Yo‘l harakatini tashkil etish markazi mutaxassislari Fitrat va Geydar Aliyev ko‘chalari chorrahasidagi transport oqimini o‘rganib, avtomobillar eng ko‘p to‘planadigan yo‘nalishlarni aniqladi. Tahlil natijalari asosida svetoforning ishlash vaqti mavjud transport yuklamasiga moslashtirildi.
Avval svetofor siklining birinchi fazasi 35 soniya, ikkinchi fazasi esa 28 soniya davom etgan. Yangi tartibga ko‘ra, eng gavjum yo‘nalishda “yashil” chiroq vaqti 35 soniyadan 60 soniyagacha uzaytirildi.
Shuningdek, qarama-qarshi yo‘nalishda harakatlanayotgan avtomobillar endi biroz oldinroq to‘xtaydi. Bu burilayotgan transport vositalariga manyovrni xavfsiz yakunlash va chorrahani tezroq bo‘shatish imkonini beradi. Natijada svetoforning bir sikli davomida ko‘proq avtomobil o‘tishi ta’minlanmoqda.
Markaz ma’lumotlariga ko‘ra, o‘zgarishlar natijasida kunduzgi vaqtda avtomobillar navbati sezilarli qisqargan, harakat bir maromga tushgan. Chorrahadan o‘tish uchun sarflanadigan vaqt esa 2 daqiqagacha kamaygan.
Ayni paytda ushbu hudud yaqinida temiryo‘l kesishmasi mavjudligi sababli poyezdlar o‘tayotganda avtomobillar harakati vaqtincha to‘xtaydi. Bu esa ayrim vaqtlarda chorrahada qisqa muddatli transport to‘planishiga olib kelishi mumkin.
Yo‘l harakatini tashkil etish markazi mutaxassislari chorrahadagi vaziyatni kuzatishda davom etmoqda. Shuningdek, ertalabki va kechki tig‘iz vaqtlar uchun svetoforning alohida ish rejimlarini joriy etish rejalashtirilgan.
Keyingi bosqichda qo‘shni chorrahalardagi svetoforlar ham qayta sozlanib, ular yagona “Yashil to‘lqin” tizimiga ulanadi. Ushbu tizim ruxsat etilgan tezlikda harakatlanayotgan avtomobillarga bir nechta chorrahadan ketma-ket “yashil” chiroqda o‘tish imkonini berishi kutilmoqda. Bu transport vositalarining ortiqcha to‘xtashini kamaytirish va yo‘llardagi harakatni yanada ravonlashtirishga xizmat qiladi.
