Telefon raqamini boshqa odamga qanday rasmiylashtirish mumkin?

Raqamni topshirayotgan taraf nima qiladi

my.gov.uz saytiga yoki MyGov mobil ilovasiga kiring. MyID orqali avtorizatsiyadan o‘ting. Qidiruv orqali «Telefon raqamini qayta rasmiylashtirish» xizmatini toping.

1-qadam: Operatorni tanlang

Topshirmoqchi bo‘lgan raqamingiz operatorini ko‘rsating: Ucell, Beeline, Mobiuz, Uztelecom yoki Perfectum.

2-qadam: Topshiriladigan raqamni kiriting

Qayta rasmiylashtiriladigan telefon raqamini ko‘rsating: 998XXXXXXXXX shaklida.

3-qadam: Oluvchini ko‘rsating

Tizim qarindoshlar ro‘yxatini taklif qiladi. Agar qarindoshingizga rasmiylashtirmayotgan bo‘lsangiz «Boshqa shaxs»ni tanlang va ma’lumotlarni kiriting.

4-qadam: Aloqa raqamini ko‘rsating

Bu operator qayta rasmiylashtirish jarayonida siz bilan bog‘lanishi uchun kerak bo‘ladigan raqam.

5-qadam: Arizani jo‘nating

So‘ngra «Keyingi»ni bosing. Tizim oluvchiga so‘rov jo‘natadi. Ikkinchi tarafning tasdig‘ini kutasiz.

Ariza jo‘natilganidan keyin «Ariza yangi egasiga tasdiqlash uchun yuborildi» degan xabarni ko‘rasiz.

Raqamni qabul qilayotgan taraf nima qiladi

Birinchi taraf ariza berishi bilan qabul qiluvchining MyGov ilovasiga xabarnoma keladi.

1-qadam: Xabarnomani oching

«Xabarnomalar» bo‘limida «Raqamni qayta rasmiylashtirish»ni toping. Unda topshiruvchi tarafning ism-sharifi va topshirilayotgan raqam bo‘ladi. «Ochish»ni bosing.

2-qadam: Ma’lumotlarni tekshiring

Raqam va topshiruvchining ma’lumotlari to‘g‘riligiga ishonch hosil qiling. Operator bog‘lanishi uchun o‘z raqamingizni ko‘rsating.

3-qadam: MyID orqali tasdiqlang

«Tasdiqlash»ni bosing, tizim MyID orqali identifikatsiyani ochadi. Face-ID’dan o‘ting.

Ekranda «Tasdiqlandi» yozuvi paydo bo‘ladi. Operator arizani 1-5 ish kuni ichida qayta ishlaydi, so‘ng raqam sizning nomingizga o‘tadi.

Raqamni qayta rasmiylashtirish qancha turadi

Narx operatorga bog‘liq. Mobiuz operatorida xizmat uchun to‘lovni raqamning yangi egasi to‘laydi. Qolgan operatorlarda qandayligini alohida aniqlab oling. Chiroyli raqamni qayta rasmiylashtirish uchun qo‘shimcha to‘lov mavjud.

Ucell’da bazaviy 50 000 so‘mdan tashqari raqam qiymatidan foiz ham undiriladi: arzon toifalar uchun 25% gacha, eng qimmatlari uchun 5% gacha. Ikki holatda foiz olinmaydi: agar raqamni yaqin qarindoshga o‘tkazsangiz yoki raqamdan ikki yildan ortiq foydalanib, bu birinchi qayta rasmiylashtirish bo‘lsa.

Mobiuz’da maxsus raqamning to‘liq qiymatini yangi egasi to‘laydi.

Beeline’da chiroyli raqamdan uch yildan kam foydalanilgan bo‘lsa, yangi egasi uning to‘liq qiymatini to‘laydi. Muhim jihat: «Abonent to‘lovi uchun oltin raqam» xizmati ulangan raqam aslo qayta rasmiylashtirilmaydi.

Qayta rasmiylashtirish qachon amalga oshmaydi

Ariza berishdan oldin quyidagilarga e’tibor bering:

• Qayta rasmiylashtirilayotgan raqamda qarzdorlik mavjud. Agar topshiruvchi yoki qabul qiluvchi nomiga rasmiylashtirilgan istalgan raqamda qarz bo‘lsa, Mobiuz qayta rasmiylashtirishni rad etadi;
• Raqam boshqa operatordan MNP orqali o‘tkazilgan (Mobiuz shartlarida aniq ko‘rsatilgan);
• Raqam operator tomonidan bloklangan;
• Chiroyli raqam bo‘lib to‘lash asosida sotib olingan va to‘lov to‘liq amalga oshirilmagan (Ucell, Mobiuz). Beeline’da alohida holat: «Abonent to‘lovi uchun oltin raqam» xizmati faol bo‘lgan raqam qayta rasmiylashtirilmaydi;
• Raqam 90 kundan kam vaqt oldin tiklangan (Mobiuz);
• Qabul qiluvchining JShShIRi yo‘q (Mobiuz);

Agar yuqoridagi holatlar yo‘q bo‘lsa, butun jarayonga 10-12 daqiqa vaqt ketadi.