«Koreya ishi»
Joriy yilning may oyida fuqarolarni Koreyaga ishlash uchun yuborishdagi yirik korrupsion sxema fosh boʻldi. Bosh prokuratura huzuridagi departament xabariga koʻra, migratsiya sohasidagi uyushgan jinoiy guruh Koreyaga ishga yuborish uchun rasmiy toʻlovlardan tashqari fuqarolardan 7-12 ming dollardan yigʻib olgan. Ular toʻplagan mablagʻ qariyb 90 mln dollarga baholanyapti.
Koʻp oʻtmay Migratsiya agentligining Koreyadagi vakolatxonasi sobiq rahbari Aziz Toshtemirov firibgarlikda gumonlanib xalqaro qidiruvga berilgani maʼlum boʻldi.
Shundan keyin u agentlik rahbari Behzod Musayevni nishonga olib, avval Migratsiya agentligining Janubiy Koreyadagi vakolatxonasi uchun foydalanilgan Koreya24 Telegram-kanali orqali qator «kompramat»larni eʼlon qila boshladi.
Toshtemirovning iddao qilishicha, Musayev undan premium toifadagi «marmar goʻsht», qimmat kosmetika mahsulotlari, tish pastalari hamda brend tovarlar yuborishni muntazam ravishda talab qilib kelgan. U topshiriq berilgani aks etgan oʻzaro yozishmalarni eʼlon qildi.
Mojaroning yana bir shov-shuvli qismi Hyundai Palisade avtomobili bilan bogʻliq iddaolar boʻldi. Toshtemirovning yozishicha, Musayev unga Koreyadan ichiga maxsus divan oʻrnatilgan qimmatbaho Hyundai Palisade avtomobilini sotib olishni buyuradi.
Yana bitta jiddiy ayblov Migratsiya agentligida amalda ishlamagan xodimlar uchun oylik toʻlab kelingani bilan bogʻliq. Toshtemirovga koʻra, Behzod Musayev rahbar boʻlib kelgach, Ataxanov Nabi Agzamovich va Djabarov Baxrom Saidaxmedovich 2024-yilning noyabr oyida Migratsiya agentligiga haydovchi sifatida ishga qabul qilingan.
Ushbu xodimlardan biriga mart oyida 44,4 mln soʻm, ikkinchisiga esa 46,5 mln soʻm ish haqi hisoblangani keltiriladi. Toshtemirov ushbu maʼlumotlarni yozganidan koʻp oʻtmay, Bosh prokuratura huzuridagi Departament Migratsiya agentligida 1 mlrd soʻmdan ortiq talon-torojliklar fosh etilganini maʼlum qildi.
«4 mln dollarlik» mehmonxona
Toshtemirovning yana bir iddaosi Toshkent shahri Yakkasaroy tumanida joylashgan Consti mehmonxonasi bilan bogʻliq. Taxminiy qiymati «3-4 mln dollar»ga baholanadigan mazkur mehmonxonaga Behzod Musayevning oila aʼzolari egalik qilishiga urgʻu berilgandi.
Korxona va tashkilotlarning yagona davlat reyestridagi maʼlumotlarga koʻra, Consti Hotel oilaviy korxonasi 2025-yil 12-fevralda roʻyxatdan oʻtkazilgan. Ustav fondi - 5 mln soʻm. Faoliyat turi - mehmonxonalar va shunga oʻxshash yashash joylari.
Korxonaning taʼsischilari sifatida Karimova Munisaxon Behzod qizi (50 foiz) va Musayev Abdulbositxon Behzod oʻgʻli (50 foiz) keltirilgan. Rahbar sifatida Musayeva Dildora Faridonovna koʻrsatilgan.
Amaldagi qonunchillika koʻra, davlat xizmatchisining xotini, farzandlari va boshqa yaqin qarindoshlari yirik mol-mulklarga egalik qilishi taqiqlanmagan. Ammo bu jarayonda bir nechta qatʼiy talablar va yuridik mexanizmlar ishga tushadi. Yaʼni amaldor lavozimda paytida oila aʼzolarining nomiga yirik mulk rasmiylashtirilsa, xarid qilish uchun sarflangan mablagʻlarning qonuniy manbasi koʻrsatilishi kerak.
«2000 dollarlik» jarima
Soʻnggi paytlarda Janubiy Koreyaning oʻzida ham Oʻzbekistondan E-9 vizasi asosida yuborilgan mehnat migrantlari bilan tuzilgan shartnomalar katta muhokamalarga sabab boʻldi. Migratsiya agentligining ishchilardan yozdirib olgan kafolat tilxatida ular ish joyini oʻzgartirgan taqdirda har oy 2000 dollar jarima toʻlashga majbur qilinishi koʻzda tutilgandi. Bunday shartnomalarni tuzish 2024-yilning noyabr oyidan boshlangani xabar qilingan. Bu xorijlik ish beruvchilarda oʻzbekistonlik ishchilarga nisbatan salbiy fikr uygʻotishga qarshi chora sifatida izohlangan.
