Statistika: kiyim ishlab chiqarishda Andijon birinchi o‘rinda

Milliy statistika qo‘mitasi e’lon qilgan ma’lumotlarga muvofiq, 2025 yilning yanvar–noyabr oylarida O‘zbekistonda yirik korxonalar tomonidan 37,9 trln so‘mlik kiyimlar ishlab chiqarilgan. Qayd etilishicha, ushbu ko‘rsatkich 2024 yilning shu davriga nisbatan 24,3 foizga oshgan.

Hududlar kesimida esa kiyim ishlab chiqarish bo‘yicha eng yuqori ko‘rsatkich Andijon viloyatiga to‘g‘ri kelgan — 17,2 trln so‘m. Keyingi o‘rinlarni Namangan viloyati (3,7 trln so‘m) va Toshkent viloyati (3,6 trln so‘m) egallagan. Toshkent shahrida bu ko‘rsatkich 2,6 trln so‘mni tashkil etgan.

Shuningdek, Farg‘ona viloyatida 2,2 trln so‘mlik, Navoiy viloyatida 1,9 trln so‘mlik, Qashqadaryo viloyatida 1,6 trln so‘mlik, Buxoro viloyatida 1,5 trln so‘mlik kiyim mahsulotlari ishlab chiqarilgan. Samarqand viloyatida ushbu yo‘nalishdagi ishlab chiqarish hajmi 1,2 trln so‘mga teng bo‘lgan.

Qolgan hududlarda ko‘rsatkichlar quyidagicha qayd etilgan: Surxondaryo viloyati — 562 mlrd so‘m, Jizzax viloyati — 524,1 mlrd so‘m, Qoraqalpog‘iston Respublikasi — 497,4 mlrd so‘m, Sirdaryo viloyati — 390,6 mlrd so‘m, Xorazm viloyati — 387,8 mlrd so‘m.

Ma’lumotlarga ko‘ra, keltirilgan raqamlar 2025 yilning 11 oyi — yanvardan noyabrgacha bo‘lgan davrni qamrab oladi.