Haaga sudi Filippin sobiq prezidenti ishi bo‘yicha eshituvlarni boshladi

Haagadagi Xalqaro jinoiy sud dushanba, 23 fevra kuni Filippinning sobiq prezidenti Rodrigo Dutertega nisbatan qo‘yilgan ayblovlarni tasdiqlash bo‘yicha eshituvlar seriyasini ochdi. Dpa agentligi xabar berishicha, u mamlakatda 2011–2019 yillar oralig‘ida olib borilgan narkojinoyatchilikka qarshi kampaniya davomida kamida 78 ta qotillikda ayblanmoqda.

80 yoshli sobiq prezident Niderlandiyada qariyb bir yildan beri hibsda saqlanmoqda. Himoya tomonining iltimosnomasiga ko‘ra u birinchi eshituvga kelmadi, sud bu iltimosnomani qanoatlantirgan.

XJS binosi oldidagi namoyishga Duterteni qo‘llovchilar ham, unga qarshi bo‘lganlar ham chiqqan.

«U qotilliklarga ruxsat bergan va ba’zi qurbonlarni shaxsan tanlagan», — dedi XJS prokurorining o‘rinbosari Mame Mandiayye Niang. Uning so‘zlariga ko‘ra, Rodrigo Duterte narkotiklar savdosi yoki iste’molida gumon qilinganlarga nisbatan sudsiz qatllarda hal qiluvchi rol o‘ynagan — avval Davao shahri meri sifatida, 2016 yildan esa mamlakat prezidenti sifatida.

XJS prokuror o‘rinbosari Haagada eshituvlar boshlanishini «hokimiyatda turganlar ham qonundan ustun emasligini eslatib turuvchi voqea» deb atagan.

Bir hafta davom etadigan eshituvlar yakunida XJS sudyalari Dutertega qarshi to‘liq sud jarayonini boshlash kerakmi-yo‘qmi, shu haqda qarorga kelishi lozim. Qaror may oyida chiqarilishi kutilmoqda.

Filippin sobiq prezidentining advokati Nikolas Kaufman ayblovlarni rad etib, ularni «nihoyatda asossiz va siyosiy sabablarga ko‘ra qo‘zg‘atilgan» deb atadi. «U jamiyatga xizmat qilishga o‘zini bag‘ishlagan, hayotini qonun va tartibga bag‘ishlagan inson», — dedi Kaufman filippinlik siyosatchi haqida. U Duterteni «xalq prezidenti» sifatida tavsiflab, u doim kambag‘al qatlam manfaatlarini himoya qilganini aytgan.

Rodrigo Duterte Davao meri va keyinchalik Filippin prezidenti bo‘lgan davrda narkojinoyatchilikka qarshi uzluksiz kurash olib borgan. Huquq himoya tashkilotlari baholashicha, bu kampaniya qurbonlari soni taxminan 30 000 kishini tashkil etgan. 2025 yil mart oyida Duterte XJS orderi asosida Filippinda ushlangan va Haagadagi sudga topshirilgan.