиноят иши Миробод тумани ички ишлар органлари фаолиятини мувофиқлаштириш бошқармаси ҳузуридаги тергов бўлими иш юритувига олинган бўлиб, Тергов департаментининг алоҳида назорати остида тергов ҳаракатлари олиб борилмоқда.
Тергов жараёнида барча далиллар синчковлик билан ўрганилаётгани, фуқаролар томонидан билдирилган важлар текширилаётгани ҳамда натижасига кўра қонуний ва адолатли қарор қабул қилиниши таъминланиши билдирилди.