Koreyalik huquq faollari hujjatlarni tahlil qilib, ularning bir tomonlama va ishchini iqtisodiy jihatdan qul qilib qoʻyishga qaratilganiga urgʻu berishdi. Jarimaning yuqori chegarasi belgilanmagani, sanksiya ishchi Oʻzbekistonga qaytib kelguniga qadar har oy hisoblanishda davom etaverishi jiddiy eʼtirozlarga sabab boʻldi.
3-sentabr kuni Behzod Musayev ishdan olingani eʼlon qilinganidan 1 soat oʻtar-oʻtmas, Migratsiya agentligi E-9 vizasi asosida Koreyaga vaqtinchalik ishlash uchun borayotgan fuqarolar bilan tuziladigan uch tomonlama shartnomaning ayrim bandlariga oʻzgartirish kiritilganini maʼlum qildi. Ish joyini oʻzgartirish uchun agentlik vakolatxonasining oldindan roziligini olish hamda ushbu talabga rioya etilmagan holatda jarima qoʻllashni nazarda tutuvchi bandlar shartnomadan olib tashlandi.
Kanada va AQSH vaʼdasi
Behzod Musayev davrida migratsiya siyosatidagi eng eʼtiborli va shov-shuvli jihatlardan yana biri AQSH va Kanada kabi mamlakatlarga oʻzbekistonlik migrantlarni yuborishga oid xabarlar boʻldi. Masalan, 2026-yilning mart oyida Migratsiya agentligi va USA Farm Labor tashkiloti oʻrtasida kelishuv imzolangani eʼlon qilindi. Behzod Musayev Kun.uz’ga bergan intervyusida pilot loyiha doirasida kvotalar belgilanayotganini ham aytgandi.
Bundan oldinroq, bandlik vaziri sifatida ishlagan paytida, Behzod Musayev Kanadaning Oʻzbekistondagi elchisi Alam Xemson bilan oʻzbekistonliklarni Kanada mehnat bozoriga jalb qilish boʻyicha muzokaralar oʻtkazganini maʼlum qilgandi.
Qator muzokaralar, kelishuv va uchrashuvlar haqida xabarlar tarqatilgan boʻlsa-da, shu paytgacha Migratsiya agentligining oʻzbekistonliklarni yuqorida nomi tilga olingan mamlakatlarga ishga yuborgani maʼlum emas.
Musayevning karerasi
Behzod Musayev 2010–2011-yillarda Davlat soliq qoʻmitasi raisi Botir Parpiyevning birinchi oʻrinbosari boʻlib faoliyat olib borgan va ochiqlanmagan sabablarga koʻra ishdan boʻshatilgan. Keyinchalik bir muddat xorijda yashagani haqida maʼlumotlar bor. Yetti yillik tanaffusdan keyin 2018-yilning mart oyida eski lavozimga qayta tayinlanib, oʻsha yilning may oyidan esa Davlat soliq qoʻmitasiga rahbar etib tayinlanadi.
Keyinchalik Musayev 2020-yilning may oyidan 2021-yilning noyabr oyigacha bosh vazirning ijtimoiy rivojlanish masalalari boʻyicha oʻrinbosari, 2021-yilning noyabridan 2022-yilning dekabrigacha esa Sogʻliqni saqlash vaziri boʻladi.
2022-yil dekabrdan 2024-yilning sentabrigacha esa kambagʻallikni qisqartirish va bandlik vaziri boʻlgan.
2024-yilning sentabrida lavozimi biroz pasaytirilib, oʻzi boshqargan vazirlik huzuridagi Tashqi mehnat migratsiyasi agentligiga rahbar etib tayinlanadi.
Oradan bir oy oʻtib, vazirlik huzuridagi Tashqi mehnat migratsiyasi agentligi tugatiladi va uning oʻrnida Vazirlar Mahkamasi huzuridagi Migratsiya agentligi tashkil etilib, Musayev unda ham rahbarlikni saqlab qoladi.
Boshqa ishga oʻtkazilishi munosabati bilan lavozimidan olingan Behzod Musayevning xozircha (2026-yil 8-sentabr) qayerga tayinlangani maʼlum emas. Manbalar uni «Vatandoshlar» jamoat fondiga rahbar boʻlgani haqida yozishmoqda. Ammo bu xabar rasman tasdiqlanmagan.
