Kun.uz Toshkent viloyati Piskent tumanidagi Toshkent dengiziga yaqin hududda ko‘plab daraxtlar kesib tashlanganiga oid videomurojaatni e’lon qilgach, viloyat ekologiya va iqlim o‘zgarishi bosh boshqarmasi rasmiy munosabat bildirdi.
Qayd etilishicha, o‘rganish davomida «Lolariq» MFYdagi “Yangi zamin bog‘dorchilik va uzumchilik shirkati” hududida joylashgan fermer xo‘jaligiga qarashli maydonning dala chetida o‘sib turgan 24 tup tol daraxti hech qanday ruxsatnomasiz noqonuniy ravishda kesib tashlangani aniqlangan.
Shu sabab boshqarma fermer xo‘jaligi rahbaridan tushuntirish xati olgan va dalolatnomani rasmiylashtirgan. Tabiatga yetkazilgan zarar 218 566 000 so‘m miqdorida hisoblangan va rahbar jarimaga tortilgan.
Ma’lum qilinishicha, holatga huquqiy baho berish uchun to‘plangan hujjatlar Toshkent viloyati prokuraturasiga yuboriladi.
