O‘zbekistonda havo tozalagichga talab keskin oshdi

So‘nggi kunlarda O‘zbekiston aholisining Google'dan “havo tozalagich” so‘zini izlashi rekord darajada ko‘paydi. Kun.uz'ning e’tibor qaratishicha, o‘tgan hafta bu tendensiya birdaniga katta sakrashni amalga oshirgan. Bundan avvalgi rekord 2021 yil noyabrining ilk haftasida o‘rnatilgan, o‘shanda Toshkentda misli ko‘rilmagan chang bo‘roni bo‘lgan edi. Bojxona statistikasiga ko‘ra, havo tozalagichlar importi 3 yilda 9 barobarga oshgan.

Foto: Ben Hasty / MediaNews Group / Reading Eagle via Getty Images

O‘zbekistonda havo sifati yomonlashib borayotgani ortidan, maishiy havo tozalagichlarga talab keskin oshib bormoqda. Kun.uz e’tibor qaratgan Google qidiruv tizimi ma’lumotlari va bojxona statistikasi shundan darak beryapti.

Google Trends'ga ko‘ra, 2025 yil noyabr oyiga qadar “ochistitel vozduxa” (havo tozalagich”) so‘zi O‘zbekiston hududida eng ko‘p qidiruvga berilgan hafta – 2021 yil noyabr oyining birinchi haftasi bo‘lgan. O‘shanda Toshkent shahrida misli ko‘rilmagan chang bo‘roni kuzatilgan, eshik-derazalari yopiq uy ichkarisida ham nafas olish qiyinlashib ketgan edi.

Sog‘liqni saqlash vazirligiga ko‘ra, 2021 yil 4 noyabr kuni Toshkent shahrida 678 kishi nafas qisishi bilan bog‘liq muammolar sabab tez yordamga murojaat qilgan, ulardan ayrimlari kasalxonaga yotqizilgan.

Shundan keyin, Google Trends'ning ko‘rsatishicha, 2023 yil yanvar oyidan boshlab havo tozaligich qidiruvlari soni oshib borgan. 2025 yil noyabr oyining ikkinchi haftasiga kelib, to‘rt yil oldingi chang bo‘roni paytida o‘rnatilgan rekord yangilangan. So‘nggi ikki kunda (16-17 noyabr kunlari) esa bu rekord mutlaq yangilangan.

Bojxona qo‘mitasi statistikasiga ko‘ra, O‘zbekistonga maishiy havo tozalagichlar importi oxirgi 3 yilda 9 barobarga oshgan. 2022 yilda bunday mahsulotlardan 2 mingta olib kirilgan bo‘lsa, 2025 yilning o‘n oyida jami qiymati 1,3 mln dollarlik 18,5 mingdan oshiq havo tozalagich import qilingan.

Ma’lumot uchun, havo tozalagichlar (TIF TN kodi 8509) importi uchun 20 foiz, lekin har bir donasi uchun 3 dollardan kam bo‘lmagan miqdorda import boj o‘rnatilgan.

Qayd etish lozim, 2025 yil oktyabr oyidan boshlab O‘zgidromet deyarli har kuni ko‘chaga niqob taqib yurish haqida tavsiya berib bormoqda.

Havo sifatini yoritib boruvchi IQAir portalida O‘zbekiston shaharlarining kuzatuvchilari soni

Ayni paytda, IQAir portali va ilovasida ham O‘zbekiston shaharlaridagi havo sifatini kuzatib boruvchilar oshib boryapti. Portalning Toshkent shahri bo‘yicha obunachilari soni 600 mingga yaqinlashib qolgan.

Avvalroq Toshkentda ijod qiluvchi Inkuzart taxallusli ko‘cha rassomi yangi strit-artini ayni shu mavzuga bag‘ishlagan edi. U chizgan suratda odamlar ko‘chada gazga qarshi niqob taqib yurganini ko‘rish mumkin.