Qirg‘izistondagi To‘xtag‘ul GES ikkita gidrogeneratorining o‘chirilishi Qozog‘iston va qo‘shni mamlakatlarda elektr energiyasining ommaviy uzilishiga (blekautga) olib keldi, deb xabar berdi Qozog‘iston Yagona energetika tizimi (YaET) operatori KEGOC AJ matbuot xizmatiga tayanib Tengrinews.
«14-avgust kuni soat 14:37 da To‘xtag‘ul GES umumiy quvvati 600 MVt bo‘lgan ikkita gidrogeneratorining o‘chirilishi Qozog‘iston YaET Shimol–Sharq–Janub tranzitida haddan tashqari yuklamaga sabab bo‘ldi hamda Janubiy zona Qozog‘iston EET va Markaziy Osiyo Birlashgan energetika tizimi (Qirg‘iziston, O‘zbekiston, Tojikiston) energiya tizimlaridan ajralib qoldi», deyiladi kompaniya xabarida.
Oqibatda Qozog‘iston Yagona energetika tizimining Shimoliy zonasidagi Olmaota, Jambil, Turkiston, Qizilo‘rda, Jetisu viloyatlari, shuningdek, Qarag‘anda, Ulitau va Abay viloyatlari iste’molchilarining elektr ta’minoti uzildi.
Xabarga ko‘ra, KEGOC AJ tomonidan soat 14:47 da Qarag‘anda, Ulitau, Abay viloyatlarida, soat 16:26 da Olmaota va Jetisu viloyatlarida, soat 16:34 da esa Jambil, Turkiston, Qizilo‘rda viloyatlarida iste’molchilarning elektr ta’minoti to‘liq tiklangan.
«Texnologik nosozlik sabablari maxsus komissiya tomonidan o‘rganiladi», - deyiladi kompaniya xabarida.
Avvalroq Qozog‘iston Energetika vazirligi 14-avgust kuni Markaziy Osiyo energetika tizimidagi nosozlik respublikaning bir qancha hududlarida elektr energiyasining avariyaviy o‘chishiga olib kelganini ma’lum qilgan edi. Idora ma’lumotlariga ko‘ra, Markaziy Osiyo energetika tizimi tomonidan elektr energiyasi oqimining keskin o‘zgarishi tufayli quvvat keskin ortib ketgan va buning oqibatida avariyaga qarshi avtomatika ishga tushgan.
KEGOC tizim operatori ma’lumotlariga ko‘ra, Qozog‘iston Yagona elektr energetika tizimidagi texnologik nosozlik soat 14:37 da yuz bergan va bu 500 kV kuchlanishli Agadir–Ulken hamda Oqto‘g‘ay–Toldiqo‘rg‘on elektr uzatish liniyalarining uzilishi bilan kechgan. Oqibatda Qozog‘iston YaET Janubiy zonasi va Markaziy Osiyo Birlashgan energetika tizimi alohida (izolyatsiyalangan) ishlash rejimiga o‘tgan.
Iste’molchilarga elektr energiyasini yetkazib berishdagi cheklovlar hajmi taxminan 2810 MVtni tashkil etdi. Soat 14:47 ga kelib Qarag‘anda, Abay va Ulitau viloyatlarida 295 MVt hajmdagi cheklovlar bekor qilindi. KEGOC iste’molchilarga elektr ta’minotini tiklashni davom ettirdi, deyiladi xabarda.
Qozog‘iston Energetika vazirligi O‘zbekistondagi elektr ta’minoti uzilishlari Qozog‘iston energetika tizimidagi avariya tufayli yuz bergani haqidagi xabarlarni ham rad etdi.
KEGOC Qozog‘iston Yagona energetika tizimining tizim operatori funksiyasini bajaradi. 2026-yil 1-aprel holatiga ko‘ra, kompaniyaning 85 foizlik ulushga ega asosiy aksiyadori «Samruq-Qazina» milliy farovonlik jamg‘armasi» AJ hisoblanadi.
