Instagram’da xavfsizlik kuchaydi: endi akkauntni qaytarish ancha soddalashdi

Meta Instagram va Facebook uchun yagona yordam markazini ishga tushirdi. U profil bilan bog‘liq muammolarni, jumladan, hakerlik hujumidan keyin qayta kirishni tiklash imkoniyatlarini bir joyga jamlaydi. Bo‘lim iOS va Android ilovalariga qo‘shilgan va dunyo bo‘ylab foydalanuvchilarga bosqichma-bosqich chiqyapti.

Markaz orqali shubhali faollik haqida xabar berish, tiklash so‘rovini yuborish va sun’iy intellekt asosida tezkor javob olish mumkin. Ilgarigi murakkab yo‘l yordam xizmatigacha borishni qiyinlashtirardi, endi esa zarur funksiyalar vaziyatga qarab avtomatik ravishda chiqadi.

Xavfsizlik algoritmlari ham yangilandi. Kompaniya so‘nggi bir yilda yangi buzilishlar 30 foizdan ko‘proqqa kamayganini aytadi. Tizim kirish urinishlarini doimiy kuzatadi va shubhali harakatlarni profilga zarar yetkazishidan oldin to‘xtatadi.

Tiklash jarayoni endi moslashuvchan holda ishlaydi. Tizim odatiy qurilmangizni, doim kirib turadigan joylaringizni yaxshi tanib oladi. Agar shubhali holat kuzatilsa, foydalanuvchiga SMS yoki email ogohlantirishlari yuboriladi. Ayrim hollarda kodni kiritish kifoya, boshqa vaziyatlarda qisqa selfi-video so‘ralishi mumkin. Bu majburiy emas, lekin shaxsni aniqlashni osonlashtiradi.

Ilovaning Security Checkup bo‘limi ham yangilangan. Endi ikki bosqichli himoyani yoqish, faol sessiyalarni tekshirish va keraksiz qurilmalarni o‘chirish yanada qulay. Shuningdek, parol o‘rniga passkey texnologiyasi, ya’ni barmoq izi, yuzni tanish yoki PIN orqali kirish tavsiya etilmoqda. Bu firibgarlarga imkoniyat qoldirmaydi.

Texnologiyalar tez o‘zgarayotgan bugungi kunda eng so‘nggi yangiliklardan xabardor bo‘lish muhim. Raqamli dunyoda adashib qolmaslik va shunday yangiliklarni birinchilardan bilish uchun KUN.UZ Texnologiya Telegram sahifasini kuzatib boring