Koreyada 1904-yildan beri eng issiq harorat qayd etildi – 42,5 gradus. Prezident buni milliy falokat deya atadi. Katta kompaniyalar esa o‘z xodimlariga 10 kungacha mehnat ta’tili berdi, hattoki ular xorijga ham kompaniya hisobidan dam olishga jo‘natilgan. Koreyada ta’tilni iqtisodiy zarar emas, mehnat huquqining bir qismi va kelajakka investitsiya deb qabul qilishadi, deydi Kun.uz bilan gaplashgan Seuldagi tadqiqotchi Doniyor Boboyev.
Ko‘p davlatlar qatori shu kunlarda Koreya Respublikasida ham o‘ta issiq yoz hukmron. 1904-yildan beri bu mamlakatda eng yuqori havo harorati qayd etildi, bu – 42,5 gradus. Prezident Li Chjye Myong vaziyatni milliy falokat deb atagan. Davlat xodimlarga yoppasiga ta’til bermasada, ular uchun zarur mehnat sharoitlarini yaratish, aholi uchun esa issiqdan himoyalanish vositalarini tashkil qilishda juda faol bo‘lmoqda.
Doniyor Boboyev bugun Koreyaning Joongbu xalqaro universitetida tadqiqotchi, koreys kompaniyasida ishlaydi. Kun.uz bilan suhbatda aytishicha, havo rostdan ham har yilgidanda issiq. Ayniqsa, mamlakatning okeanda joylashgani hisobga olinsa, namlik sabab issiq havo yashash uchun karrasiga noqulay.
Lekin Koreya hukumati va hududlar hokimliklari odamlar uchun qo‘lidan kelganini qilmoqda. Jumladan, avtobus bekatlarida sovutish moslamalari, ko‘chalarda salqinlash xonalari, avtobus ichida va tegishli nuqtalarda bepul salqin ichimliklar hamda soyabonlar berilmoqda. Hattoki, katta koreys kompaniyalari o‘z xodimlariga 3 kundan 10 kungacha puli to‘lanadigan mehnat ta’tillari bermoqda.
Barcha katta kompaniyalarning ishchilari hozir ta’tilda, hattoki xorijga ham dam olgani jo‘nab ketishgan. Bilasizmi, Koreya xalqi juda mehnatkash va mana shu mehnatsevarlik davlatning iqtisodiy mo‘’jizasi sababi. Lekin, ko‘p ishlashsa ham mehnat huquqlariga juda qat’iy amal qilishadi. Masalan, Koreyada hozirgi kunda berilgan ta’tilni iqtisodiy zarar emas, xodimlarning kelgusi faoliyati va natijadorlik uchun investitsiya deb bilishadi, deydi Doniyor Boboyev.
Bundan tashqari, ta’tillar nafaqat koreys fuqarolarga, balki millati, irqi, jinsidan qat’iy nazar o‘sha kompaniyaning barcha xodimlariga birdek amal qiladi. Sababi Koreyada mehnat muhofazasi qonuniyati hamma uchun barobar ishlaydi.
O‘zbekistonda chilla tugadi, ammo shu hafta oxirida yana havo harorati yuqori. Respublika qonunchiligida noqulay ob-havo sharoitlarida yoppasiga ta’til berish normasi yo‘q, ammo xodimlarning sog‘lig‘i va xavfsizligini ta’minlash uchun barcha choralarni ko‘rish majburiy. Shuningdek, o‘tgan oydagi anomal issiq oqibatida xodimlariga ta’til bergan tashkilot hamda kompaniyalar borasida ma’lumotlar uchragani yo‘q.
