Davlat xavfsizlik xizmati xodimlari «Toshkent-Aero» ixtisoslashtirilgan bojxona kompleksi bilan hamkorlikda xorijdan yirik miqdorda giyohvandlik vositalarini olib kirish bilan bog‘liq holatni fosh etdi.
Ma’lum qilinishicha, «Bangkok - Toshkent» yo‘nalishida uchib kelgan, 2004-yilda Jizzax viloyatida va 1993-yilda Toshkent shahrida tug‘ilgan ikki nafar fuqaro Toshkent xalqaro aeroportida tekshiruvdan o‘tkazilgan.
Tekshiruv davomida ularga tegishli yuklar ichida shisha va alyuminiy idishlarga qadoqlanib, yashirilgan 4,6 kilogramm «Mefedron» sintetik narkotik moddasi borligi aniqlangan.
Shundan so‘ng ularning Toshkent shahridagi yashash manzili ham ko‘zdan kechirilgan. U yerdan 1,5 litr gashish moyi va 8 litr erituvchi vositalar topilib, belgilangan tartibda rasmiylashtirib olingan.
Tezkor tadbirlar davom ettirilib, xorijdan keltirilgan narkotik moddalarni Toshkent shahrida qabul qilib olayotgan vaqtda 1997-yilda Jizzax viloyatida tug‘ilgan yana bir shaxs ushlangan. Undan 635 gramm «Alfa-PVP» giyohvandlik vositasi olingan.
Hozirda mazkur shaxslarga nisbatan Jinoyat kodeksining 246-moddasi 2-qismi - kontrabanda bilan jinoyat ishi qo‘zg‘atilib, tergov harakatlari olib borilmoqda.
Amaldagi qonunchilikka muvofiq, ushbu turdagi jinoyatlarni sodir etganlik uchun 10 yildan 20 yilgacha ozodlikdan mahrum qilish jazosi belgilangan.
