Qozog‘istonda avtobusdagi YTH oqibatida ikki o‘zbekistonlik halok bo‘ldi

Qozog‘istonning Aqto‘be oblastida sodir bo‘lgan yo‘l-transport hodisasi oqibatida O‘zbekistonning ikki nafar fuqarosi halok bo‘ldi. O‘zbekiston FVV xabarida qayd etilishicha, voqea 7 dekabr kuni soat 08:57 da Aytekebi rayonidan o‘tgan respublika ahamiyatidagi avtomobil yo‘lining 1028-kilometrida sodir bo‘lgan. Perm – Toshkent yo‘nalishida harakatlangan Yutong yo‘lovchi avtobusi yon tomonga ag‘darilgan.

YTH oqibatida avtobusda bo‘lgan 49 nafar yo‘lovchidan 5 nafari vafot etgan, ulardan 2 nafari O‘zbekiston fuqarosi bo‘lgan.

Vazirlik mas’ul vazirlik va idoralar bilan birgalikda ishchi guruh tuzgan holda vafot etganlarni vatanga olib kelish va dafn marosimlarini o‘tkazishda yordam ko‘rsatish bo‘yicha barcha zarur choralar ko‘rayotganini bildirdi.

«Hozirda mas’ul xodimlar qozog‘istonlik hamkasblari bilan doimiy aloqada bo‘lib, baxtsiz hodisaning kelib chiqish sabablarini o‘rganish bo‘yicha hamkorlik ishlarini olib bormoqda», – deyiladi xabarda.