Turkiya prezidenti Rajab Toyyib Erdo‘g‘an 16-avgust kuni mamlakat uchun Yevropa Ittifoqiga a’zo bo‘lish endi ustuvor vazifa emasligini, biroq Anqara a’zolik uchun eshiklarni yopmayotganini ma’lum qildi.
«Endi Yevropa Ittifoqi biz uchun ustuvor yo‘nalish emas», - dedi Erdo‘g‘an «Al Jazeera» telekanaliga bergan intervyusida. Uning ta’kidlashicha, Turkiya Yevropa Ittifoqiga a’zo bo‘lish g‘oyasidan voz kechmagan, ammo bu masala endi birinchi o‘rinda turmaydi.
Uning fikricha, agar Yevropa Ittifoqi Turkiyani rad etishda davom etsa, o‘zi yutqazadi.
Turkiya 1999-yildan buyon Yevropa Ittifoqiga a’zolikka nomzod maqomiga ega. Ittifoqqa qo‘shilish bo‘yicha muzokaralar 2005-yilda boshlangan, ammo hozir turli masalalardagi kelishmovchiliklar tufayli deyarli muzlatib qo‘yilgan.
