Marosim bitiruvchilar, ularning ota-onalari, ustozlar, universitet rahbariyati, hamkorlar va faxriy mehmonlarni jamladi. Har bir oila uchun bu kun o‘zgacha bo‘ldi: sahnaga chiqish ortida necha yillik ta’lim, imtihonlar, uyqusiz tunlar, ota-onalarning ko‘magi, ustozlarning murabbiyligi va har bir bitiruvchining shaxsiy g‘alabasi mujassam edi.
Bu yil Central Asian University diplomlarini tibbiyot, stomatologiya, biznes va muhandislik maktablari, arxitektura va dizayn maktabi, shuningdek, mehmonxona boshqaruvi va turizm maktabi bitiruvchilari qo‘lga kiritdi. Oldinda ularni o‘z bilimlarini amalda qo‘llaydigan, qobiliyatlarini rivojlantiradigan va mamlakat taraqqiyotiga hissa qo‘shadigan kasbiy yo‘l kutmoqda.
Ota-onalar uchun bitiruv marosimi yillar davomidagi qo‘llab-quvvatlash, ishonch va sarflangan kuch-g‘ayratning yaqqol natijasini ko‘rsatgan lahzaga aylandi. Ular farzandlarining abituriyentlikdan universitet bitiruvchisigacha bo‘lgan yo‘lni qanday bosib o‘tganiga, kasb egallab, o‘ziga ishonch va kelajakdagi faoliyati uchun mustahkam poydevor yaratganiga guvoh bo‘ldilar.
Central Asian University asoschisi Jahongir Ortiqxo‘jayev bitiruvchilarga tabrik nutqi bilan murojaat qildi. U universitetni tamomlash katta kasbiy yo‘l ochishini, bu yo‘lda mehnatsevarlik, intizom, doimiy rivojlanish va o‘z oldiga yuksak maqsadlar qo‘ya bilish muhim ekanini ta’kidladi. U bitiruvchilarga o‘z faoliyatini ishonch bilan qurishni, yangi qiyinchiliklardan qo‘rqmaslikni va muvaffaqiyat umrbod o‘qishga tayyor insonlargagina nasib etishini yodda tutishni tiladi.
Central Asian University rektori Kamran Gulamov bitiruvchilarga o‘zining samimiy tilaklarini bildirdi: "Qadrli bitiruvchilar! Sizlarga katta yo‘l tilaymiz! Qadamlaringiz mustahkam bo‘lsin! Ilmingiz insonlarga manfaat keltirsin! Qalbingizda shukr, ko‘zlaringizda orzu, yelkangizda esa mas’uliyat, orqangizda esa ota-onangiz va ustozlaringizning duosi doimo hamroh bo‘lsin! Dadil orzu qiling, o‘z qadriyatlaringizga sodiq qoling va hech qachon rivojlanishdan to‘xtamang. Yo‘lingiz doimo ochiq, kelajagingiz yorug‘ bo‘lsin!"
