Nodavlat OTMda qonunbuzarlik xavfi elektron tizimda baholanadi

Oliy ta’lim, fan va innovatsiyalar vazirining muhokamalar portaliga joylashtirilgan buyrug‘i loyihasiga ko‘ra, nodavlat oliy ta’lim muassasalarida qonunbuzarlik xavfini baholash uchun «Xavfni tahlil qilish» elektron tizimini joriy etish taklif etilmoqda.

Foto: Shutterstock

Loyihaga muvofiq, nodavlat ta’lim xizmatlarini ko‘rsatuvchi tadbirkorlik sub’yektlarining qonunchilikni buzish xavfi darajasi maxsus elektron platforma orqali tahlil qilinadi.

Tizim litsenziya va tasdiqnomalar, davriy statistika ma’lumotlari, avvalgi huquqbuzarlik holatlari, jismoniy va yuridik shaxslar murojaatlari, ommaviy axborot vositalari hamda boshqa tashqi manbalardan olingan ma’lumotlar asosida ishlaydi.

Xavf darajasi “ball” tizimi orqali baholanib, sub’yektlar uch toifaga ajratiladi:

– xavfi yuqori — 81 va undan yuqori ball;
– xavfi o‘rta — 61–80 ball;
– xavfi past — 60 va undan kam ball.

Baholash natijalariga ko‘ra, xavfi yuqori toifadagi sub’yektlarga nisbatan profilaktika tadbirlari o‘tkazilishi va tekshiruvga tashabbus qilinishi mumkin. Xavfi o‘rta toifada esa profilaktika choralaridan keyin ham holat ijobiy tomonga o‘zgarmasa, tekshiruv o‘tkazilishi mumkin.

Shuningdek, elektron tizim natijalari asosida boshlanadigan tekshiruvlar haqida tadbirkorlik sub’yekti kamida 10 ish kuni oldin xabardor qilinishi nazarda tutilgan.