Avstriya hukumati mamlakatda majburiy harbiy xizmat tizimini isloh qilish bo‘yicha kelishuvga erishdi. Bu haqda 27 iyul kuni mamlakat rasmiylari ma’lum qildi.
Uzoq davom etgan muzokaralardan so‘ng Avstriya Xalq partiyasi (ÖVP), Sotsial-demokratik partiya (SPÖ) va liberal Neos partiyasidan iborat hukmron koalitsiya harbiy xizmat muddatini uch oyga uzaytirishga kelishib oldi.
Dala mashg‘ulotlari majburiy bo‘ladi
Islohotga muvofiq, chaqiriluvchilar avval olti oylik bazaviy harbiy tayyorgarlikdan o‘tadi. Shundan so‘ng ular uchun qo‘shimcha majburiy dala mashg‘ulotlari joriy etiladi.
Bu mashg‘ulotlarni zaxira qo‘shinlari tarkibida xizmat qiluvchilar o‘n yil davomida istalgan vaqtda o‘tashi mumkin bo‘ladi.
Hukumat ta’kidlashicha, taklif etilayotgan bosqichma-bosqich tizim ekspertlar komissiyasi tavsiyalariga asoslangan.
Harbiy xizmat jozibadorligi oshiriladi
Islohot doirasida harbiy xizmatni yoshlar uchun yanada jozibador qilish choralari ham ko‘zda tutilgan.
Xususan, harbiy xizmatchilarga ta’til kunlari berilishi rejalashtirilmoqda. Shuningdek, xizmat davrida to‘lanadigan oylik nafaqa 1 000 yevrogacha oshiriladi.
Kansler: Yevropada barqaror tinchlik haqidagi orzu parchalandi
Avstriya kansleri Kristian Shtokerning ta’kidlashicha, mamlakat mudofaa salohiyatini kuchaytirish zarurati Yevropa xavfsizlik muhitidagi o‘zgarishlar bilan bog‘liq.
U Rossiyaning Ukrainaga qarshi boshlagan urushi, kiberhujumlar, gibrid tahdidlar va muhim infratuzilmaga qarshi xavflar xavfsizlik siyosatiga yangicha yondashuvni talab qilayotganini aytdi.
«Yevropada barqaror tinchlik haqidagi orzu Rossiya agressiyasi boshlanganidan keyin parchalandi», - dedi kansler.
Uning so‘zlariga ko‘ra, faqat yangi harbiy texnika sotib olishning o‘zi yetarli emas. Favqulodda vaziyatlarda harbiylar undan samarali foydalanishi uchun amaliy tayyorgarlik ham kuchli bo‘lishi lozim.
Qonun parlamentda uchdan ikki qism ovoz bilan qabul qilinishi kerak
Endi hukumat parlamentdagi Avstriya Ozodlik partiyasi (FPÖ) va «Yashillar» partiyasining qo‘llab-quvvatlovini olishga harakat qiladi.
Chunki mazkur o‘zgarishlarni qabul qilish uchun parlament a’zolarining kamida uchdan ikki qismi ovozi talab etiladi.
Agar qonun ma’qullansa, yangi tartib 2027 yil 1 yanvardan kuchga kirishi rejalashtirilgan.
Fuqarolik xizmatiga ham o‘zgarishlar kiritiladi
Hozircha to‘qqiz oylik muqobil fuqarolik xizmati muddati o‘zgarmaydi.
Biroq 2027 yildan uni ikki oyga ixtiyoriy ravishda uzaytirish imkoniyati yaratiladi.
2028 yildan esa chaqiriluvchilar soni rejadagi darajaga yetmasa, ushbu uzaytirish majburiy tus oladi.
Avstriya harbiy betaraf davlat hisoblanadi va NATO a’zosi emas.
