Namanganda ishchi vafot etgan sement zavodida mehnat muhofazasi talablari buzilgan - Mehnat inspeksiyasi

Namangan tumanidagi sement zavodi xodimining vafoti haqida Kun.uz e’lon qilgan materialdan keyin, Mehnat inspeksiyasi tekshiruv o‘tkazdi.

Kun.uz 5 yanvar kuni e’lon qilgan materialda aytilganidek, sement ishlab chiqaruvchi “Toshbuloq invest group” MChJning maxsus qorishma saqlanadigan balandligi 17 metrli maxsus “bunker”iga tushirilgan 18 yoshli ishchisi Bahrom Hoshimov tozalash vaqtida vafot etgan. Baxtsiz voqeani tekshirish bo‘yicha maxsus komissiya hodisaga ishchining o‘zi aybdor ekani haqida xulosa tuzgan.

Mehnat inspeksiyasining ma’lum qilishicha, holat yuzasidan 8–16 yanvar kunlari qayta tekshiruv o‘tkazilgan.

“Tekshiruv natijalariga ko‘ra, baxtsiz hodisa sabablari qayta rasmiylashtirildi hamda mehnatni muhofaza qilish bo‘yicha tegishli qonunchilik talablarini bajarmasdan, ushbu sabablarning kelib chiqishiga yo‘l qo‘ygan mansabdor shaxslarga nisbatan rasmiylashtirilgan tekshiruv materiallari huquqni muhofaza qilish organlariga yuborildi.

Shuningdek, “Toshbuloq invest group” MChJ tomonidan marhum Hoshimov Bahrom Bahodir o‘g‘lining oila a’zolariga (ota-onasi, akasi va ukasiga) 500 million so‘m miqdordagi zarar pullari to‘lab berildi”, – deyiladi inspeksiya axborotida.