10 000 mA·soat, ventilyator va flagman chip: Honor Win nimasi bilan shov-shuv bo‘lmoqda?

Honor yaqin kunlarda o‘zining ilk geyming smartfoni Honor Win’ni rasman taqdim etadi. Ammo jurnalistlar qurilmani oldindan ko‘rib chiqishga ulgurgan va u allaqachon shov-shuvga sabab bo‘ldi. Sababi oddiy. Smartfonda 10 000 mA·soatli ulkan batareya bor.

Foto: GSMARENA

Eng qizig‘i shundaki, bunday katta batareyaga qaramay, Honor Win qalin yoki og‘ir ko‘rinmaydi. GSMArena jurnalistlarining aytishicha, u kichikroq batareyali geyming telefonlardan deyarli farq qilmaydi. Qo‘lda ushlaganda noqulaylik sezilmaydi.

Ichida flagman Snapdragon 8 Elite Gen 5 protsessori ishlaydi. Kuchli chip qizib ketmasligi uchun korpus ichiga kichik ventilyator joylashtirilgan. Shu bilan birga, smartfon IP69K standarti bo‘yicha suv va changdan himoyalangan.

Honor kompaniyasi qurilma testlarda 4,4 million ball olishini da’vo qilmoqda. Bu hozircha mustaqil tekshirilmagan, ammo ko‘rsatkich juda jiddiy. Smartfon 16 GB LPDDR5X tezkor xotira va UFS 4.1 ichki xotira bilan jihozlangan.

Geyming smartfon bo‘lsa ham, Honor Win kamera masalasini e’tiborsiz qoldirmagan. Qurilmada uchta kamera bor va ulardan biri 3 karra optik zumga ega telekamera hisoblanadi. Bu o‘yin telefonlari orasida kam uchraydigan yechim.

Texnologiyalar tez o‘zgarayotgan bugungi kunda eng so‘nggi yangiliklardan xabardor bo‘lish muhim. Raqamli dunyoda adashib qolmaslik va shunday yangiliklarni birinchilardan bilish uchun KUN.UZ Texnologiya Telegram sahifasini kuzatib boring.

Tayyorlagan: Аббос Юсуфжонов

#smartfon #Honor #Win