AP: Malida Afrika korpusi «Vagner»ga o‘xshash «yondirilgan yer» taktikasini qo‘llamoqda

Malida tinch aholi Rossiya Mudofaa vazirligiga qarashli, mahalliy armiya bilan hamkorlik qilib kelayotgan Afrika korpusini aholiga nisbatan shafqatsizliklarda ayblamoqda. Jang harakatlaridan qochgan o‘nlab maliliklar qatl, zo‘rlash, odam o‘g‘irlash va zo‘ravonlikning boshqa holatlari haqida so‘zlab berdi, deb xabar qildi Associated Press agentligi yakshanba, 7 dekabr kuni.

Jurnalistlar so‘nggi oylarda Mavritaniya chegarasi yaqiniga ko‘chib o‘tgan minglab maliliklar joylashgan hududda 34 nafar kishi bilan suhbatlashgan. Ularga ko‘ra, Afrika korpusi aholini qo‘rqitish va zo‘ravonlikka asoslangan taktikaga tayanadi, bu esa mamlakatda avval faoliyat yuritgan «Vagner» XHK usullarini eslatadi.

«Bu — “yondirilgan yer” taktikasi. Askarlar hech kim bilan gaplashmaydi. Ko‘rgan har bir odamga o‘q uzadi. Na savol beriladi, na ogohlantiriladi. Odamlar ularni nima uchun o‘ldirishayotganini ham bilmaydi», — dedi Malidagi qishloqlardan birining oqsoqoli.

Suhbatdoshlardan ikkisi jurnalistlarga «oq tanli odamlar» tomonidan yoqib yuborilgan qishloqlar aks etgan videoyozuvlarni ko‘rsatgan. Yana ikki kishi esa yaqin qarindoshlarining jasadlarini ichki a’zolarisiz — jigar va buyraklarisiz topganini ma’lum qilgan.

RF Mudofaa vazirligining Afrika korpusi Mali armiyasiga «Al-Qoida» va IShID bilan bog‘liq guruhlarga qarshi kurashda yordam bermoqda. Ilgari bu vazifalarni «Vagner» XHK yollanma jangchilari bajargan, ammo yoz faslida mamlakat hokimiyati mazkur tuzilma Malidagi ishtirokini to‘xtatishi va uni Rossiya Mudofaa vazirligining bo‘linmalari almashtirishi haqida bayonot bergan edi.