Polsha rasmiylari Rossiya maxsus xizmatlari topshirig‘i bilan Ukraina va AQSh fuqaroligiga ega shaxsga suiqasd tayyorlaganlikda gumon qilinayotgan Rossiya fuqarosi ushlanganini ma’lum qildi.
Rzeczpospolita nashrining yozishicha, bu haqda 13-avgust kuni Polsha bosh vaziri Donald Tusk xabar bergan. Uning aniqlik kiritishicha, gumonlanuvchi 7-avgust kuni qo‘lga olingan.
Tuskning so‘zlariga ko‘ra, Vladimir Putin rejimi uchun «noqulay bo‘lgan» shaxsni o‘ldirish rejasi «so‘nggi lahzada» barbod qilingan.
RMF FM radiostansiyasi norasmiy manbalarga tayanib xabar berishicha, suiqasd nishoni Ukrainaga mahsulot yetkazib beruvchi qurol-yarog‘ sanoati pudratchisi bo‘lgan. Hujumni tayyorlashda gumon qilinayotgan shaxs 29 yoshli, Donbassda tug‘ilgan Rossiya fuqarosi ekani aytilmoqda.
Qotillik Varshavada amalga oshirilishi rejalashtirilgan. Polsha maxsus xizmatlari koordinatori Tomash Semonyakning ma’lum qilishicha, gumonlanuvchini qo‘lga olish operatsiyasi AQSh tomoni bilan hamkorlikda o‘tkazilgan.
Donald Tusk buni Rossiyadan bo‘lgan shaxs NATOga a’zo davlat hududida AQSh fuqarosiga suiqasd rejalashtirishda gumon qilingan ilk holat sifatida baholadi.
Polsha bosh vaziri Rossiya hukumati o‘zi uchun «noqulay» deb hisoblagan shaxslarni yo‘q qilishga urinishi mumkinligini inobatga olish zarurligini ta’kidlab, Varshava bunday tahdidlarga qarshi faol choralar ko‘rishini bildirdi.
Polshada rossiyalik rassomning o‘ldirilishi
Bu voqeadan avval, 15-iyun kuni Polshaning Belarus bilan chegarasi yaqinidagi Byala-Podlyaska shahrida rossiyalik rassom-aksionist Semyon Skrepetskiy otib o‘ldirilgan edi. Uning haqiqiy ismi Robert Kuzovkov bo‘lgan.
The Insider ma’lumotiga ko‘ra, rassom o‘ldirilishidan taxminan bir soat avval unga «rus patriotlari» tahdid qilayotgani haqida xabar bergan.
Ushbu ish doirasida dastlab uch kishi qo‘lga olingan. OAV xabarlariga ko‘ra, ularning kamida ikki nafari Belarus fuqarosi bo‘lgan. Keyinchalik tergov ularning jinoyatga aloqadorligini tasdiqlamagach, so‘roqdan so‘ng qo‘yib yuborilgan.
18-iyun kuni Donald Tusk Skrepetskiyning o‘ldirilishiga aloqadorlikda gumon qilingan yana bir shaxs ushlanganini ma’lum qilgan. Uning yonidan Gurjiston pasporti topilgani aytilgan.
Skrepetskiy 2021-yilda Rossiyadan Polshaga ko‘chib o‘tgan. U Rossiya hukumatiga qarshi qaratilgan karikaturalari va siyosiy aksiyalari bilan tanilgan edi.
