Isroil Livanda “Hizbulloh”ga zarbalar berdi

Isroil Livandagi Bayrutning janubiga — Eron qo‘llab-quvvatlaydigan harakat “Hizbulloh” nazoratidagi hududlarga kuchli havo zarbalarini berdi. Bunga sabab, ushbu guruh Eronning oliy rahbari Ali Xominaiy o‘ldirilgani uchun qasos sifatida Isroil tomon raketa va uchuvchisiz uchish apparatlari (dronlar)ni uchirgani bo‘ldi. Bu haqda Reuters agentligi dushanba, 2 mart kuni xabar qildi.

Guvohlar o‘ndan ortiq portlashlar haqida aytgan. Agentlik aniqlashtirishicha, bu — 2024 yildan beri Livan poytaxtining janubiga berilgan eng intensiv zarbalar.

“Hizbulloh” Isroilga qarshi tungi kampaniyani boshladi va har qanday keskinlashuv uchun to‘liq javobgar”, — dedi Isroil mudofaa kuchlari (TSAHAL) Bosh shtabi boshlig‘i Ayal Zamir.

TSAHALning Telegram-kanalida aniqlashtirilishicha, harbiylar Bayrut atrofida “Hizbulloh”ning yuqori lavozimli vakillariga nisbatan aniq zarba bergan. Shuningdek, Isroil mudofaa kuchlari Livan janubidagi “Hizbulloh” yetakchilaridan biriga ham zarba bergani qo‘shimcha qilingan.

Bundan oldin AQShning BMTdagi doimiy vakili Mayk Uolts Vashington va Isroil tomonidan “Epik g‘azab” deb nomlangan operatsiya Eronning raketa va harbiy-dengiz infratuzilmasiga qarshi qaratilganini, maqsad esa uning yadroviy qurol yaratishiga yo‘l qo‘ymaslik ekanini aytgan. U, shuningdek, Tehronni “Hizbulloh”, HAMAS va husiychilar kabi harakatlarni qo‘llab-quvvatlayotganlikda ayblagan.