Hongkongdagi yong‘in qurbonlari 140 nafardan oshdi. Xitoy namoyishlar boshlanishidan xavotirda

Hongkongda ko‘p qavatli uylar majmuasidagi yong‘in kelib chiqishining sabablari bo‘yicha tergov davom etmoqda. Bu jarayon — aholining yong‘in xavfi haqidagi ogohlantirishlari e’tiborsiz qoldirilgani va xavfsiz bo‘lmagan qurilish amaliyotlaridan dalolat beruvchi ma’lumotlar fonida kechmoqda.

Yakshanba kunga kelib tasdiqlangan qurbonlar soni 146 nafarga yetdi. Ayrim jasadlar zinapoyalarda va tomlarda topilgan — ular fojiadan qochib-qutulishga uringan bo‘lgan. Politsiyaga ko‘ra, 79 kishi jarohat olgan, shuningdek hali ham yuzga yaqin inson bedarak yo‘qolgan.

Wang Fuk Court turar joy majmuasi yaqinidagi kanal bo‘ylab bir kilometrdan ortiq navbatda turganlar qurbonlar xotirasiga oq gul qo‘ymoqda.

Reuters mahalliy muxbirlarining aytishicha, Hongkongning shimolidagi Tai Po tumanida to‘rt kun o‘tgach ham havoda tutun isi sezilib turgan. Qurbonlar orasida yetti nafar indoneziyalik uy xizmatchisi va bir filippinlik yordamchi ham bor. O‘nlab mehnat migrantlari hanuz bedarak yo‘qolgan.

Noroziliklar va Xitoyning bosimi

Xitoy materigi bilan chegaraga yaqin joylashgan binolardagi yong‘in Hongkongni larzaga soldi. Rasmiylar jinoyat va korrupsiya bo‘yicha tergovni boshlagan. Hokimiyatlar yong‘in bilan bog‘liq holda 11 kishini hibsga olgan. Tergov ta’mir jarayonida ehtimoliy korrupsiya va xavfli materiallar qo‘llanganini o‘rganmoqda.

Qutqaruv ishlari juma kuni yakunlangan bo‘lsa-da, politsiya xavfli, kuyib ketgan binolarni birma-bir ko‘zdan kechirishi davomida yana jasadlar topilishi mumkinligini aytmoqda. Bu jarayon uch-to‘rt hafta davom etishi ehtimoli bor.

Reutersʼning ikki manbasiga ko‘ra, politsiya shanba kuni — mustaqil tekshiruv o‘tkazish, ehtimoliy korrupsiya va qurilish nazoratini qayta ko‘rib chiqishni talab qilib, petitsiyani boshlab bergan 24 yoshli Mayls Kvanni hibsga olgan. Hongkong politsiyasi holat yuzasidan izoh bermadi.

Faollar guruhi tomonidan internetda e’lon qilingan petitsiya shanba kuni tushga qadar 10 mingdan ortiq imzo to‘pladi va so‘ng yopildi.

Shundan so‘ng Tai Po'da yashaydigan, xorijda istiqomat qiluvchi boshqa bir fuqaro tomonidan shunga o‘xshash talablar bilan ikkinchi petitsiya boshlangan.

Xitoy milliy xavfsizlik idorasi shanba kuni ayrim shaxslarni bu ofatni — Hongkongni yana «xaosga tortish» uchun ishlatmaslik haqida ogohlantirdi. 2019 yildagi shunday noroziliklar Pekin bilan Hongkong o‘rtasida keskin siyosiy inqirozni keltirib chiqargan edi.

«Biz ofat orqali Hongkongni izdan chiqarishni ko‘zlayotgan anti-xitoy kuchlarini qat’iyan ogohlantiramiz. Qaysi usulda bo‘lmasin, siz albatta, Milliy xavfsizlik to‘g‘risidagi qonun doirasida javobgar bo‘lasiz va qat’iy jazolanishingiz shubhasiz», deyiladi idora bayonotida.

Shuningdek, idora — Hongkong hukumatiga ushbu falokat bilan bog‘liq «tartibsizlik keltiruvchi» harakatlarga qarshi «qat’iy chora ko‘rishda» yordam berishini bildirdi.

Ma’lumot uchun, Hongkong — 1997 yilda Buyuk Britaniyadan Xitoy tarkibiga qaytarilgan va Pekin tomonidan «Maxsus ma’muriy hudud» shaklida boshqariladi.

26 noyabr, chorshanba kuni tushdan so‘ng boshlangan yong‘in — yashil to‘rlar va bambuk konstruksiyalari sababli 32 qavatli yetti minorani tezlik bilan qamrab olgandi. Binolarning tashqi qismiga issiqlik izolyatsiyasi uchun qo‘yilgan ko‘pikli qatlamlar ham yong‘inga «yordam bergani» aytilmoqda.

Bu yong‘in Hongkongda 1948 yildagi ombor yong‘inidan beri eng ko‘p talafot keltirgani qayd etilmoqda. O‘sha fojiada 176 kishi halok bo‘lgan edi.