Ruferlar Empire State Building cho‘qqisida aksiya o‘tkazdi

Hodisa 1 iyul kuni mahalliy vaqt bilan kunduzi sodir bo‘lgan. 33 yoshli Angela Nikolau va 32 yoshli Ivan Birkus (Kuznetsov) yuzlariga niqob taqqan holda Empire State Building binosi shpiliga ko‘tarilishga muvaffaq bo‘lgan.

Binoning umumiy balandligi shpili bilan birga 443 metrni tashkil etadi. Ruferlar cho‘qqiga chiqqanidan so‘ng shpilga «Muhabbat hokimiyatga bo‘lgan hirsdan kuchli bo‘lganida, dunyoda tinchlik qaror topadi» degan yozuv tushirilgan qora bannerni mahkamlagan. Bu ibora ko‘pincha amerikalik mashhur gitarachi Jimmi Xendriksga nisbatan keltiriladi.

Shundan so‘ng Ivan Birkus binodagi maydonchada tiz cho‘kib, uzoq yillardan beri munosabatda bo‘lib kelayotgan Angela Nikolauga turmush qurish taklifini bildirgan. Qiz taklifni qabul qilgan va keyinroq ijtimoiy tarmoqlarda uzuk taqqan suratini e’lon qilgan.

Juftlik bu voqeani o‘zining Instagram sahifalari orqali jonli efirda ham namoyish qilgan.

Biroq ular binodan tushib kelgach, Nyu-York politsiyasi tomonidan qo‘lga olingan. OAV ma’lumotlariga ko‘ra, ularga noqonuniy ravishda xususiy hududga kirish, xavfsizlik talablarini buzish, mulkka zarar yetkazish, jamoat tartibini buzish, buzib kirish vositalarini saqlash hamda boshqa bir qator qonunbuzarliklar bo‘yicha ayblovlar qo‘yilishi mumkin.

Dastlabki ma’lumotlarga ko‘ra, ruferlar binodagi tashrif buyuruvchilar uchun yopiq bo‘lgan 103-qavatga chiqishga muvaffaq bo‘lgan. Tergovchilar ular aynan qanday yo‘l bilan bu yerga kirgani va shpilga chiqqanini aniqlamoqda.

Empire State Building ma’muriyati esa ruferlarning harakatlari bino ijarachilari yoki sayyohlar xavfsizligiga tahdid solmaganini ma’lum qildi. Shu bilan birga, ma’muriyat ushbu mashhur kuzatuv maydonchasi turmush qurish taklifini bildirish uchun eng munosib joylardan biri ekanini hazilomuz tarzda ta’kidladi.

Angela Nikolau va Ivan Birkus 2016 yildan beri birgalikda ekstremal rufing bilan shug‘ullanib keladi. Ular shu vaqt ichida dunyoning bir qator mashhur baland inshootlariga chiqqan. Jumladan, 2016 yilda Xitoyning Tyanszin shahrida qurilishi tugallanmagan qariyb 597 metrli Goldin Finance 117 osmono‘par binosiga chiqqan.

Juftlik haqida suratga olingan «Skywalkers: Bir juftlik tarixi» hujjatli filmi 2024 yilda AQShdagi Sundance kinofestivalida namoyish etilgan. Keyinchalik filmni tarqatish huquqini Netflix kompaniyasi sotib olgan va u striming platformasiga joylashtirilgan.