Germaniya Ichki ishlar vazirligi ma’lum qilishicha, joriy yil iyul oyida mamlakatda boshpana berish bo‘yicha 4311 ta dastlabki ariza qabul qilingan. Bu ko‘rsatkich 2025-yil iyulida qayd etilgan 8293 ta arizaga nisbatan deyarli ikki barobar kam. 2024-yil iyuli bilan taqqoslaganda esa murojaatlar soni qariyb 75 foizga qisqargan.
Tagesschau nashrining ta’kidlashicha, bu bir martalik holat emas. Germaniyada boshpana izlovchilar soni bir necha oydan buyon izchil kamayib bormoqda. Masalan, 2026-yilning dastlabki olti oyida mamlakatda ilk bor boshpana so‘raganlar soni 39 646 nafarni tashkil etgan. O‘tgan yilning shu davrida esa bu ko‘rsatkich 72 818 nafar bo‘lgan.
Germaniya Ichki ishlar vazirligi ma’lumotlariga ko‘ra, 2025-yil davomida mamlakatda jami 113 236 ta dastlabki boshpana arizasi qabul qilingan bo‘lib, bu 2024-yilga nisbatan 50 foizdan ortiq kamdir. Takroriy murojaatlar ham hisobga olinganda, o‘tgan yili jami 168 543 ta boshpana arizasi rasmiylashtirilgan. Bu esa avvalgi yilga nisbatan 32,8 foizga kam ko‘rsatkichdir.
Germaniya ichki ishlar vaziri Aleksandr Dobrindt ushbu tendensiyani hukumatning migratsiya sohasidagi siyosati samarasi sifatida baholagan. Uning fikricha, mamlakatda chegara nazorati kuchaytirilishi va migratsiya qoidalarining qat’iylashtirilishi natija bermoqda.
Mutaxassislar qayd etishicha, boshpana so‘rovlarining kamayishi nafaqat Germaniya, balki butun Yevropa Ittifoqi uchun xos tendensiyaga aylangan. Bu holat Yevropa Ittifoqining migratsiya qonunchiligi kuchaytirilgani bilan izohlanmoqda.
Joriy yil iyun oyidan boshlab Umumevropa boshpana berish tizimi (CEAS) ishga tushirildi. Yangi tizimga muvofiq, Yevropa Ittifoqi tashqi chegaralarida boshpana izlovchilar uchun dastlabki tekshiruvlar joriy etildi va ularning arizalarini ko‘rib chiqish jarayoni tezlashtirildi.
Shu bilan birga, Germaniyada quruqlik chegaralari orqali noqonuniy kirish holatlari ham sezilarli darajada qisqargan. Rasmiy ma’lumotlarga ko‘ra, 2025-yilda bunday holatlar 62 526 tani tashkil etgan. Bu 2023-yilda qayd etilgan 127 549 ta holatga nisbatan qariyb ikki barobar kamdir.
Germaniya hukumati bu natijani 2024-yil sentyabridan amal qilayotgan kuchaytirilgan chegara nazorati bilan bog‘lamoqda. Avval vaqtinchalik chora sifatida joriy etilgan mazkur tartib bir necha bor uzaytirilgan va hozircha sentyabrgacha amal qiladi. Ichki ishlar vaziri Aleksandr Dobrindt esa yaqinda Ispaniyaning Seuta hududidagi migratsiya inqirozini inobatga olgan holda, ushbu nazorat choralari keyinchalik ham saqlab qolinishini bildirgan.
