O‘zbekiston va Qirg‘iziston ilgari Farg‘ona viloyati tarkibiga kirgan Cho‘ng‘ara va Toshtepa qishloqlarini rasman topshirish bo‘yicha tashkiliy-texnik ishlarni boshladi. Bu haqda Qirg‘iziston prezidentining Botken viloyatidagi vakolatxonasi ma’lum qildi.
Xabar qilinishicha, ishlar O‘zbekiston-Qirg‘iziston davlat chegarasini demarkatsiya qilish va yer uchastkalarini almashish bo‘yicha erishilgan kelishuvlar doirasida amalga oshirilmoqda.
Ikki davlat qo‘shma ishchi komissiyasining navbatdagi yig‘ilishi 24-iyul kuni Qadamjoy tumanidan bo‘lib o‘tgan. Unda tomondan topshirilayotgan hududlar aholsining fuqarolik maqomi, ko‘chirish, mulk, xo‘jalik faoliyati va boshqa tashkiliy masalalarni muhokama qilgan.
3-avgustdan qo‘shma ishchi guruh bevosita qishloqlarda ish boshladi. Mutaxassislar aholini ro‘yxatga olish ishlarini o‘tkazmoqda hamda keyinchalik hujjatlarni rasmiylashtirish tartibini tushuntirmoqda.
Qirg‘iziston tomoniga mamlakat prezidentining Botken viloyati bo‘yicha vakili Baktibek Toksonbayev, O‘zbekiston tomoniga IIV Migratsiya va personallashtirish departamenti boshlig‘i o‘rinbosari Behzod Sayfullayev boshchilik qilmoqda.
Qayd etilishicha, Cho‘ng‘ara va Toshtepa qishloqlarida asosan etnik qirg‘izlar yashaydi. Dastlabki ma’lumotlarga ko‘ra, ikki qishloq aholisi soni 2,5 ming nafarga yaqin.
Ro‘yxatga olish yakunlanganidan so‘ng aholiga Qirg‘iziston fuqaroligini berish jarayoni boshlanadi.
Qirg‘iziston O‘zbekiston tomoniga ushbu ikki qishloq maydoniga teng yer maydonini beradi.
