Transport vositalari harakatini qulaylashtirish, ortiqcha masofani qisqartirish va chorrahada tirbandliklarning oldini olish maqsadida Oqtepa maydoni chorrahasida harakat tartibi o‘zgartirildi.
Endilikda Lutfiy ko‘chasidan Nurafshon va Seul ko‘chalari tomon harakatlanayotgan haydovchilar chorrahadagi svetoforning tegishli ishorasi orqali to‘g‘ridan to‘g‘ri chapga burilishi mumkin.
Avval bu yo‘nalishda harakatlanayotgan transport vositalari Muqimiy ko‘chasiga o‘tib, u yerdan qayrilib olishi talab etilar edi.
Shuningdek, Samarqand Darvoza ko‘chasidan kelayotgan transport vositalari uchun ham yangi chapga burilish yo‘nalishi tashkil etildi.
Avval Samarqand Darvoza ko‘chasidan Lutfiy va Muqimiy ko‘chalari tomon harakatlanish uchun Nurafshon ko‘chasiga kirib, qayrilib olish zarur edi. Yangi tartibga ko‘ra, haydovchilar svetoforning tegishli ishorasi orqali to‘g‘ridan to‘g‘ri chapga burilib, Muqimiy va Lutfiy ko‘chalari tomon harakatlanishi mumkin.
O‘zgarishlar natijasida haydovchilar bosib o‘tadigan masofa qariyb 600 metrga qisqargan. Shuningdek, Nurafshon va Muqimiy ko‘chalarida qayrilib olish jarayonida yuzaga keladigan tirbandliklarni kamaytirish ko‘zda tutilgan.
Hisob-kitoblarga ko‘ra, yangi harakat tartibi haydovchilarning yo‘ldagi vaqtini odatiy soatlarda 4 daqiqagacha, tig‘iz vaqtlarda esa 10 daqiqagacha qisqartiradi.
Piyodalar xavfsizligi va harakatlanish qulayligini ta’minlash maqsadida chorrahada piyodalar o‘tish yo‘laklari hamda piyodalar uchun svetoforlar ham tashkil etildi.
